E Punto di Bista Biblico

Crueldad Contra Animal Ta Malu?

DEN un arena deportivo na un pais centroamericano, tur wowo ta clabá riba dos gai di pelea, un corá i un blancu. E multitud ta grita, miéntras e gai corá, cu tin un blet skerpi-skerpi mará na su pata, ta dal esun blancu. Un árbitro ta coge e dos gainan i ta tene nan na laira. Esun blancu ta cologá slap, sin bida i ta lek sanger. E pelea di gai a caba.

Den sur di Filipínas, nan ta pone dos cabai machu contra otro. Mirones ta para wak e espectáculo cruel den cua e cabainan ta morde otro na orea, garganta, nanishi i otro parti di curpa. Aunke tur dos kisas ta bandoná e ring na bida, por lo ménos un di nan por keda mancá of ciegu of ta haña lesion cu finalmente ta hiba na morto.

Na Rusia dos cachó ta atacá otro. Un ratu despues, nan ta cana rond riba pata mutilá, cu wowo sacá i orea di sker, cu sanger ta basha for di carni rancá.

Pa siglonan hende a pone bestia bringa contra otro, supuestamente pa deporte. Hopi bes e forsa motivador ta wega di placa. N’e lista aki por agregá corida di toro, yagmentu riba zoro i asta bringamentu di araña. Ademas, hopi animal ta sufri den nomber di ciencia. Tin tambe un cantidad incontabel di bestia cu ta sufri dor di negligencia di nan doño, sea intencional of no.

Den algun pais, tin leynan pa controlá trato di bestia i pa prohibí actonan cruel. Asta aya na 1641, Massachusetts Bay Colony a formulá “E Cuerpo di Libertad” cu a declará: “Ningun hende no mag cometé ningun tirania ni crueldad contra criaturanan sin sintí, cu por lo general hende ta cria pa su uso.” Desde e tempu ei, hende a pasa leynan i a forma sociedadnan pa protehá bestia contra crueldad.

Tog, hopi hende cu ta promové e deportenan di bringamentu mencioná anteriormente, no ta haña cu nan ta practicá crueldad contra animal. Algun ta bisa cu nan stima e bestianan cu nan ta pone sufri of muri brutalmente. Amantenan di pelea di gai ta pretendé cu nan gainan ta biba mas largu cu cualkier galiña cu ta terminá den wea riba candela. Esei no ta niun consuelo!

Di Con Crueldad Ta Malu?

Dios ta permití nos usa animal pa nos beneficio. Principionan bíblico ta permití nos mata bestia pa cuminda i paña of pa protehá nos mes di daño. (Génesis 3:21; 9:3; Exodo 21:28) Sin embargo, bida ta sagrado pa Dios. Nos mester ehercé dominio riba bestia den un manera balansá, mustrando respet pa bida. Bijbel ta papia negativo di un homber cu yama Nimrod, cu aparentemente tabata mata bestia i kisas tambe hende djis pa smak.—Génesis 10:9.

Jesus a conta di Dios su preocupacion pa bestia cu e palabranan aki: “Ta bende cincu mofi pa dos moneda di poco balor, no ta berdad? Tog Dios no ta lubidá ningun di nan.” (Lucas 12:6) Tambe, ora el a dicidí pa no destruí un stad yen di practicante di maldad mas, pasobra nan a repentí, Dios mes a bisa: “Mi no mester sinti duele p’e gran stad di Nínive, habitá pa mas cu shentibinti mil hende . . ., ademas di hopi animal doméstico?” (Jónas 4:11) Ta bisto cu e no ta mira bestia como algu cu nos por djis deshací di dje na nos antoho.

Ora Dios a duna e israelitanan ley, el a siña nan con pa cuida animal debidamente. El a rekerí pa nan debolbé animalnan perdí na nan doño i pa yuda animal cu ta den pertá. (Exodo 23:4, 5) Animalnan mester a beneficiá dje descanso di sabat, mescos cu hende. (Exodo 23:12) Tabatin ley cu a mustra con mester a trata animal cu ta traha den cunucu. (Deuteronomio 22:10; 25:4) Ta bisto cu hende mester a cuida i soru pa bestia, no explotá nan.

Proverbionan 12:10 ta declará Dios su punto di bista explícitamente: “E hustu ta percurá pa e alma di su animal doméstico, pero e misericordianan dje malbadonan ta cruel.” Un comentario bíblico ta traducí e versículo aki como lo siguiente: “Un homber hustu ta extendé su bondad asta na bestia sin sintí, pero un homber malbado ta cruel, asta ora e ta kere cu e ta masha suave.”—Believer’s Bible Commentary, di William MacDonald.

E homber hustu ta trata bestia cu bondad i ta busca pa haña sa nan necesidadnan. Un persona malbado por bisa cu e ta stima bestia, pero lo mihó cu su “misericordianan” por ta, ta crueldad. Su accionnan ta revelá su motibunan egoista. Ki cierto esaki ta di esnan cu ta pone bestia bringa contra otro pa gana cen!

Alivio pa Animalnan

Ta cierto cu Dios su propósito original tabata pa hende “tene dominio riba piscá di laman i riba criatura bulador di shelu i riba tur criatura bibiente cu ta move riba tera.” (Génesis 1:28) No tin lugá pa crueldad contra animal den e propósito ei. E trato inhumano di animal lo no sigui pa semper. Nos tin motibu pa kere cu Dios lo caba cu tur sufrimentu innecesario. Pero con?

E ta primintí di eliminá hende malbado i cruel. (Proverbionan 2:22) Relacioná cu animal, Oséas 2:18 ta bisa: “Siguramente lo mi cera un pacto e dia ei en coneccion cu e bestia salbahe dje campo i cu e criatura bulador di shelu i cu e cos cu ta lastra riba suela, . . .i lo mi haci nan cai drumi den siguridad.” Esta dushi lo ta pa biba den e tempu ei, ora condicionnan pacífico lo beneficiá no solamente hende recto, sino animal tambe!

[Plachi na página 10]

“Corida di Toro den un Pueblo,” di Francisco Goya