Informe di Proclamadónan di Reino

Testigonan Ta Hala Atencion Público na Francia

YEN di entusiasmo, di diabierne mainta trempan, 29 di januari 1999, i siguiendo henter fin di siman, Testigonan di Jehova na Francia a distribuí 12 miyon copia di un tratado riba caya, i despues di cas pa cas. E tabata titulá Pueblo di Francia, Bo Ta Ser Gañá! Di con nan a hiba un campaña asina?

Durante un conferencia di prensa na Paris e diabierne mainta ei, nan a duna e motibu dje campaña. Un bocero dje Testigonan a splica: “Loke nos kier haci awe, ta laga hende conocé nos pa loke di berdad nos ta, i silenciá e declaracionnan difamatorio cu ta ser plamá tocante nos. Nos ta dispuesto di aceptá crítica, pero nos lo no keda ketu i tende mas mentira i comentarionan cu ta daña nos reputacion.”

Apesar cu Testigonan di Jehova ta e di tres religion cristian mas grandi na Francia, hopi mucha Testigo a ser insultá i molestiá na scol. Adultonan a perde nan trabou i a ricibí menasa pa motibu di nan religion. Ta increibel, pero asta riba e contribucionnan religioso cu nan a ricibí, nan a haña ‘aanslag’ di belasting di 60 porciento. Con e campaña a trata cu e discriminacion aki?

E tratado ta declará: “E 250.000 Testigonan di Jehova i nan asociadonan bibá na Francia ta PROTESTA contra e manera desonesto cu for di 1995 ta conta nan religion cristian, un religion cu ta existí na Francia for di aña 1900, sin mas huntu cu sectanan peligroso. . . . Ta PROTESTA contra e abusu constante cu nan ta sometí na dje.” E tratado a exponé e acusacionnan mentiroso cu difamadónan a haci contra e Testigonan na Francia, i e maneranan baho cu nan a purba crea publicidad negativo. E tratado ta concluí bisando: “Awe tin mas cu dos miyon Testigo di Jehova i nan asociadonan ta biba na Europa. Dor cu nan ta biba segun e balornan di Evangelio, nan ta respetá e leynan dje gobiernunan bou di cua nan ta biba como ciudadano. Pueblo di Francia, esakinan ta e echonan. Ta nos deber di presentá nan manera realmente nan ta!”

Reaccion Lihé i Positivo

A parti miyones dje tratadonan riba e promé dia. Na Paris so, pa merdia mas cu 7.000 Testigo a laga mas cu 1,3 miyon tratado den man di hende. Mira asina tantu Testigo ta parti tratado riba caya tabata un primicia p’e pueblo. Medionan di comunicacion, incluso korant i canal di television nacional i local, a reaccioná positivo riba e campaña. E korant Le Progrès de Lyon a comentá: “E iniciativa aki . . . ta revelá un mal comprendimentu tocante un palabra. Durante e último dies añanan, e palabra ‘secta’ . . . a haña un conotacion perverso, peligroso i perhudicial. . . . Testigonan di Jehova no ta di un naturalesa peligroso capas di desbalansá sociedad.”

Hende cu conocé Testigonan di Jehova ta apreciá nan genio pacífico i nan respet profundo pa e ordu social establecí. Pues, hopi hende riba caya a expresá nan aprecio i sosten na e decenas di miles di Testigonan cu a tuma parti na e campaña. Casi mesora a cuminsá ricibí yamada di telefon, fax i carta di hende cu tabata expresá nan gratitud pa e tratado. Mas cu tur cos, hendenan sincero a haña un chens di tende e echonan tocante Testigonan di Jehova, na lugá di comentarionan inventá i sin sentido. I e Testigonan, cu a mira nan creencianan ser calumniá, tabatin un chens di demostrá nan sintimentu pa loke nan ta stima.