Un Karta di Kuerpo Gobernante

Kerido Kompañeronan Testigu di Yehova,

Rumannan stimá ta un goso pa skirbi boso! Nos tin e mesun sintimentu ku apòstel Juan, kende a bisa ku e tabata ‘stima su rumannan den fe di bèrdat’ i a alegrá ku nan tabata “kana den bèrdat.” (2 Juan 1, 4) E bèrdat ta un bendishon pa nos tur! El a librá nos di Babilonia e Grandi i su doktrina- i tradishonnan ku ta desonrá Dios. Tambe e bèrdat a hasi nos personanan amoroso, bondadoso i miserikòrdioso. Ademas, e bèrdat a habri kaminda pa nos por tin un posishon limpi dilanti di Dios i tambe e speransa di biba pa semper.

Tambe nos ta masha gradisidu ku nos tin Yehova su spiritu santu ku ta guia nos i fortalesé nos tur dia. Nos tin sigur ku boso a disfrutá di e diferente aspektonan di e provishon amoroso akí di Yehova ku a ser tratá resientemente na e Kongreso di Distrito “Sigui e Guia di Dios Su Spiritu Santu.” Miéntras e situashon mundial ta sigui empeorá, ta masha importante pa nos konfia den Yehova su poderoso spiritu santu pa guia nos durante e tempu difísil ku lo bini.

Den e Anuario tin relatonan emoshonante di nos rumannan ku a pasa den asina tantu sufrimentu pa motibu di nan fe. Nos tin sigur ku e relatonan akí a konmové boso. I ta remarkabel ku hopi di e personanan fiel akí a batisá djis promé ku e difikultatnan a kuminsá i asta tin algun ku no tabata ni batisá ainda. Nos ta stima nan pa nan lealtat i pa e echo ku nan a sufri pa motibu di hustisia! En realidat, nan ekselente ehèmpel ta fortalesé nos determinashon pa keda leal na e Reino pase loke pase.—1 Tes. 1:​6-⁠8.

Nos sa, rumannan stimá, ku tin hopi problema tantu ekonómiko komo den otro aspekto di bida ku boso tin ku lucha kuné pa boso por keda huntu komo famia i sigui stima otro. Pa algun di boso ta un desafio pa prediká i asistí fielmente na e reunionnan riba un base regular. P’e motibu ei, despues di a papia hopi riba e asuntu i hasi hopi orashon, nos a hasi algun ahuste den e reunionnan di kongregashon ku a drenta na vigor 1 di yanüari 2009. Nos tin sigur ku boso lo probechá di e kambio akí i dediká mas tempu na boso estudio personal i estudio di famia.

Tabata un berdadero goso pa mira ku asina hopi persona a kualifiká pa batisá durante asamblea- i kongresonan di e aña akí. Tin di nan ta bastante yòn. Mayornan, boso meresé elogio pa e echo ku boso a yuda boso yunan lanta ku apresio pa e bèrdat i a animá nan pa dediká nan mes na Yehova na yòn. Apesar di tantísimo desafio ku e hóbennan ei ta enfrentá na skol, tòg nan a logra yega na boutismo. Esei ta mustra bon kla ku nan a haña un bon entrenamentu na kas.—Sal. 128:​1-⁠6.

I nos no kier a pasa por haltu di e echo ku tabatin un oumento den e kantidat di estudio di Beibel, i esei ta meresé elogio. Nos misionero- i pioneronan spesial a hunga un papel importante den e oumento akí. Kada un di nos di e Kuerpo Gobernante ta apresiá mashá e ròl importante ku nos rumannan rònt mundu ta hunga den bisa “bin” na hende sinsero, invitando tur esnan ku tin set pa “tuma e awa di bida pòrnada.” (Rev. 22:⁠17) Aña pasá 289.678 persona a simbolisá nan dedikashon mediante boutismo bou di awa. Nos kier a duna nan un kaluroso bon biní den nos hermandat mundial!

Ta masha importante pa nos keda kòrda e palabranan di apòstel Juan, kende a skirbi: “Mundu ta pasa bai i su deseonan tambe, ma esun ku hasi e boluntat di Dios ta permanesé pa semper.” (1 Juan 2:⁠17) Pronto e mundu akí lo “pasa bai”! Pues, ta sabí di nos parti pa pone hasimentu di e boluntat di Dios na promé lugá den nos bida i “sea alerta.” (Mat. 24:⁠42) Nos lo no lamentá si nos hasi esei, i komo resultado nos lo kosechá e benefisionan di Yehova su bondat inmeresí.—Isa. 63:⁠7.

Nos ta spera ku e relatonan konmovedor di e diferente paisnan ku tin den e Anuario nobo lo animá kada un di boso pa pone interesnan di Reino na promé lugá den boso bida. Boso por tin sigur ku boso ta den nos mente i nos orashonnan tur ora bai i ku nos ta stima boso hopi. Ku Yehova bendishoná boso rikamente.

Boso rumannan,

Kuerpo Gobernante di Testigunan di Yehova