Hende Muher Ta Biba Mas Largu Pero No Necesariamente Mihó

ROND mundu hende muher ta casando mas bieu, ta hañando ménos yu i ta bibando mas largu. “Bida di hende muher ta cambiando,” e revista UNESCO Sources ta informá. Entre 1970 i 1990, e expectacion di bida di hende muher n’e momento di nacementu a aumentá cu cuater aña den e mundu industrialisá i cu casi nuebe aña den paisnan den desaroyo. “Esaki ta nificá cu den e regionnan desaroyá awe, hende muher ta biba un promedio di 6,5 aña mas largu cu hende homber. Den e regionnan den desaroyo e diferencia ta cincu aña den Latinoamérica i Caribe, 3,5 aña na Africa i tres aña na Asia i e Pacífico.”

No obstante, pa hopi hende muher, biba mas largu no ta nificá biba mihó. Our Planet, un revista di Nacionnan Uní, ta comentá cu pa mayoria hende muher na mundu, derechonan humano básico ainda ta “e blancha riba e bolo cu nan nunca a purba. Ainda nan ta en busca pa haña gewoon pan cu awa so.” Sin embargo, segun Nacionnan Uní, asta e derechonan básico ta fuera di alcanse pa miyones pa motibu cu ainda e mayoria abrumador dje hendenan analfabeta, refugiado i pober na mundu ta hende muher. Apesar di algun progreso, UNESCO Sources ta concluí cu “e prospecto general pa hende muher . . . ta scur.”