Rui Almeida Fotografia/Moment via Getty Images
SIGUI VIGILÁ!
Violensia Polítiko—Kiko Beibel Ta Bisa?
Rònt mundu, tin masha hopi kaso di violensia polítiko ta tumando lugá.
Dikon tin asina tantu violensia polítiko? E violensia ei lo kaba un dia? Kiko Beibel ta bisa?
Beibel a bisa di antemano ku hende lo ta dividí pa motibu di polítika
Beibel ta yama nos tempu “e último dianan.” I Beibel a pronostiká ku den e tempu ei hopi hende lo tin sierto aktitut ku ta fomentá violensia i desakuerdo.
Beibel ta bisa ku ‘den e último dianan lo bini tempunan krítiko, difísil pa trata kuné. Pasobra hende lo ta malagradesí, desleal; nan lo no ta dispuesto pa sera ningun akuerdo; nan lo ta feros, traidor, kabesura, hinchá di orguyo.’—2 Timoteo 3:1-4.
Beibel a bisa tambe di antemano ku disturbio manera “rebelion” kontra gobièrnu i intrankilidat polítiko lo ta un rasgo di e periodo akí ku nos ta den. (Lúkas 21:9, Beibel na papiamentu koriente) Sinembargo, violensia i divishon pa motibu di polítika lo no dura pa semper.
Fin di violensia polítiko
Beibel ta bisa ku Dios lo trese su propio gobièrnu ku el a establesé den shelu. E gobièrnu ei lo remplasá tur gobièrnu humano.
“Dios di shelu lo lanta un reino ku . . . lo destruí i pone un fin na tur [otro reino], i e reino akí so lo keda pa semper.”—Dánièl 2:44.
E Reino di Dios lo trese berdadero union entre hende, i e Reino lo sòru pa rònt mundu tin pas.
Hesukristu ta e gobernante di e Reino ei, i e ta ser yamá “Prens di Pas.” Hesukristu lo sòru pa “no tin fin na pas.”—Isaías 9:6, 7.
For di awor, e hendenan ku ta bou di gobernashon di e Reino ei ta siña kon pa biba na pas ku otro. Beibel ta bisa ku komo resultado di esei: “Nan lo bati nan spadanan i traha plug ku nan; ku nan spernan, nan lo traha kuchú pa snui mata. Nashon lo no hisa spada pa bringa kontra otro nashon, ni nan lo no siña pa bringa den guera mas.”—Isaías 2:3, 4.
Si bo ke sa mas, lesa e artíkulo “Kiko e Reino di Dios Lo Hasi?” i wak e vidio Kiko e Reino di Dios Ta?