Mustra Kurashi i Keda Fiel Meskos Ku Benaya

Ken Benaya tabata? Benaya tabata yu di un saserdote. Normalmente, saserdote i levita no tabata bai guera ni no tabata usa arma. Pero Benaya sí a partisipá den e batayanan di Yehova; el a sirbi den ehérsito durante reinado di David i di Sálomon. Benaya tabata un guerero ku masha kurashi. Por ehèmpel, na un okashon, el a baha den un rembak i mata un leon. Tambe el a bringa kontra un sòldá enemigu ku tabata apnormalmente haltu. David tabata konfia Benaya asina tantu ku el a hasié kabesante di su wardaespaldanan personal.—2 Sám. 23:​20-23.

Benaya a keda leal na David durante e rebelion di Ábsalòn i durante e rebelion di Adonías. (2 Sám. 8:18; 15:18; 1 Rei. 1:8) Anto ora David a bira bieu, Benaya a sigui mustra ku e ta leal na David, pasobra el a yuda Sálomon bira rei. (1 Rei. 1:​32-40) Benaya tabata leal na Yehova i na e personanan ku Yehova a skohe komo rei, asta ora otro hende sí no tabata leal.

Nos tambe mester di kurashi pa bringa kontra nos enemigu poderoso Satanas i kontra esnan ku ta imit’é. Ademas, nos mester ta determiná pa sigui biba na un manera ku ta agradá Yehova. (Efe. 6:11; 1 Ped. 5:​8, 9) Asta si algun hende skohe pa stòp di sirbi Yehova, nos sí ke keda sirbié fielmente. Si nos hasi esei, nos por tin sigur ku lo e bendishoná nos.—2 Sám. 22:26.