Dikon Testigunan di Yehova Ta Keda Neutral den Asuntunan Polítiko?
Testigunan di Yehova ta keda neutral den asuntunan polítiko pa motibunan religioso, ku ta basá riba loke Beibel ta siña. Nos no ta buska manera pa influensiá asuntunan polítiko, ni vota pa un partido òf kandidato polítiko. Tampoko nos no ta kore kampaña pa haña puesto polítiko, ni tuma parti den ningun akshon pa kambia gobièrnu. Nos ta kere ku Beibel ta duna nos motibunan sólido pa hasi esei.
Nos ta sigui e ehèmpel di Hesus, kende a nenga di aseptá un puesto polítiko. (Huan 6:15) El a siña su disipelnan pa nan “no ta parti di mundu” i a laga nan sa bon kla ku nan no mester tuma parti den asuntunan polítiko.—Huan 17:14, 16; 18:36; Marko 12:13-17.
Nos ta leal na e Reino di Dios ku Hesus a papia di dje ora el a bisa: “Rònt mundu, hende lo prediká bon notisia tokante e Reino.” (Mateo 24:14) Komo representantenan di e Reino di Dios, nos a ser enkargá pa proklamá su binida. P’esei, nos ta keda neutral den asuntunan polítiko di tur pais, inkluyendo esun kaminda nos ta biba.—2 Korintionan 5:20; Efesionan 6:20.
Dor di keda neutral, nos por papia libremente ku hende di tur konvikshon polítiko tokante e bon notisia di e Reino di Dios. Nos ta purba di mustra ku nos palabra- i akshonnan ku nos ta dependé riba e Reino di Dios pa solushoná e problemanan di mundu.—Salmo 56:11.
Komo ku nos ta evitá di mete den polítika, nos hermandat internashonal ta keda uní. (Kolosensenan 3:14; 1 Pedro 2:17) Na kontraste, religionnan ku sí ta mete den asuntunan polítiko ta trese divishon entre nan miembronan.—1 Korintionan 1:10.
Rèspèt pa Gobièrnu. Aunke nos no ta tuma parti den polítika, nos ta respetá e outoridat di e gobièrnu kaminda nos ta biba. Esaki ta na armonia ku e mandamentu di Beibel ku ta bisa: “Laga tur alma ta sumiso na outoridatnan superior.” (Romanonan 13:1) Nos ta obedesé lei di e pais, paga belasting i kooperá ku e esfuersonan ku gobièrnu ta hasi pa pèrkurá pa e bienestar di su siudadanonan. En bes di tuma parti den kualke intento pa bai kontra gobièrnu, nos ta sigui e konseho di Beibel pa hasi orashon pa “reinan i tur esnan ku ta den puesto haltu,” spesialmente ora nan ta tumando desishonnan ku por afektá libertat di adorashon.—1 Timoteo 2:1, 2, nota.
Tambe nos ta respetá e derecho ku otro hende tin pa tuma nan mes desishon den asuntunan polítiko. Por ehèmpel, nos no ta stroba elekshon ni esnan ku ta skohe pa bai vota.
Neutralidat den asuntunan polítiko ta algu nobo? Nò. E apòstelnan i e otro kristiannan di promé siglo a tuma e mesun posishon. E buki Beyond Good Intentions ta bisa: “Aunke e promé kristiannan tabata kere ku nan tabatin e obligashon di obedesé gobièrnu, nan no a kere sí den tuma parti den asuntunan polítiko.” Tambe, e buki On the Road to Civilization ta bisa ku e promé kristiannan “lo no a okupá puestonan polítiko.”
Nos posishon neutral den asuntunan polítiko ta un menasa pa e siguridat nashonal? Nò. Nos ta siudadanonan ku stima pas i p’esei gobièrnunan no mester tin miedu di nos. Wak loke e Akademia Nashonal di Siensia di Ukrania a publiká den un rapòrt na 2001. Papiando tokante nos neutralidat den asuntunan polítiko, e rapòrt a bisa: “Awendia kisas algun hende no ta gusta e posishon akí di Testigunan di Yehova, i esei tabata e motibu prinsipal di e akusashonnan kontra nan tempu ku e gobièrnu Nazi i tambe e régimen Komunista tabata na mando.” Asta bou di e dominio soviétiko, Testigunan di Yehova “no a stòp di ta siudadanonan ku ta kumpli ku lei. Nan a traha den forma onesto, i sin wak nan mes interes, den kunukunan kolektivo i den fábrikanan. Nan no tabata un menasa pa e régimen Komunista.” E rapòrt a konkluí bisando ku, awe tampoko e kreensia- i práktikanan di Testigunan di Yehova “ta un menasa pa e siguridat i integridat di kualke pais.”