Informe di Proclamadornan di Reino
“Un Porta Grandi Cu Ta Hiba na Actividad A Habri” na Cuba
APOSTEL Pablo tabata un predicador sobresaliente dje bon nobo dje Reino di Dios. El a usa tur oportunidad pa compartí cu otro hende e promesanan dje Creador di bida eterno pa humanidad obediente. Miéntras e tabata di bishita na Efeso di antigwedad, Pablo a reconocé un situacion nobo cu lo a permitié yuda asta mas tantu hende. El a bisa: “Mi ta keda na Efeso . . . , pasobra un porta grandi cu ta hiba na actividad a habri pa mi.”—1 Corintionan 16:8, 9.
Testigonan di Jehova na Cuba tambe ta haña nan den un situacion nobo. Aunke ainda nan no ta oficialmente registrá, e Testigonan awor por compartí nan speransa basá riba Bijbel abiertamente cu nan paisanonan. Recientemente e gobiernu di Cuba a expresá interes sincero pa permití vários grupo religioso funcioná libremente. Presidente Castro públicamente a mencioná Testigonan di Jehova como un grupo religioso cu cua e gobiernu cubano awor ta disfrutá di un mihó relacion.
E situacion nobo aki a habri p’e Testigonan “un porta grandi cu ta hiba na actividad.” Por ehempel, Testigonan di Jehova recientemente a habri un oficina na Cuba, locual ta yuda nan coordiná nan trabou di predicacion den e pais ei. Mas cu 65.000 Testigo ta yudando hende pa studia i comprendé e Bijbel. Nan ta usa literatura bíblico, manera e revistanan E Toren di Vigilancia i Spierta! Hopi cubano incliná na husticia ta beneficiando di studia Bijbel cu Testigonan di Jehova.
Tambe e Testigonan ta teniendo reunionnan regular den gruponan chikitu na tur parti dje isla. Tin biaha nan ta disfrutá asta dje privilegio di tene asambleanan mas grandi den gruponan di alrededor di 150 persona. Nan berdaderamente ta apreciá e permit cu nan a ricibí di autoridadnan cubano, locual ta duna nan e oportunidad di reuní cu nan rumannan spiritual, cantando alabansa na Dios i haciendo oracion huntu.
Recientemente nan a tene e Congreso di Districto “Temor Piadoso” mas cu 1.000 biaha den solamente tres fin di siman. Un informe ta bisa cu “ordu, disiplina i pas” tabata bisto na cada congreso. E autoridadnan a felicitá e Testigonan riba e punto aki.
Mundialmente, cristiannan berdadero ta haci esfuerso pa cumpli cu e mandamentu cu Dios a duna nan di predicá e bon nobo dje Reino di Dios. Na mésun tempu, nan ta haci esfuerso pa mantené un relacion pacífico cu autoridadnan gubernamental. (Tito 3:1) Testigonan di Jehova ta sigui e conseho di apostel Pablo, kende a skirbi: “P’esei mi ta exhortá, na promé lugá, pa súplicanan, oracionnan, rogamentunan, ofrendanan di gradicimentu, ser hací en cuanto tur clase di hende, en cuanto reynan i tur esnan cu ta den puesto haltu; afin cu nos por sigui hiba un bida calmu i ketu cu pleno debocion piadoso i seriedad.”—1 Timoteo 2:1, 2.