Bo Ta Kòrda?
Bo a tuma tempu pa lesa e edishonnan di e aña akí di E Toren di Vigilansia? Wèl, wak si bo por kontestá e siguiente preguntanan:
Dikon nos ta onra Yehova?
Nos ta onra Yehova pasobra nos tin rèspèt profundo p’e i pasobra nos ta stim’é di henter nos kurason. Ademas, nos ta onra Yehova pasobra nos ke pa otro hende siña konos’é.—w25.01, pág. 3.
Si un hende hùrt nos, kiko por yuda nos pordoná e persona ei?
Nos no mester djis ignorá nos sintimentunan. Pero, ora nos stòp di karga renkor, nos ta evitá di laga amargura daña nos amistat ku otro hende.—w25.02, pág. 15-16.
Dikon Disipel Marko ta un bon ehèmpel pa ruman hòmber hóben?
Marko tabata dispuesto pa aseptá un asignashon pa e por a sirbi su rumannan. Aunke Marko a pasa den un situashon ku probablemente a dal e hopi duru, e no a laga esei desanim’é, i el a sigui sirbi su rumannan. Ademas, Marko a bira amigu di Pablo i di otro ruman ku tabatin amistat fuerte ku Yehova.—w25.04, pág. 27.
Kiko Hesus tabata ke men ora el a bisa den su orashon: “Mi a revelá bo nòmber na nan”? (Huan 17:26)
Hesus su disipelnan tabata sa e nòmber di Dios kaba. Pues, loke Hesus tabata ke men ta ku el a yuda siña nan konosé Yehova mihó, esta, Su personalidat, propósito-, aktividat- i kualidatnan.—w25.05, pág. 20-21.
Ora nos ta modesto, kiko nos ta realisá?
Nos ta realisá ku nos no sa tur kos. Por ehèmpel, nos no sa ki dia e fin ta bin ni tampoko kon Yehova lo yuda nos durante e tempu ei. Tampoko nos no sa kon bida lo ta mañan ni nos no por kaba di komprondé kon bon Yehova konosé nos.—w25.06, pág. 15-18.
Kiko nos por hasi pa siña algu di un artíkulo òf un diskurso públiko?
Nos por puntra nos mes: ‘Kiko a usa pa konvensé e públiko? Tin un bon ilustrashon ku ami por usa ora mi ta siña otro hende? Ken lo ta interesá den e tópiko akí?’—w25.07, pág. 19.
Kiko nos por siña tokante Yehova su pordon ora nos wak e manera ku el a pordoná David?
David a kometé algun piká serio. Pero, el a arepentí i Yehova a pordon’é. (1 Rei. 9:4, 5) Ora Yehova pordoná un piká, e no ta kòrda riba dje mas. Esei ke men ku hamas lo e usa e piká ei kontra bo ni kastigá bo den futuro pa e piká ei.—w25.08, pág. 17.
Si un studiante di Beibel tin difikultat pa kapta un sierto siñansa, kiko bo por hasi?
Si ainda bo studiante tin difikultat pa kapta un sierto siñansa despues ku bo a hasi tur bo esfuerso pa splik’é e punto ei usando Beibel, no keda para einan. Bo por djis sigui, i bo por bin bèk riba e punto ei mas despues.—w25.09, pág. 24.
Beibel ta bisa ku piká tin “poder pa engañá hende.” (Heb. 3:13) Kon piká ta engañá nos?
Nos imperfekshon ta pone nos haña gana di hasi kos malu. Ademas, e por laga nos keda duda ku Yehova stima nos.—w25.10, pág. 16.
Kiko ta tres kos ku por yuda nos papia mas habrí ku Yehova den orashon?
(1) Pensa riba Yehova su kualidatnan. (2) Pensa tokante algu ku ta preokupá bo i menshoná esei den bo orashon. Por ehèmpel, si tin un hende ku bo mester pordoná, papia ku Yehova tokante esei i pidié yuda bo. (3) Tuma bo tempu i kòmbersá ku Yehova. Esei lo yuda bo papia habrí kuné i bis’é loke bo realmente ta pensa i sinti.—w25.10, pág. 19-20.
Kon nos por yuda nos rumannan di edat?
Nos por bishitá òf bèl nan. Ademas, nos por kompañá nan ora nan ta bai dòkter. Algu otro ku nos por hasi ta traha ku nan den diferente forma di sirbishi.—w25.11, pág. 6-7.
Kiko boso mester tene kuenta kuné pa boso dia di kasamentu onra Yehova?
Kumpli ku e rekisitonan legal. Boso lo ke pa e dia di kasamentu reflehá e bunita kualidatnan di Yehova. Boso bistí di kasamentu mester ta modesto. Ademas, no sigui kustumber ku no ta na armonia ku Beibel. Bon komunikashon ta importante ora di plania un kasamentu.—w25.12, pág. 21-24.