Papia Tokante e Bèrdat na un Manera Agradabel

1. Kiko nos mester hasi pa nos por ta parti di Yehova su famia?

ORA nos topa un ruman pa promé biaha, hopi bes nos ta puntra otro: “Kon bo a haña e bèrdat?” Algun di nos ta kontestá ku nos a “lanta den e bèrdat.” Otro ruman kisas ta kontestá ku ta resientemente nan “a drenta e bèrdat.” E kontestanan akí ta mustra bon kla ku e bèrdat ta un parti importante di nos bida. Dikon? Pasobra pa nos por ta parti di Yehova su famia, nos mester stima e bèrdat i biba di akuerdo ku e bèrdat ei. Esei ta enserá tambe ser onesto den loke nos ta bisa i den loke nos ta hasi.—Sal. 15:​1-3.

2. (a) Ki reputashon Hesus tabatin? (b) Kon hende lo a reakshoná riba e bèrdatnan ku Hesus tabata siña nan?

² Hesus semper tabata onesto. Maske Hesus su enemigunan no a gusta loke Hesus tabata bisa, nan a rekonosé ku tur loke el a bisa ta bèrdat. (Mat. 22:16) Hesus a bisa kon hende lo a reakshoná riba e bèrdatnan ku e tabata siña nan. El a bisa: “Mi a bini pa kousa desunion: Pa mi motibu, lo tin desunion entre un yu hòmber i su tata, entre un yu muhé i su mama i entre nuera i suegra.” (Mat. 10:35) Hesus no tabata ke pa hende reakshoná na un manera negativo riba e mensahe ku e i su siguidónan tabata prediká, pero e tabata realístiko. (Mat. 23:37) E tabata sa ku su mensahe lo a dividí mundu den dos grupo: hende ku ta stima e bèrdat i hende ku no ta stima e bèrdat.—2 Tes. 2:​9-11.

3. Kiko nos lo trata den e artíkulo akí?

³ Meskos ku Hesus, nos ta hasi esfuerso pa ta onesto, i pa papia bèrdat na tur momento, asta si esei ta pone ku hende no ta gusta nos. Ademas, nos ta prediká i siña hende e bèrdat di Beibel, maske tin hende ku no ta gusta esei. Akaso esei ta nifiká ku ora nos ta onesto ku hende, nos no mester wòri ku e manera ku nos ta papia ku hende òf e momento ku nos ta hasi esei? Niun ora so! E promé pregunta ku nos lo trata den e artíkulo akí ta: Unda nos por haña e bèrdat? Despues nos lo trata: Dikon, kon, i ki ora nos mester papia tokante e bèrdat? E kontesta pa e preguntanan ei lo yuda nos ora di prediká i ora nos tin ku papia bèrdat. Nan lo yuda nos pa semper papia na un manera agradabel, esta, ku takto i na e momento apropiá.

UNDA NOS POR HAÑA E BÈRDAT?

4. Dikon nos por bisa ku Yehova ta e Fuente di bèrdat?

⁴ Yehova ta e Fuente di bèrdat i tur loke e bisa ta bèrdat. Por ehèmpel, loke el a bisa nos tokante kiko ta bon i kiko ta malu ta bèrdat. (Sal. 19:9; 119:​142, 151) Tur loke e ta bisa tokante futuro ta kumpli sigur. (Isa. 55:​10, 11) Nunka e no ta keda sin kumpli ku su promesanan. (Num. 23:19) De echo, ta imposibel pa Yehova gaña! (Heb. 6:18) Ku bon motibu, Beibel ta yama Yehova e “Dios di bèrdat.”—Sal. 31:5.

5. Dikon no ta difísil pa nos haña e “Dios di bèrdat”? Splika. (Echonan 17:27)

⁵ No ta difísil pa nos haña Yehova, e “Dios di bèrdat,” maske algun hende ta bisa ku ta asina. Tur rònt di nos tin hopi evidensia ku Dios ta eksistí. (Rom. 1:20) Den un kòmbersashon ku Apòstel Pablo tabatin na Aténas ku algun hende griego bon studiá, el a bisa ku Dios ke pa nos “hañ’é” i ku Dios “no ta masha leu for di kada un di nos.” (Lesa Echonan 17:27.) De echo, Yehova ta hala hende humilde ku ta buskando e bèrdat serka dje.—Huan 6:44.

6. (a) Menshoná algun bèrdat ku tin den Beibel. (b) Kon bo ta sinti bo awor ku bo sa e bèrdatnan ei?

