Testigunan di Yehova A Kambia Beibel pa E Kuadra ku Nan Kreensianan?
Nò, nos no a kambi’é. Loke sí nos ta hasi ta kambia nos kreensianan ora nos ripará ku nan no ta kuadra kompletamente ku Beibel.
Nos a kuminsá investigá loke tin den Beibel hopi tempu promé ku a produsí e Tradukshon di Mundu Nobo, na ingles, na 1950. Promé ku 1950, nos a usa kualke tradukshon di Beibel ku tabata disponibel i asina nos a yega na loke nos ta kere aden. Laga nos wak algun di e kreensianan ku Testigunan di Yehova tin pa hopi tempu. Ora bo lesa nan, bo por mira pa bo mes si nan ta kuadra ku loke Beibel ta siña.
Loke nos ta kere: Dios no ta parti di un Trinidat. E revista Zion’s Watch Tower di yüli 1882 a bisa: “Nos lektornan sa ku nos ta kere den Yehova, Hesus i spiritu santu. Pero nos no ta kere ku e siñansa di Trinidat, esta, ku nan ta tres Dios den un persona, ta bíbliko.”
Loke Beibel ta bisa: “Yehova nos Dios ta un Yehova.” (Deuteronomio 6:4, The Holy Bible, di Robert Young) “Tòg pa nos tin ún Dios so, e Tata, for di Kende tur kos ta bin, i nos ta eksistí p’E; i ún Señor, Jesu-Cristo, pa medio di Kende tur kos ta eksistí, i nos ta eksistí pa medio di djE.” (1 Korintionan 8:6, Beibel Santu) Hesus mes a bisa: “E Tata ta mas ku Mi.”—Huan 14:28, Beibel Santu.
Loke nos ta kere: Hende no ta kima pa semper den fièrnu. Título di un artíkulo den Zion’s Watch Tower di yüni 1882 tabata: “E Pago di Piká Ta Morto.” E título ei tabata basá riba Romanonan 6:23 di e tradukshon di King James. E artíkulo a bisa: “E título ei ta kla i simpel. Maske hopi hende ta kere ku Beibel ta Palabra di Dios, tòg ta straño ku nan ta pensa i asta kere ku Beibel ta siña ku e pago di piká ta ku hende ta bai kima pa semper den fièrnu.”
Loke Beibel ta bisa: “E alma ku peka lo muri.” (Ezekiel 18:4, Beibel Santu) E kastigu final pa hende ku ta bai kontra Dios no ta pa kima pa semper den fièrnu. Mas bien, nan fin lo ta “destrukshon eterno.”—2 Tesalonisensenan 1:9, Beibel na papiamentu koriente.
Loke nos ta kere: E Reino di Dios ta un gobièrnu real. E revista Zion’s Watch Tower di desèmber 1881 a papia di e Reino di Dios. E revista a bisa: “Ora ku e Reino di Dios kuminsá goberná, lo e pone un fin na tur e gobièrnunan riba tera.”
Loke Beibel ta bisa: “Ma den e tempu di e reinan ei, Dios di shelu lo establesé un reino ku lo no kaba nunka te den eternidat. Nunka lo e no bai bou di dominio di ningun nashon. Lo e destruí tur e reinonan anterior, kaba ku nan, pero e reino ei mes lo keda pa semper.”—Dánièl 2:44, Beibel na papiamentu koriente.
Testigunan di Yehova mester di Tradukshon di Mundu Nobo pa splika nan kreensianan?
Nò, nos ta usa otro tradukshon di Beibel tambe den nos trabou di prediká. Ora un persona aseptá un kurso di Beibel serka nos, e por usa otro tradukshon di Beibel òf nos por dun’é un Tradukshon di Mundu Nobo grátis, si e ta deseá esei.