Pa Bo Keda Cu Un Amigu, Abo Mester Ta Un Amigu

Amistad ta basá riba amor. Mas bo siña di Jehova, mas grandi bo amor p’e lo bira. Segun cu bo amor pa Dios ta crece, bo deseo pa sirbié tambe lo crece. Esaki lo impulsá bo pa bira disipel di Jesucristo. (Mateo 28:19) Dor di uni cu e famia felis di Testigonan di Jehova, bo por experenciá e amistad di Dios pa semper. Kico bo tin cu haci?

Bo tin cu demostrá bo amor pa Dios dor di obedecé su leynan. “Pasobra esaki ta loke e amor di Dios ta nificá, cu nos ta warda su mandamentunan; i tog su mandamentunan no ta un carga pisá.”—1 Juan 5:3.

Aplicá loke bo siña. Jesus a conta un relato cu ta ilustrá esaki. Un homber sabí a traha su cas riba baranca. Un homber bobo a traha su cas riba santu. Ora un tormenta pisá a bini, e cas trahá riba baranca no a basha den otro, pero e cas trahá riba santu a basha completamente den otro. Jesus a bisa cu esnan cu ta tende su siñansanan i ta aplicá nan, ta manera e homber sabí cu a edificá riba baranca. Pero esnan cu ta scucha na su siñansanan i no ta aplicá nan, ta manera e homber bobo cu a edificá riba santu. Manera cua dje hombernan aki bo kier ta?—Mateo 7:24-27.

Dedicacion. Esaki ta nificá cu bo ta acercá Jehova den oracion i ta bis’é cu bo kier haci su boluntad pa semper. Haci Dios su boluntad ta mustra cu bo ta un disipel di Jesucristo.—Mateo 11:29.

Bautismo. “Bautisá i laba bo picánan dor di inbocá su nomber.”—Echonan 22:16.

Bira completamente enbolbí den sirbi Dios. “Cualkier cos cu boso ta haciendo, traha riba dje cu henter boso alma como pa Jehova, i no pa hende.”—Colosensenan 3:23.