Interpretacion di Bijbel Bou di Influencia di Ken?

UN DEFINICION dje palabra “interpretá” ta “comprendé den lus di bo creencia, huicio of circunstancia particular.” (Webster’s Ninth New Collegiate Dictionary) Pues, por lo general bo pasado, bo educacion i bo criansa ta influenciá loke cu bo interpretá.

Pero kico di interpretacion di Bijbel? Nos ta liber pa splica pasashinan di Bijbel di acuerdo cu nos propio “creencia, huicio of circunstancia”? Di mes, mayoria erudito i traductor di Bijbel ta pretendé cu nan no ta hacié; cu ta Dios ta guia nan.

Un ehempel di esaki ta loke un nota na pia di página na Juan 1:1 ta bisa den A New Version of the Four Gospels (Un Version Nobo di e Cuater Evangelionan), publicá na 1836 dor di John Lingard bou dje nomber ficticio “Un Católico.” E ta bisa: “Hende di tur tipo di creencia ta mira confirmacion pa nan opinionnan particular den e Santu Scritura: pero, de echo, no ta Scritura ta informá nan, sino mas bien, ta nan ta mara nan propio nificacion n’e idioma di Scritura.”

Apesar cu tal punto ta na su lugá, ki intencion e escritor tabatin? Su comentario tabata pa apoyá su interpretacion di e versículo ei, cu el a traducí: “Na cuminsamentu tabata ‘e palabra’; i ‘e palabra’ tabata cu Dios; i ‘e palabra’ tabata Dios,” un traduccion típico di hende cu ta kere den Trinidad.

Kico a motivá e escritor pa traducí Juan 1:1 pa apoyá e doctrina di Trinidad? Ta ‘Scritura a inform’é’ pa hacié? Imposibel, pasobra niun caminda den Bijbel bo no ta topa e siñansa di Trinidad. Tuma nota di kico The New Encyclopædia Britannica ta bisa riba esaki: “Ni e palabra Trinidad ni e doctrina explícito no ta aparecé den Testament Nobo.” Ademas, profesor E. Washburn Hopkins, di Universidad di Yale, ta remarcá: “Aparentemente e doctrina di Trinidad tabata desconocí pa Jesus i Pablo; . . . nan no ta bisa nada tocante dje.”

Ki conclusion nos por saca, anto, tocante esnan cu ta apoyá un interpretacion trinitario di Juan 1:1 of di cualkier otro texto di Bijbel? Segun sr. Lingard su propio criterio, “no ta Scritura ta informá nan, sino mas bien, ta nan ta mara nan propio nificacion n’e idioma di Scritura.”

Felismente, nos tin Dios su propio Palabra pa guia nos den esaki. “Boso sa esaki caba,” segun apostel Pedro, “cu ningun profecia di Scritura ta nace for di ningun interpretacion privá. Pasobra profecia no a ser trecé na ningun tempu pa boluntad di hende, sino cu hende a papia di parti di Dios segun cu nan a ser hibá pa spiritu santu.”—2 Pedro 1:20, 21.