Keda Amigu Di Dios Pa Semper!

Bo tin cu haci esfuerso pa bo haña un amigu; bo tin cu haci esfuerso pa keda amigu cu un persona. Bo esfuerso pa bira i keda amigu di Dios lo ta ricamente bendicioná. Jesus a bisa esnan cu a kere den dje: “E berdad lo haci boso liber.” (Juan 8:32) Kico esei ta nificá?

Bo por disfrutá di libertad awor. Bo por ta liber di siñansanan falsu i mentiranan cu Satanas a plama. Bo por ta liber di e desesperacion cu ta yena bida di miyones di hende cu no conocé Jehova. (Romanonan 8:22) Dios su amigunan no tin “miedu di morto.”—Hebreonan 2:14, 15.

Bo por gosa di libertad den Dios su mundu nobo. Esta un libertad maraviyoso bo por gosa di dje den futuro! Den e tera paradísico, lo tin libertad for di guera, malesa i crímen. Libertad for di pobresa i hamber. Libertad for di behes i morto. Libertad for di miedu, opresion i inhusticia. Bijbel ta bisa di Dios: “Bo ta habri bo man i ta satisfacé e deseo di tur cos bibu.”—Salmo 145:16.

Amigunan di Dios lo biba pa semper. Bida eterno ta un regalo precioso cu Dios lo duna tur esnan cu ta busca su amistad. (Romanonan 6:23) Djis pensa riba kico bida sin fin lo nificá pa bo!

Lo bo tin tempu pa haci hopi cos. Kisas lo bo kier siña con pa toca un instrumento musical. Of kisas lo bo kier siña pinta of siña pa carpinté. Tal bes bo ta deseá di siña tocante bestia of mata. Of por ta bo kier biaha i mira diferente pais i hende. Si bo tin bida eterno tur esaki lo ta posibel!

Lo bo tin tempu pa haña hopi amigu. Biba pa semper lo haci posibel pa bo siña conocé hopi otro hende cu a bira amigu di Dios. Lo bo siña conocé nan talento i bon cualidadnan i nan lo ta bo amigunan tambe. Abo lo stima nan i nan lo stima bo. (1 Corintionan 13:8) Bida sin fin lo duna bo e tempu pa cera amistad cu tur hende riba tera! Mihó cu tur cos, bo amistad cu Jehova lo bira asta mas fuerte cu nunca segun cu e siglonan ta pasa. Mare bo por ta amigu di Dios pa semper!