Visualisá e Relatonan di Beibel

Den Beibel, nos ta haña vários relato ku a tuma lugá di bèrdat. Nos por siña hopi lès importante for di nan. Ora nos purba di visualisá un relato, nos por komprondé mihó loke nos ta lesando, i nos lo siña mas for di e relato. Ata algun kos ku bo por hasi ku por yuda bo visualisá e relatonan di Beibel mihó.

• Lesa na bos haltu. Ora bo ta lesa Beibel na bos haltu, esei por yuda bo visualisá mihó loke ta pasando den e relato. Ora boso ta lesa Beibel huntu komo famia, boso por asigná kada persona un personahe ku tin den e relato i lesa loke e personahe ta bisa. Asina, e relato ta bira aun mas bibu.

• Purba di imaginá loke ta pasando den e relato. Purba di saka afó kiko e personahenan den e relato lo a pensa òf sinti. Por ehèmpel, bo por puntra bo mes: ‘Dikon e persona akí a bisa loke el a bisa òf hasi loke el a hasi? Si ami tabata den e situashon ei, kiko lo mi a pensa òf sinti?’

• Pinta òf hasi un schets. Ora bo pinta loke ta pasando den un relato, esei por yuda bo visualisá i keda kòrda e relato mihó. No preokupá si bo ta pinta bon òf nò.