⁶ Un di e maneranan ku nos por haña Yehova ta studiando Beibel. E hòmbernan ku a skirbi Beibel a ser inspirá ku yudansa di Dios su spiritu santu. (2 Ped. 1:​20, 21) Pues, tur loke tin skirbí den Beibel ta bèrdat i nos por konfia tur loke tin dje. Por ehèmpel, nos por konfia loke e ta bisa tokante kon nos universo a yega na eksistensia i kon bida riba tera a kuminsá. (Gén. 1:​1, 26) Ademas, nos por konfia tambe loke Beibel ta splika tokante dikon nos tur ta peka i kon bini tin morto i sufrimentu. (Rom. 5:12; 6:23) Tambe nos por tin tur konfiansa den Beibel ora e ta bisa ku Yehova, pa medio di su Yu, lo kaba ku tur e daño ku Satanas, e “tata di mentira,” a kousa. (Huan 8:44; Rom. 16:20) Anto nos por konfia e promesanan den Beibel ku ta mustra ku Hesus lo kaba ku hende malbado, lanta hende for di morto, hasi e tera un paradeis i yuda nos bira perfekto. (Huan 11:​25, 26; 1 Huan 3:8) Yehova a duna nos un bunita privilegio: El a siña nos e bèrdat, i el a duna nos e oportunidat di siña otro hende e bèrdatnan ei.—Mat. 28:​19, 20.

DIKON NOS TA PAPIA LOKE TA BÈRDAT?

7-8. Dikon nos motivashon pa bisa algu ku ta bèrdat ta importante pa Yehova? Duna un ehèmpel. (Marko 3:​11, 12) (Wak e plachinan.)

⁷ Manera a ser menshoná mas ariba, pa nos por ta parti di Yehova su famia, nos mester ta onesto. Pero, si nos ke hasi Yehova kontentu, nos mester hasi mas ku djis papia bèrdat. Pa Yehova, e motibu, esta, dikon nos ta onesto, ta importante. Laga nos wak kiko a pasa tempu ku Hesus tabata riba tera. (Lesa Marko 3:​11, 12.) Ora Hesus tabata prediká serka di Laman di Galilea, un multitut grandi a rondon’é. Entre nan tabatin algun hende poseí pa demoño ku a kai abou na suela dilanti di Hesus i nan a grita: “Abo ta Yu di Dios!” Dikon e demoñonan a bisa algu tokante Hesus ku ta bèrdat? Kisas nan tabata ke gana konfiansa di e hendenan ku tabata skucha nan, pa despues nan stroba e hendenan ei di sirbi Yehova. Loke e demoñonan ei a bisa e momento ei tabata bèrdat, pero nan motivashon tabata egoista. Pero Hesus tabata sa kiko tabata nan motivashon, i e no tabata niun tiki kontentu ku nan. Hesus a asta bisa e demoñonan pa no laga hende sa ken e ta.

⁸ Ki lès nos por siña for di e relato akí? Asta ora nos ta papia loke ta bèrdat, nos motivashon pa hasi esei ta importante pa Yehova. P’esei, ora di siña otro hende tokante e bèrdatnan di Beibel, nos mester hasi esei motivá pa amor pa Yehova. Anto si hende ta purba di elogiá nos pa e mensahe ku nos ta prediká, nos ta dirigí e elogio ei na Yehova.—Mat. 5:16; kompará ku Echonan 14:​12-15.

9. Kiko nos mester evitá di hasi, i dikon?

⁹ Laga nos wak un otro situashon den kua nos motivashon pa papia algu ku ta bèrdat ta importante. Suponé ku un ruman hòmber ku responsabilidat den e organisashon konfia nos ku un asuntu konfidensial i nos ta papia tokante e asuntu ku otro hende. Si despues e hendenan ei haña sa ku loke nos a konta nan ta bèrdat, kisas nan por keda impreshoná ku loke nos sa i kuminsá asumí ku nos sa hopi informashon konfidensial. Esei por pone nan pensa ku nos ta masha importante, pero Yehova sí lo no keda kontentu ku nos. (Pro. 11:13) Dikon nò? Pasobra maske loke nos a bisa ta bèrdat, nos no tabatin e derecho pa konta otro hende e informashon ei. Ademas, nos no tabatin e motivashon korekto ora nos a konta e informashon ei.

KON NOS MESTER PAPIA LOKE TA BÈRDAT?

10. Ki ora nos palabranan ta “agradabel”? (Kolosensenan 4:6)

¹⁰ Lesa Kolosensenan 4:6. Apòstel Pablo a kòrda e rumannan ku tabata biba na Kolósas ku nan palabranan ‘semper mester ta agradabel.’ Kiko e tabata ke men? Den e idioma original, e ekspreshon ku Pablo a usa ta transmití e idea ku loke nos ta bisa mester benefisiá nos oyentenan, i tambe mester ta amabel i dushi pa skucha.

11-12. Dikon nos mester wak bon kon nos ta siña hende e bèrdat? Duna un ehèmpel. (Wak e plachinan.)

¹¹ Pa nos palabranan ta agradabel ora di siña otro hende e bèrdat, nos mester sigui Pablo su konseho. Beibel mes ta kompará e bèrdatnan ku e ta kontené ku un spada skèrpi ku por separá alma for di spiritu. Ku otro palabra, e bèrdatnan ei por saka na kla un hende su berdadero sintimentunan i motivashonnan. (Heb. 4:12) Pero si nos no ta usa Beibel ábilmente, nos lo por ofendé un hende i kousa konflikto innesesariamente. Kon asina?

