Kaha di Pregunta

◼ Ta apropiá pa e ouditorio bati man despues di kada parti den e Skol di Ministerio Teokrátiko i Reunion di Sirbishi?

Ora e Kreador, Yehova, a funda tera, “e streanan di mardugá tabata kanta huntu, i tur e yu hòmbernan di Dios tabata grita di alegria.” (Jòb 38:7) E yunan angelikal aki di Dios a deseá di alabá Yehova pa su trabou sobresaliente di kreashon, ku tabata un manera nobo den kua el a mustra su sabiduria, bondat i poder.

Ta bon pa nos ekspresá apresio di kurason pa e esfuerso di nos rumannan i pa e informashon ku nan presentá. Por ehèmpel, normalmente nos ta bati man despues di diskursonan i presentashonnan na reunionnan spesial, manera asamblea i kongreso. Ta rekerí tempu i esfuerso adishonal pa prepará e partinan aki. I ora nos bati man, nos ta mustra apresio no solamente pa e trabou duru di e oradó sino tambe pa e instrukshon ku Yehova ta duna nos mediante su Palabra i su organisashon.—Isa. 48:17; Mat. 24:45-47.

Kiko di bati man pa partinan presentá durante Skol di Ministerio Teokrátiko i Reunion di Sirbishi? No tin regla ku ta prohibí batimentu di man si e sosodé na un manera spontáneo, manera despues ku un studiante kaba di duna su promé parti. Sin embargo, ta masha fásil pa batimentu di man bira un kos rutinario i pèrdè su efekto. P’esei, normalmente nos no ta bati man pa kada presentashon.

Ounke por lo general nos no ta bati man pa un parti den e Skol di Ministerio Teokrátiko i Reunion di Sirbishi, tin otro maneranan ku nos tur por ekspresá apresio pa e instrukshon i esfuerso di esnan ku a duna e partinan. Nos por mustra apresio dor di keda alerta i presta bon atenshon ora e oradó ta papia. I despues di reunion, hopi bes ta posibel pa nos ekspresá apresio personalmente pa nan esfuerso.—Efe. 1:15, 16.