Sigiendo Tras dje Meta cu mi a Pone ne Edad di Seis Aña

SEGUN CU SANDRA COWAN A CONTÉ

Hopi mayornan ta scoge un ofishi pa nan yiunan, tal como música of ballet, i ta cuminza entrenánan ora nan ta mashá hoven. Esei ta precisamente loke mi mama a haci pa mi. Desde cu mi tabatin dos siman di edad, nan a hibámi na tur reunion cristian i den e sirbishi di feld.

ORA mi a cumpli cu cuater aña, mama a kere cu mi por predica mi so. Mi tin memoria bibo di mi promé esfuerzo. Den nos auto, nos a yega na un cas grandi den cunucu, i mientras cu mama i e otronan a spera den e auto, mi a baha i a bai ne porta. Un señora bondadoso a scucha ora mi a ofrecele diez foyeto. Pa pagámi pa nan, el a dunámi un bara grandi di habón. Mi tabatin cu usa dos man pa tené. Ki emocioná mi a keda!

Ne mesun aña di 1943, e Scol Bíblico di Galad di Watchtower tabata inaugurá pa entrená predicador pionero di tempo completo pe trabao di misionero. Mama a animámi pa haci e sirbishi di misionero e meta di mi bida. Ne tempo ei nan tabata bringa Gera Mundial II den Europa, i mama a bisámi tocante yiu chikito di Testigo di Jehova na Europa cu tabata kitá for di nan mayornan. E kier a fortalecémi pa mi wanta cualkier clase di prueba.

Den berano di 1946 mi a bautiza ne asamblea internacional den Cleveland, Ohío, EUA. Aunque apenas mi tabatin seis aña di edad, mi a keda determiná di cumpli cu mi dedicacion na Jehova Dios. E berano ei mi a sirbi como pionero pe promé bez. Mi ta corda cu un maínta mi a laga 40 revista den man di hende sintá den Plaza di San Diego, California. Mi ta sigur cu mi por a haci esei pasobra mi tabata chikito i a papia hopi.

Hopi bez nos a predica cerca Beth-Sarim, unda ruman Rutherford, presidente dje sociedad Watch Tower, cu tabata enfermo a pasa e tempo di friu promé cu su morto na 1942. Nos a bishita Beth-Sarim cu regularidad i a come cu sirbidor di tempo completo cu a biba ei. Bishita feliz asina a hacími decidi cu esaki ta berdaderamente e clase di bida cu mi kier. Anto mi a haci e Scol di Galad i e sirbishi di misionero e meta di mi bida.

E sigiente aña mi mayornan a divorciá, pero e cambio den e situacion di mi famía no a sofoca nos spiritualidad. Mama tabata un pionero i masha interesá den entrenamento cu mi ruman homber i mi a recibi. Bishita di ruman cristian a yena nos caravana chikito cu alegría. Mama a haci esfuerzo pa conoce graduado di Galad. Dos graduado asina tabata Lloyd i Melba Barry cu a haci bishita durante nan trabao biahante mientras cu nan a spera nan asignacion den stranhería na Hapón. Nan a aparta tempo pa animámi—un mucha muher cu a anhela di ser misionero—i esei realmente a impresio­námi.

Ora mi tabatin 10 aña di edad, mama a casa cu un testigo excelente cu també tabata un predicador pionero. El a adopta mi ruman i mi no solamente por escrito sino també den su curazón. Su amor pa Jehova i su celo pe sirbishi tabata mashá contagioso.

Mama i papa a traha como equipo pa guía nos dos como yiu através dje añanan dificultoso di hubentud. Nos cas tabata un refugio spiritual cu mi ta corda cu cariño. No tabata fácil pa nan traha como pionero cu poco entrada i cria dos yiu; esei a exigi sacrificio propio. Pero mama i papa a depende di Jehova Dios i a pone interés di Reino promé.

Cuanto mi ta corda e asamblea internacional den e stad di New York na 1950! Papa a obtene un préstamo for di banco, i nos a hiba tres pasahero pa yuda paga gasto. Mama, papa, mi ruman, i ami a sinta hunto riba asiento dilanti pa tur e distancia for di San Diego te na New York, mientras cu e otronan a sinta patrás. Mi tata a perde su trabao pasobra su empleador a nenga di duné dos siman liber pa asisti ne asamblea. Pero nos tata a dúnanos e siguranza di cu Jehova Dios lo percura pa nos necesidad, i El a hacié. Papa a bende e auto pa paga e préstamo dje banco, anto a obtene un mihor trabao. Esei i experencia similar tabata mashá balioso pa mi hopi aña despues ora situacion dificultoso a enfrenta mi casá i mi.

