Preokupashon mundial tokante e efekto ku ret sosial tin riba e hóbennan

Durante aña 2025, gobièrnu rònt mundu a ekspresá preokupashon tokante e efekto ku ret sosial tin riba e hóbennan. Un pais a prohibí hóbennan bou di 16 aña di usa ret sosial i tin otro pais ta pensando pa tuma medidanan similar.

Loke ta interesante ta ku asta algun tiner ta mira e posibel efekto negativo ku ret sosial por tin riba nan. Un enkuesta ku Pew Research Center a hasi na Merka, i publiká na aprel 2025, a mustra ku “kasi mitar di e tinernan (48%) a bisa ku mayoria di biaha [ret sosial] tin un efekto negativo riba e hóbennan di nan edat.”

Ekspertonan di salubridat ta spièrta hende di e efekto ku ret sosial tin riba salú mental di e hóbennan. Aña pasá, Dr. Vivek Murthy, kende tabata hefe di e departamento di salubridat na Merka a bisa: “E krísis di salú mental entre e hóbennan ta serio—i ret sosial ta kontribuí grandemente na esei.”

Kon mayornan por protehá nan yunan di e peligernan di ret sosial? Beibel tin bon konseho.

Loke mayornan por hasi

Wak e prinsipionan di Beibel akí.

“Un persona sabí ta pensa bon promé ku e dal un paso.”—Proverbionan 14:15.

Mirando e peligernan di ret sosial, no sinti bo obligá pa laga bo yu usa ret sosial. Promé ku bo permití bo yu usa ret sosial, hasi sigur ku e ta sufisiente madurá pa e tene su mes na e límite di tempu, ku e ta skohe bon amigu i ku e ta evitá kosnan inapropiá riba ret sosial.

Pa haña sa mas, lesa e artíkulonan: “¿Deberían mis hijos usar redes sociales?” i “Enséñele a su hijo adolescente a usar con seguridad las redes sociales.”

‘Usa boso tempu di e mihó manera.’—Efesionan 5:16.

Si bo permití bo yu usa ret sosial, pone regla i splik’é dikon e reglanan aki ta importante i ta un protekshon p’e. Sea alerta pa kualke kambio den bo yu su komportashon ku por indiká ku bo tin ku restringí su akseso na ret sosial.

Hasi uso di e pintamentu riba bòrchi Usa Ret Sosial na un Manera Sabí pa yuda bo yu komprondé dikon e tin ku pone límite.

Pa mas sugerensia basá riba Beibel pa mayornan, wak e artíkulo: “Un Funshonario Haltu di Salubridat Ta Spièrta Hende Ku Ret Sosial Por Tin un Efekto Negativo Riba Hóben—Kiko Beibel Ta Bisa?”

Haña sa mas

Beibel ta bisa ku nos ta bibando den “tempunan krítiko, difísil pa trata kuné.” (2 Timoteo 3:1-5) Pero na mes momento, e ta duna nos bon konseho kon pa dil ku e tempunan akí. Pa haña un lista di mas ku 20 konseho práktiko basá riba Beibel pa mayornan i nan yunan wak e artíkulo “Mas i Mas Tiner Ta Haña Problema ku Nan Salú Mental—Kiko Beibel Ta Bisa?”