Testigonan di Jehova Vindicá na Grecia

DJE CORESPONSAL DI SPIERTA!

E PASTOR ortodox den Gazi, un pueblito di Creta, a declará den un di su sermonnan: “Testigonan di Jehova tin un salon aki mes den nos pueblito. Mi tin mester di boso apoyo pa deshací di nan.” Un anochi, un par di dia despues, e bentananan dje Salon di Reino a ser kibrá i personanan desconocí a manda tiru di scopet den direccion dje Salon. Asina e cuestion di libertad di religion a bolbe lanta na Grecia.

E sucesonan aki a impulsá cuater Testigo local, Kyriakos Baxevanis, Vassilis Hatzakis, Kostas Makridakis i Titos Manoussakis, pa entregá un peticion cerca e Minister di Educacion i Asuntunan Religioso pa haña un permit pa tene reunionnan religioso. Nan a spera cu dor di haña un permit, proteccion policial lo ser garantisá finalmente. Sin embargo, cosnan lo no a bai asina fácil.

E pastor a manda un carta pa e oficina principal di polis di siguridad na Heraklion, halando atencion dje autoridadnan na e Salon di Reino di Testigonan di Jehova den su parokia i pidiendo pa imponé sancionnan i pa nan reunionnan ser prohibí. Esaki a hiba na un investigacion i interogacion dor di polis. Cu tempu, e fiscal a demandá e Testigonan pa actonan criminal i a trece e caso dilanti corte.

Dia 6 di october, 1987, e Corte Criminal di Heraklion a absolvé e cuater acusadonan, bisando cu “nan no a cometé e acto di cua nan a ser culpá, pasobra miembronan di un religion ta liber pa tene reunionnan . . . , ningun permit ta necesario.” No obstante, e fiscal a apelá e decision aki dos dia despues, i a trece e caso dilanti un corte superior. Dia 15 di februari, 1990, e corte aki a sentenciá e Testigonan na dos luna di prizon i un boet di rond di 180 florin. Na nan turno, e acusadonan a apelá n’e Corte Supremo di Grecia.

Dia 19 di mart, 1991, e Corte Supremo a nenga di trata e apelacion i a sostené e condena. Mas cu dos aña despues, dia 20 di september 1993, ora a anunciá e decision di Corte Supremo, polis a seya e Salon di Reino. Manera un documento policial a revelá, e Iglesia Ortodox di Creta tabata tras di e accion aki.

E situacion aki a presentá dor cu cierto leynan, pasá na 1938 cu e intencion di restringí libertad di religion, ainda ta vigente na Grecia. Nan ta stipulá cu si un individuo ta deseá di manehá un lugá di adoracion, e mester obtené un permit for dje Ministerio di Educacion i Asuntunan Religioso i tambe for dje obispu local dje Iglesia Ortodox. Pa vários década, e leynan anticuá aki a causa Testigonan di Jehova hopi dificultad.

Libertad di Religion i Derechonan Humano

Ora nan a haña sa cu e Corte Supremo a sostené nan condena, e cuater Testigonan a entregá un solicitud n’e Comision Europeo pa Derechonan Humano, na Strasbourg, Francia, dia 7 di augustus, 1991. E solicitantenan a afirmá cu nan condena a violá Artículo 9 dje Combenio Europeo, cu ta protehá e libertad di pensamentu, concenshi i religion, como tambe e derecho pa expresá bo religion bo so of den comunion cu otronan i den público of den privá.

Dia 25 di mei, 1995, e 25 miembronan dje Comision a yega n’e decision unánime cu den e caso aki Grecia a violá Artículo 9 dje Combenio Europeo. Nan declaracion tabata cu e condena en cuestion no tabata compatibel cu e spiritu di libertad di religion i no tabata necesario den un sociedad democrático. E decision aki relacioná cu con permisibel e caso ta, a declará tambe: “E solicitantenan . . . ta miembro di un movementu kende nan rito i prácticanan religioso ta ampliamente conocí i autorisá den hopi pais europeo.” Finalmente, e Comision a manda e caso p’e Corte Europeo pa Derechonan Humano.

No Por Stop Testigonan di Jehova

E audiencia a ser poné pa 20 di mei, 1996. Tabatin riba 200 presente den e sala di corte, incluyendo alumno i profesornan dje universidad local, periodistanan i un cantidad di Testigo di Jehova for di Grecia, Alemania, Bélgica i Francia.

Sr. Phédon Vegleris, profesor emérito dje Universidad di Aténas i abogado dje Testigonan, a mantené e ponencia cu e política i huicio cu e autoridadnan nacional a administrá a violá, no solamente e Combenio Europeo, sino tambe e Constitucion di Grecia. “Pues, ley nacional i su aplicacion ta loke e Corte ta tratando cuné.”

E abogado dje gobiernu di Grecia tabata un hues dje Conseho di Estado, kende, en bes di considerá e echonan, a referí n’e posicion cu e Iglesia Ortodox di Grecia a asumí, n’e iglesia su lasonan estrecho cu Estado i e pueblo, i n’e su supuesto necesidad pa controlá otro religionnan. Ademas, el a declará cu desde 1960 padilanti, Testigonan di Jehova a logra aumentá nan cantidad grandemente. Cu otro palabra, e monopolio ortodox a ser desafiá exitosamente!