Ora nos a bolbe for di New York, nos a bishita Kingdom Farm, unda pe promé bez mi a mira e Scol di Galad. Mi ta corda cu mi a para den un klaslokaal i a bisa den mi mes, ‘Mi no tin diesun aña ainda. Mi nunca por studia den e scol aki. Armagedón lo bini promé.’ Pero, e bishita a hacími mas determiná cu nunca pa haci Galad mi meta.

Trahando pa Alcanza mi Meta

Durante tur vacantie di scol, for di eerste klas padilanti, mi tabata pionero. Anto, dos siman despues di a gradua for di scol segundario den Juni di 1957, mi a bira pionero regular.

Den e asamblea di districto di Los Angeles na 1957, e reunion pa esnan interesá den Galad tabata special pa mi. Ora mi a drenta den e tent pe reunion, mi a contra cu Bill, un ruman hoven cu mi a conoce desde cu mi tabatin seis aña di edad. Durante e aña cu a pasa el a bai Louisiana pa sirbi unda tabatin mas necesidad. Nos dos a haya sorpresa pa descubri cu nos dos tabata interesá den e sirbishi di misionero. Seis luna despues nos a decidi di haci esei un proyecto hunto. Nos a skirbi e Sociedad pidiendo un asignacion i un luna promé cu nos casamento, nos a recibié den Romney, West Virginia.

Nos a muda ei riba camina pe asamblea internacional den New York na 1958. Ora nos tabata ne asamblea, nos a asisti ne reunion pa esnan interesá den Galad. Cientos di ruman tabatei. Mirando e multitud, nos a kere cu tabatin poco posibilidad pa haya invitacion pa Galad. No obstante, nos a entrega un solicitacion preliminario, aunque nos tabata casá pa 11 siman so. E sigiente aña den e asamblea di districto na Filadelfia, nos a entrega e segundo solicitacion.

Den Romney, Bill i mi a siña depende dje yudanza di Jehova Dios durante situacion difícil. Romney tabata un pueblo di rond di 2.000 habitante. Tabata imposibel pa haya empleo. Nos a biba den un caravana 5 meter largu trahá na cas i diseñá pe clima di California. Nos no tabatin pipa di awa, ni stoof ni fridjider. Tabata asina friu den dje cu nos tabatin cu kibra ijs den e emmer pa haya awa. E rumanan a yúdanos tanto posibel, compartiendo cu nos e cuminda cu nan a mata den jagmento. Nos a come biná, wasbeer, i eekhoorn. Na mas cu un ocasion nos a kere cu nos lo no tin nada pa come e dia ei, anto ora nos a yega cas for di sirbishi, nos a haya algun apel of keshi lagá dilanti dje porta.

Nos a lucha pa nuebe luna colgá pa un hilo cu a bira cada bez mas fini. Finalmente, nos a decidi cu lo ta sabí pa bai biba den Baltimore, Maryland, unda Bill por haya trabao. Ora nos a bisa e rumanan di nos decision, nan a yora i nos també. Pues, nos a decidi di persevera un poco tempo mas.

Net despues di esei un ruman cu tabata gerente di un supermercado den Westernport, Maryland, un distancia di 60 kilometer, a ofrece Bill trabao di tempo parcial. E mesun luna un hende cu locual nos a studia e Bijbel a ofrecénos un casita bonita mueblá cu un stoof grandi cu a kima carbón. Tabata ne tempo ei cu Malaquías 3:10 a bira mi texto bíblico favorito. Jehova Dios a basha riba nos un bendicion cu a sobrepasá loke nos a spera.

Galad por Fin!

Un dia di mas excitante den nos bida tabata den November di 1959, ora nos a recibi nos invitacion pa Galad. Nos tabata invitá pa klas di 35, e último klas na Kingdom Farm. Ora mi a para den e mesun klaslokaal cu mi a bishita como un mucha, mi tabatin un sintimento di un ­felicidad cu palabra no por ex­presa.

Galad tabata un oasis spiritual. E tabata mescos cu bida den e mundo nobo pa cinco luna. Rara bez den bida nos ta spera hopi aña pa algo anto ta haya cu e ta mihor cu loke nos a spera. Pero Galad tabata precisamente esei.

Nos tabata asigná na India, pero despues nan a nenga di dúnanos visa. P’sei, despues di a spera den e stad di New York pa un aña, e Sociedad Watch Tower a cambia e asignacion pa Marocco, den Nortáfrica.

Como Misionero den Marocco

Nos a pasa 24 aña gozoso den Marocco, kedando encantá cu e pueblo tan pronto cu nos a yega. Nos a siña francés i spañol, idioma cu a yúdanos comunica cu hende di hopi nacionalidad cu ta biba ei. Principalmente tabata hende cu a bini di otro país cu a acepta e mensahe di Reino.

