Bo Por Haña Rikesa!
1 Bo ke haña mas goso i satisfakshon den bo bida? Bo gusta yuda otro hende? Bo ta deseá di hasi mas den Yehova su sirbishi? Si bo kontesta riba un di e preguntanan aki ta sí, e ora ei lo bo por konsiderá e trabou di pionero regular. Ta klaru ku e sirbishi di pionero no ta pa tur hende. Nos mester tene kuenta ku famia i otro responsabilidatnan bíbliko, i tambe ku nos salú i limitashon físiko.
2 Loke Salomon a skirbi bou di inspirashon divino ta konektá e bendishon di Yehova ku rikesa material. (Pro. 10:22) Awendia, Yehova ta bendishoná hende prinsipalmente ku rikesa spiritual. Pioneronan regular ta haña e tipo di rikesa ei na abundansia. Por ehèmpel, pioneronan ta eksperensiá e felisidat adishonal ku ta bini di duna na otro hende miéntras nan ta ‘kumpra e tempu oportuno’ for di kosnan personal. (Kol. 4:5, NW; Echo. 20:35) Yehova no ta pasa por haltu di e trabou ku nan ta hasi i e ta apresiá e amor ku nan ta desplegá. Rikesanan asina, esta, ‘tesoronan den shelu’ nunka no ta pèrdè balor. (Mat. 6:20; Heb. 6:10) Ademas, segun ku e pioneronan ta mantené un ‘wowo simpel’ i ta konfia ku Yehova ta perkurá pa nan nesesidatnan, nan relashon kuné ta bira mas fuerte.—Mat. 6:22, 25, 32; Heb. 13:5, 6.
3 Hende ku ta buska manera pa bira riku hopi bes ta haña nan ku “hopi deseonan loko i dañino.” (1 Tim. 6:9, 10; Sant. 5:1-3) Nunka esei ta e kaso ku e bendishon di Yehova. Loke ta yuda pioneronan regular mantené nan balansa spiritual i enfoká riba e kosnan mas importante ta e echo ku nan ta pasa un gran parti di nan tempu den sirbishi. (Fil. 1:10, NW) Un ruman hòmber a laga su trabou di ingeniero ku tabata kita tur su tempu for di dje p’e traha pionero. El a bisa: “Mi trabou tabata kousa hopi strès. Pero e trabou di pionero si nò. Awor mi por yuda hende i siña nan e bèrdat. E trabou aki ta hopi mas interesante i satisfaktorio.”
4 Un Bendishon pa Otro Hende: Awendia, tur hende ta enfrentá “tempunan trabahoso.” (2 Tim. 3:1) Tur kaminda hende desesperadamente tin mester di speransa. Proklamadónan di Reino ta alegrá pa mira personalmente kon e ekspreshon riba kara di hende desesperá por kambia bira ekspreshon di optimismo segun ku nan ta reakshoná faborabel na e bon nobo. Esta un gran goso esei ta pa pioneronan regular ku ta dediká mas ku 800 ora tur aña na e trabou di salba bida!—1 Tim. 4:16.
5 Bo a yega di pensa seriamente pa sirbi komo pionero regular? Kisas esei ke men ku bo tin ku “hasi bon uso di bo tempu,” es desir, kita tempu for di kosnan ménos importante. (Efe. 5:15, 16) Hopi ruman a hasi esei i a simplifiká nan bida. Debí na esei, nan no mester traha asina hopi mas pa gana nan pan di kada dia, i por dediká mas ora na interesnan di Reino. Abo por regla bo asuntunan di tal manera pa bo traha huntu ku nan?
6 Pidi Yehova sabiduria pa bo traha un schedule práktiko. (Sant. 1:5) Ki bendishon bo por spera di haña? Rikesa spiritual na abundansia! Tambe Yehova lo bendishoná bo materialmente ku loke bo tin mester. (Mat. 6:33) Esnan ku pone Yehova na prueba den e aspekto aki lo risibí ‘asina tantu bendishon, ku nan lo no tin sufisiente lugá pa konten’é.’—Mal. 3:10.
[Study Questions]
1. Dikon lo ta bon pa konsiderá e trabou di pionero regular?
2. Menshoná algun di e rikesanan spiritual ku pioneronan regular ta haña.
3. Ki diferensia tin entre buska rikesa spiritual i rikesa material?
4. Ki bendishon pioneronan regular ta risibí miéntras nan ta un bendishon pa otro hende?
5, 6. Kiko por yuda bo bira un pionero regular?