Libertad di Religion Sostené

Lo a pronunciá huicio dia 26 di september. A reina gran suspenso, foral pa Testigonan di Jehova. E Presidente dje Corte, Sr. Rudolf Bernhardt, a lesa e decision na bos haltu: E Corte, consistiendo di nuebe hues, unánimamente a mantené cu Grecia a violá Artículo 9 dje Combenio Europeo. Tambe el a concedé e solicitantenan e suma di rond di NAƒ. 30.000 pa cubri gastunan. Mas importante cu tur, e decision a incluí hopi argumento digno di mencion na fabor di libertad di religion.

E Corte a comentá cu ley di Grecia ta permití pa “autoridadnan político, administrativo i eclesiástico interferí muchu leu cu e libertad di religion.” El a agregá cu e Estado a usa e procedura rekerí pa obtené un permit “pa imponé condicionnan rígido, of eigenlijk prohibitivo, riba e práctica di creencianan religioso di movementunan no-ortodox, en particular Testigonan di Jehova.” E tácticanan feros cu e Iglesia Ortodox a usa pa asina tantu década a ser exponé dor di e corte internacional aki.

E Corte a enfatisá cu “e derecho pa libertad di religion manera ta ser garantisá den e Combenio ta excluí cualkier derecho di parti dje Estado pa determiná si creencianan religioso of e medionan usá pa expresá creencianan asina ta legítimo of no.” Tambe Corte a declará cu “Testigonan di Jehova ta cai bou dje definicion di ‘religion conocí’ manera e ley di Grecia ta mencioná . . . Ademas ta e Gobiernu a reconocé esaki.”

No Ta Djis un Chansa

Durante e próximo par di dianan, mayoria dje corantnan principal na Grecia a publicá e caso aki. Dia 29 di september, 1996, e edicion di diadomingo di Kathimerini a haci e siguiente comentario: “Maske cuantu e Estado di Grecia trata na pasa riba dje como ‘djis un chansa,’ e ‘boftá den cara’ cu el a ricibí dje Corte Europeo pa Derechonan Humano na Strasbourg ta un berdadero echo, un echo cu a ser registrá debidamente riba un escala internacional. E Corte a recordá Grecia di Artículo 9 dje Combenio Riba Derechonan Humano, i a condená e legislacion di Grecia unánimamente.”

Ethnos, un corant di Aténas, a skirbi dia 28 di september, 1996, cu e Corte Europeo “a condená Grecia, dunando e ordu pa paga e gastunan di corte pa su ciudadanonan cu a resultá di tin e mala suerte di ta Testigo di Jehova.”

Un programa radial a entrevistá un dje abogadonan dje solicitantenan, Sr. Panos Bitsaxis. El a bisa: “Nos ta bibando den aña 1996, na drempel di siglo 21, i no ta cos di papia mes cu no mag di tin discriminacion, intimidacion of intervencion di parti dje gobiernu en coneccion cu e ehercicio dje derecho fundamental pa libertad di religion. . . . Esaki ta un bon oportunidad pa e gobiernu reexaminá su política i pone un paro na e discriminacion sin sentido aki, cu no ta sirbi absolutamente ningun propósito den nos tempu djawe.”

E decision den e caso Manoussakis i Otronan versus Grecia ta duna e speransa cu e Estado di Grecia lo bai adaptá su legislacion n’e huicio dje Corte Europeo, di manera cu Testigonan di Jehova na Grecia lo por disfrutá di libertad di religion sin intervencion gubernamental, policial of di iglesia. Ademas, esaki ta e di dos huicio cu e Corte Europeo a dicta contra e administracion hudicial di Grecia riba asuntunan relacioná cu libertad di religion.a

Ta ampliamente conocí cu Testigonan di Jehova ta obedecé e “autoridadnan superior” gubernamental den tur cos cu no ta na conflicto cu e Palabra di Dios. (Romanonan 13:1, 7) Den ningun sentido nan ta forma un menasa pa ordu público. Al contrario, nan publicacionnan i ministerio público ta animá tur hende pa ta ciudadanonan cumplidor di ley i pa hiba un bida pacífico. Nan ta un religion recto i bon establecí, i nan miembronan a contribuí hopi na e bienestar di nan becindario. E echo cu nan ta dicididu pa sostené e normanan moral haltu di Bijbel i cu nan ta stima nan próhimo, foral manera nan obra di educacion bíblico ta mustra esei, tabatin un efecto saludabel den e mas cu 200 paisnan caminda nan ta existí.

Ta di spera cu e decisionnan cu e Corte Europeo a dicta lo sirbi pa trece mayor libertad di religion pa Testigonan di Jehova i pa tur otro minoria religioso na Grecia.

[Notanan]

[Plachi na página 29]

E Salon di Reino original seyá dor di polis dia 20 di september, 1993

[Plachi na página 29]

E Corte Europeo pa Derechonan Humano, Strasbourg

[Plachi na página 30]

E testigonan enbolbí: T. Manoussakis, V. Hatzakis, K. Makridakis, K. Baxevanis