Rumannan di Edat, Boso Ta Yuda e Kongregashon na Vários Manera

Bo tin hopi aña ta sirbi Yehova fielmente? Kisas bo ta kompará loke bo por hasi awor ku loke bo tabata hasi ántes. Anto podisé bo ta realisá ku, debí na bo edat, bo no por hasi mes tantu ku bo tabata hasi ántes. Esei por pone ku bo ta lucha ku pensamentunan negativo tokante bo mes. Kiko por yuda bo si bo ta sinti òf pensa asina?

KIKO YEHOVA TA FERWAGT DI BO?

Ta bon pa bo puntra bo mes kiko Yehova ta ferwagt di bo. E palabranan na Deuteronomio 6:5 por animá bo. Einan, e ta bisa: “Bo mester stima Yehova, bo Dios, ku henter bo kurason, ku henter bo alma i ku tur bo forsa.”

E teksto ta mustra ku tur loke Yehova ke ta pa bo hasi bo bèst di akuerdo ku e sirkunstansia ku bo tin awor. Esei por yuda bo pa bo no kompará bo mes ku otro hende ni kompará loke bo por hasi aworakí ku loke bo por a hasi ántes.

Laga nos pensa riba e asuntu: Tempu ku bo tabata mas yòn, bo sirkunstansia tabata diferente, i bo a duna Yehova e mihó di bo mes den e sirkunstansia ei. Pero awor ku bo sirkunstansianan a kambia, ainda bo ta dunando Yehova lo mihó den e sirkunstansianan ku bo tin awor. Pues, si bo pens’é bon, den un sentido, nada no a kambia.

BO EKSPERENSIA POR YUDA OTRO HENDE

Un otro kos ku por yuda nos ta: Na lugá di keda pensa riba loke bo no por hasi, pensa riba e kosnan ku sí bo por hasi awor ku bo ta di edat. Bo por asta hasi kos ku bo no por a hasi tempu ku bo tabata mas yòn. Ban wak un ehèmpel:

Kompartí bo eksperensianan di bida ku otro ruman. Pensa riba loke algun persona den Beibel a bisa:

Rei David: “Un tempu mi tabata hóben, i awor mi ta bieu, pero nunka mi no a mira un hende hustu desampará ni su yunan ta kana pidi pan.”—Sal. 37:25.

Hosue: “Skucha mi! Mi no tin hopi dia mas di bida. Di henter boso kurason i di henter boso alma, boso sa ku Yehova, boso Dios, a kumpli ku tur loke el a primintí boso. Tur su bunita promesanan a keda realisá. Niun palabra no a keda sin kumpli.”—Hos. 23:14.

Tantu David i Hosue a sirbi Yehova pa hopi aña i nan a pasa den hopi kos. Pues, ora nan tabata bisa algu, nan tabata sa di loke nan tabata papia. Kisas tempu ku bo tabata mas yòn bo tambe a yega di ekspresá ideanan similar na loke David i Hosue a ekspresá. Pero awor ku bo ta mas grandi i bo tin mas eksperensia, loke bo ta bisa tin mas peso.

Kon bo por kompartí e eksperensianan ku bo tin? Bo por papia tokante e bendishonnan di sirbi Yehova. Bo ta kòrda un bunita eksperensia ku ta mustra esei? Dikon bo no ta kompartí esei ku bo rumannan? Eksperensianan asina ta animá nos rumannan. Anto ora bo kompartí bo eksperensianan ku bo rumannan, esei lo fortalesé nan fe i bo mes tambe lo sinti bo animá.—Rom. 1:​11, 12.

Un otro manera ku bo por animá bo rumannan ta ora bo hasi esfuerso pa bai reunion en persona segun bo sirkunstansia ta permití. Ora bo bai Salòn bo por animá bo rumannan i bo mes tambe por haña animashon. Connie, ku nos a menshoná mas promé, a bisa: “Ora mi bai reunion en persona, esei ta yuda mi pa mi no desanimá lihé. Na Salòn mi ta ku tur mi rumannan ku ta stima mi. Ta kon mi por ta tristu! Anto di mi parti, mi ta mustra mi rumannan ku mi stima nan dor di duna nan regalo chikitu. I tambe mi ta pasa tempu ku nan hasiendo kos pa Yehova.”

YEHOVA TA BALORÁ TUR LOKE BO TA HASI P’E

Den Beibel tin hopi ehèmpel di persona ku Yehova tabata stima apesar ku nan no por a hasi mes tantu ku ántes. Pensa riba Símeòn, un israelita di edat ku tabata biba den tempu ku Hesus a nase. Ora Símeòn tabata bai tèmpel, kisas e tabata wak hòmbernan yòn ta hasi trabou importante na tèmpel. Anto e por a pensa ku Yehova no por a us’é mes bon mas manera e tabata usa e hòmbernan yòn ei. Pero Yehova no tabata pensa asina. Pa Yehova, Símeòn tabata un hòmber masha spiritual i hustu. P’esei, Yehova a dun’é e privilegio di mira Hesus komo bebi. Yehova tabata guia Símeòn ku spiritu santu, i el a asta usa Símeòn pa profetisá algu tokante e Mesías. (Lúk. 2:​25-35) Pues, ora ku Yehova tabata wak Símeòn, e no tabata djis wak un hòmber ku su forsa tabata bai atras, pero un hòmber ku tabatin fe fuerte.

Bo por ta sigur ku Yehova ta balorá tur loke bo hasi p’e asta si bo no por hasi mes tantu ku ántes. Pa Yehova, loke ta importante ta ku un hende ta “duna segun loke e tin, no segun loke e no tin.”—2 Kor. 8:12.

Pues, enfoká riba loke bo por hasi. Por ehèmpel, tin vários kos ku bo por hasi ainda den Yehova su sirbishi, asta si ta djis pa un ratu so. Tambe bo por animá bo rumannan dor di bèl nan òf duna nan un karchi di animashon. Tin biaha e kosnan chikitu ei por tin un efekto grandi riba nos rumannan, foral si e ta bin for di un sirbidó fiel manera abo ku a sirbi Yehova pa hopi aña.

Aunke rumannan di edat no tin e mesun forsa di ántes, ainda nan por hasi hopi pa Yehova. Wak e eksperensia di un ruman muhé ku ta biba na un pais na Afrika den e kuadro: “Beibel A Skapa Su Bida.”

No lubidá ku e echo ku bo a sirbi Yehova pa hopi aña i ta sigui sirbié fielmente por animá bo rumannan. Bo perseveransia ta un ehèmpel pa otro hende, i bo por konfia loke Beibel ta bisa, esta, ku “Dios no ta inhustu pa lubidá boso trabou i e amor ku boso a mustra pa su nòmber: Boso a yuda i boso ta sigui yuda e santunan.”—Heb. 6:10.

KEDA YUDA OTRO HENDE

Segun algun estudio, hopi hende di edat ku ta gusta yuda otro hende, tin mihó salú, ta pensa mas kla i ta biba mas largu.

Ta klaru ku ora bo hasi kos bon pa hende, e no ta bai kita tur e krekechénan ku bo tin. Ta Dios su Reino so por kita loke ta kousa behes i morto, esta, e piká ku nos a heredá di Ádam.—Rom. 5:12.

Si bo sigui hasi loke Yehova ta pidi bo, inkluso yuda hende siña konos’é, esei lo yuda ku bo speransa ta keda fuerte i lo por asta yuda bo salú. Kerido rumannan di edat, kòrda ku Yehova ta apresiá tur loke boso ta hasi den su sirbishi i kòrda tambe ku e kongregashon ta balorá boso ehèmpel di fe.