Un señora cu locual mi a studia e Bijbel a traha baliando e flamenco spañol den un cabaret den Casablanca. Despues di a siña principio bíblico, el a bandona e doño dje cabaret cu locual el a biba compañá i a bolbe na Spaña. El a duna testimonio na tur su famía ei, i algun di nan a acepta e berdad bíblico cu el a comparti cu nan. Despues el a bolbe pa Casablanca, unda el a keda fiel na Dios te na su morto na 1990.

Durante nos promé añanan den Marocco, nos a mira un aumento den e cantidad di publicador di Reino. Pero, ora a bira difícil pa hende stranhero haya permit pa trabao i residencia, e Testigonan a bai Europa. Algun di esnan cu locual nos a studia awor ta den Nueva Zelandia, Canadá, América, Bulgaria, Rusia, i Francia, i algun di nan ta participa den e sirbishi di tempo completo.

Di ripiente, den April di 1973, nos trabao di predica den Marocco tabata prohibí. Ki un golpi esei tabata pa nos! Riba un diahuebs anochi, nos tabata un grupo feliz den Salón di Reino, conbersando te cu luz a wordu pagá pa indica cu tabata ora di bai cas. Nos no tabatin e mínimo idea cu nunca mas nos lo mira luz luza tal compañerismo cristian liber. Bao dje prohibicion, nos reunion i asamblea di circuito tabata limitá na grupo chikito den cas particular. Pa nan asisti na asamblea di districto, e testigonan a bai Francia of Spaña.

Ora e cantidad a mengua, e poco testigonan cu a keda den Marocco a cultiva un relacion basta estrecha cu otro. Pues, ora e Sociedad Watch Tower a decidi finalmente pa cera e sucursal i asignános na otro país, nos tur a yora hopi.

Nos a Bai na Africa Central

Nos asignacion nobo tabata e República Centroafricano. Ki un cambio tremendo distinto di Nortáfrica! Mientras cu e clima di Marocco a parce hopi e zuid di California, nos a háyanos den un clima tropical cu hopi awa.

Tabatin problema nobo pa enfrenta. Por ehempel, awor mi tabatin cu domina mi miedu di bestia cu ta lastra. Na tres ocasion lagadishi a cai riba mi cabez ora mi a drenta un porta. Tabatin bez cu ora mi tabata conduci estudio bíblico, djaca a decidi di asisti! Aunque mi kier a bai na carreda, mi a siña dominámi, nunca kitando mi bista for di Sr. Djaca i teniendo mi tas i pia na halto te cu el a decidi di bai. Mi a siña cu bo por costumá cu cualkier cos si bo ta persevera.

Ora nos tabatei pa seis luna, un anuncio tabata hací na radio cu nos trabao ta prohibí. Pues, nan a cera nos Salón di Reino i a pidi misionero bai. Solamente nos i un otro pareha por a haci arreglo pa sigi den e sucursal pa tres aña mas. Anto un diadomingo maínta durante nos estudio di Toren di Vigilancia, poliz armá a bini i a híbanos ne central di poliz. Nan a duna libertad na hende muher i mucha, pero a detene 23 ruman homber, incluyendo Bill, mi casá. Despues di seis dia, nan a lagué bai cas i yena su maleta; tres dia despues, bao di ordu dje gobierno, nos a bandona e país, den Mei di 1989. Tabatin un otro despidida tristu na aeropuerto, unda hopi di nos rumanan amoroso a bini pa yama ayó.

Finalmente, Nos a Bai Sierra Leona

Nos asignacion actual ta den Sierra Leona, Westáfrica, un país bonita cu tin bonita playa cu santo blancu. Hende ta mashá amigable, i e sirbishi di feld ta un placer. Den tur cas nos ta ser invitá pa sinta, hopi bez den sombra di mata di mango of di coco. Hende ta gusta papia tocante Dios i tuma nan mes ehemplar dje Bijbel i sigi e lezamento.

Tanto Bill como ami ta traha den e cas di Betel den Freetown. Mi ta sirbi como recepcionista i també ta traha cu abonament i cuenta di congregacion. Despues di a sirbi pa 16 aña den país unda nos trabao tabata prohibí, ta maraviyoso pa ser den un país unda cu tin libertad i e trabao ta prosperá.

Mi a completa 30 aña di sirbishi di misionero den Juni di 1991. Berdaderamente, mama a pone dilanti mi un meta cu ta bale la pena! Si e ta na bida ainda, lo mi tin gusto di bisé atrobé, “Danki, mama!” Felizmente, mi por bisa ainda, “Danki, papa!”

[Plachi na página 28]

Asamblea internacional di New York na 1958

[Plachi na página 29]

35th class—July, 1960

[Plachi na página 30]

Bill i Sandra Cowan na 1991