“Kon Mi Por . . . si un Hende No Guia Mi?”
1 Ora Felipe, e evangelisadó, a puntra e eunuko etiopio si el a komprondé loke e tabata lesa den e Palabra di Dios, e hòmber a kontestá: “Kon mi por komprondé, si un hende no guia mi?” Gustosamente Felipe a yud’é komprondé e bon nobo tokante Hesus, loke a pone ku e hòmber a batisá mesora. (Echo. 8:26-38) Felipe a kumpli ku e asignashon ku Kristu a dun’é pa ‘hasi hende tur e nashonnan disipel di mi, i batisá nan i siña nan.’—Mat. 28:19, 20.
2 Nos tin ku kumpli ku e asignashon di hasi disipel, meskos ku Felipe. Sinembargo, e hendenan ku nos ta studia Beibel kuné hopi bes no ta hasi progreso spiritual rápido manera e eunuko etiopio. E hòmber ei, un prosélito hudiu vèrsá den e Skritura, tabatin un kurason reseptivo i e úniko kos ku e mester a hasi ta aseptá ku Hesus tabata e Mesias primintí. Pero ta un desafio si e hendenan ku nos ta studia kuné no konosé Beibel, a ser engañá pa siñansanan religioso falsu òf ta kargá ku problemanan personal kompliká. Kiko por yuda nos guia studiantenan di Beibel na dedikashon i boutismo?
3 Diserní e Nesesidatnan Spiritual di e Studiante: E suplemento di Nos Ministerio di Reino di ougùstùs 1998 a konsiderá kon largu nos por studia ku un hende, i a duna e instrukshon akí: “Ta nesesario pa determiná kon lihé e estudio tin ku bai di akuerdo ku e sirkunstansia i abilidat di e studiante. . . . Nos no kier stroba e studiante di haña un bon konosementu djis pa pasa lihé dor di e buki. Kada studiante tin mester di un base sólido pa su fe nobo den e Palabra di Dios.” P’esei, ta konsehabel pa no konsiderá e informashon den e buki Kiko Beibel Ta Siña Realmente? pura-pura djis pa purba kaba e buki. Segun ku bo ta kondusí e estudio tur siman, dediká e tempu ku ta nesesario pa yuda e studiante komprondé i aseptá loke e ta siña di e Palabra di Dios. Tuma tempu pa lesa i klarifiká hopi di e tekstonan menshoná.—Rom. 12:2.
4 Pero, kiko si boso terminá e buki Beibel Ta Siña i bo ripará ku e studiante mester di mas komprondementu di e bèrdat òf ku ainda e no ta totalmente motivá pa tuma un posishon na fabor di e bèrdat i dediká su bida na Dios? (1 Kor. 14:20) Kiko mas bo por hasi pa yud’é subi e kaminda ku ta hiba na bida?—Mat. 7:14.
5 Satisfasé e Nesesidatnan Spiritual di e Studiante: Si ta bisto ku un persona ta hasiendo progreso, ounke ta pokopoko, i e ta hañando apresio pa loke e ta siña, sigui ku e estudio di Beibel usando e buki Adorá e Úniko Dios Berdadero. E buki akí ta spesialmente pa yuda nan sigui progresá den e bèrdat i haña mas apresio pa Yehova i su organisashon.
6 Esaki ke men ku esnan ku ta resien batisá pero ku a studia ún buki so awor mester reanudá nan estudio den e di dos buki? No nesesariamente. Pero, podisé nan a bira inaktivo òf nan no a progresá den e bèrdat, i kisas nan ta sinti ku nan tin mester di yudansa personal pa yuda nan apliká e bèrdat mas mihó den nan bida. Mester konsultá ku un miembro di e komité di sirbishi promé ku bolbe kuminsá studia ku un publikadó batisá.
7 Ta un muestra di amor kristian ora nos ta duna atenshon personal na tur persona interesá ku nos ta studia kuné. Nos meta ta pa yuda e studiante haña un komprondementu mas profundo di e bèrdat di e Palabra di Dios. E ora ei e por tuma un posishon firme na fabor di e bèrdat basá riba konosementu i dediká su bida na Yehova, simbolisando su dedikashon mediante boutismo bou di awa.—Sal. 40:8; Efe. 3:17-19.
8 Bo ta kòrda kiko a sosodé despues ku e eunuko etiopio a batisá? El “a sigui su kaminda, regosihando” komo un disipel nobo di Hesukristu. (Echo. 8:39, 40) Ohalá nos i esnan ku nos logra guia den e kaminda di e bèrdat haña gran goso den sirbi Yehova Dios, awor i pa semper!