Bestia ta Bai Shelu?

Loke Beibel Ta Bisa

Beibel ta bisa ku di tur kriatura riba tera, solamente un kantidat limitá di hende lo bai shelu. (Revelashon 14:1, 3) Nan ta bai shelu pa goberná komo rei i saserdote huntu ku Hesus. Mayoria di hende lo ser resusitá pa biba den paradeis riba tera.—Salmo 37:11, 29.

Beibel no ta bisa ku tin shelu pa bestia di kas òf kachó—i ku bon motibu. Bestia no por tuma e pasonan nesesario pa risibí “e yamada selestial.” (Hebreonan 3:1) E pasonan ei ta inkluí konosementu, pone fe i obedesé Dios su mandamentunan. (Mateo 19:17; Huan 3:16; 17:3) Ta hende so a ser kreá ku e speransa pa biba pa semper.—Génesis 2:16, 17; 3:22, 23.

Pa bai shelu, e kriaturanan riba tera mester ser resusitá. (1 Korintionan 15:42) Beibel ta menshoná vários relato di resurekshon. (1 Reinan 17:17-24; 2 Reinan 4:32-37; 13:20, 21; Lukas 7:11-15; 8:41, 42, 49-56; Huan 11:38-44; Echonan 9:36-42; 20:7-12) Sinembargo, tur relato tabata di hende i no di bestia.

Bestia tin alma?

Nò. Beibel ta bisa ku tantu bestia komo hende ta alma. (Numbernan 31:28) Ora Dios a krea Adam, e promé hòmber, Dios no a duna Adam un alma. Mas bien, Adam “a bira un ser bibu.” (Génesis 2:7) Alma ta konsistí di dos kos: “stòf di tera” i “rosea di bida.”

Alma por muri?

Sí, Beibel ta bisa ku alma por muri. (Levítiko 21:11; Ezekiel 18:20) Bestia i hende a bini di stòf, pues ora nan muri tur ta bolbe na stòf di tera. Ku otro palabra, nan ta stòp di eksistí.

Bestia por peka?

Nò. Pasobra peka ta enserá kualke echo, sintimentu òf pensamentu ku ta bai kontra e normanan di Dios. Pa un kriatura por peka, e mester por tuma un desishon moral, pero bestia no tin e kapasidat ei. Bestia ta sigui nan instinto. (2 Pedro 2:12) Na final di nan bida, nan ta muri, asta si nan no a kometé piká.

Maltrato di bestia ta aseptabel?

Nò. Dios a duna hende outoridat pa goberná riba bestia, pero no e derecho pa maltratá nan. (Génesis 1:28; Salmo 8:6-8) Dios ta interesá den e bienestar di tur bestia—asta di para chikitu. (Yonas 4:11; Mateo 10:29) Dios a ordená su sirbidónan pa trata bestia bon.—Éksodo 23:12; Deuteronomio 25:4; Proverbionan 12:10.

Teksto di Beibel tokante bestia

Génesis 1:28: “Dios a bendishoná [e promé pareha humano], i Dios a bisa nan: “Sea fruktífero i multipliká, i yena e tera i hasi esaki someté na bo; i goberná riba e piskánan di laman i riba e paranan di shelu, i riba tur ser bibu ku ta move riba tera.”

Loke esaki ta enserá: Dios a duna hende outoridat pa goberná riba bestia.

Numbernan 31:28: “I kobra tributo . . . for di e hòmbernan di guera ku a sali pa bataya; un for di kada sinku shen di e personanan, di e bakanan, di e burikunan i di e karnénan.”

Loke esaki ta enserá: Tantu bestia komo hende ta alma.

Proverbionan 12:10: “Un hende hustu ta kuida bida di su bestia.”

Loke esaki ta enserá: Bon hende ta sòru bon pa bestia, inkluso nan bestianan di kas.

Mateo 10:29: “No ta pa un sèn pretu nan ta bende dos mòfi? Sinembargo, ni ún di nan lo no kai na suela sin ku boso Tata sa.”

Loke esaki ta enserá: Dios ta tuma nota di bestia i ta kuida nan—asta e paranan chikitu.