¹² Pensa riba e ehèmpel akí. Den sirbishi, nos ta topa un hende hòmber ku sinseramente ta hasi orashon regularmente na imágen i ku ta gusta selebrá Pasku di Nasementu i Pasku di Resurekshon huntu ku su famia. Nos lo por usa Beibel pa mustra e hòmber ku no tin sentido pa un hende resa na imágen sin bida i mustr’é ku Pasku di Nasementu i Pasku di Resurekshon ta selebrashonnan pagano. (Isa. 44:​14-20; 2 Kor. 6:​14-17) Pero, kiko lo por pasa si nos hasi esei durante nos promé kòmbersashon? Maske loke nos a bisa ta bèrdat, ta klaru ku nos lo no ta usando Dios su Palabra ábilmente.

13. Kon nos palabranan por ta bon sasoná?

¹³ Pablo a bisa tambe ku nos palabranan mester ta mes dushi ku un kuminda bon sasoná. Pero e no tabata ke men ku nos mester kambia òf skonde e bèrdat. Na lugá di esei, e ta animá nos pa usa palabranan ku ta “sasoná,” den e sentido ku nos ta presentá e bèrdat na un manera agradabel pa hende ku nos ta papia kuné. (Yòb 12:11) Tin biaha esei por ta un reto. Den kaso di kuminda literal, tin biaha nos por pensa ku tur hende ke nan kuminda sasoná manera nos ta gusta. Di mes manera, nos por pensa ku tur hende ta gusta e manera ku nos ta papia. Pero esei no ta asina. Por ehèmpel, hende di sierto kultura tin e kustumber di ekspresá nan opinion na un manera direkto, asta ora nan ta papia ku hende mas grandi ku nan. Di otro banda, hende di otro kultura por haña e manera di komuniká ei inaseptabel òf asta ofensivo. Pablo a bisa ku nos mester sa “kon pa kontestá kada persona.” Esaki ta enserá ku nos mester sasoná nos palabranan, no di akuerdo ku nos gustu òf nos kultura, pero mas bien na un manera ku ta agradabel pa nos oyentenan.

KI ORA NOS MESTER PAPIA LOKE TA BÈRDAT?

14. Hesus a siña su disipelnan tur loke e tabata sa tempu ku e tabata riba tera? Splika.

¹⁴ Hesus semper a papia na un manera agradabel ku su siguidónan, i ku amor el a siña nan hopi kos. (Mar. 6:34) E no a purba di siña nan tur loke e tabata sa. Mas bien, el a tene kuenta ku nan limitashonnan. E tabata sa ku ainda no tabata tempu pa nan siña algun di e bèrdatnan di e Skritura. De echo, el a bisa nan ku tin sierto kos ku nan lo no por a komprondé ainda. (Huan 16:12) Kiko esei ta siña nos?

15. Nos mester siña nos studiantenan di Beibel tur loke nos sa den un solo biaha? Splika. (Proverbionan 25:11) (Wak e plachi.)

¹⁵ Hesus su ehèmpel ta mustra nos ku no ta pasobra nos sa e bèrdat nos tin ku siña un persona tur loke nos sa den un solo biaha. Kon nos por imitá Hesus su ehèmpel? Nos mester tene kuenta ku sirkunstansia di hende. Pensa atrobe riba e hòmber ku ta gusta selebrá Pasku di Nasementu i Pasku di Resurekshon huntu ku su famia. Nos sa ku e selebrashonnan ei ta di orígen pagano i ku Dios no ta aprobá nan. Pero imaginá ku bo a kuminsá studia Beibel ku e hòmber ei un òf dos siman promé ku Pasku. Nos lo ta papiando na un manera agradabel si nos mustr’é kiko Beibel ta bisa tokante selebrashon pagano i ferwagt ku e ta stòp di selebrá Pasku mesora? Ta bèrdat ku tin studiante ku ta apliká loke nan ta siña for di Beibel masha lihé. Pero, otro studiante kisas lo por tuma mas tempu pa kambia nan manera di pensa i pa apliká loke nan a siña. Nos por yuda nos studiantenan di Beibel progresá si nos siña nan loke nan mester sa na e momento korekto, esta, ora ku nan ta kla pa komprondé esei.—Lesa Proverbionan 25:11.

16. Kon nos por yuda nos studiantenan di Beibel “sigui kana den e bèrdat”?

¹⁶ Yuda otro hende siña e bèrdat tokante Yehova ta un di e kosnan ku ta hasi nos masha felis. Nos por yuda nos studiantenan di Beibel “sigui kana den e bèrdat” si nos sigui pone un bon ehèmpel pa nan. (3 Huan 3, 4) Hasi sigur ku bo manera di biba ta demostrá ku bo ta kere den e promesanan ku tin den e Palabra di Dios. Tambe, papia bèrdat ku e motivashon korekto. I ora di siña hende e bèrdat, usa palabranan amabel, bondadoso i suave. Anto siña hende e bèrdat na e momento korekto i dirigí tur elogio na Yehova. Si bo hasi e kosnan ei, lo bo demostrá ku bo ta parti di e famia di Yehova, e Dios di bèrdat.