Un Bishita Histórico Ta Haci un Isla Alegrá

Recientemente Cuba, un bunita isla den Caribe, a experenciá un temporada di refrescamentu spiritual sin precedente. Clausura di aña 1998 a trece un bendicion tan sperá pa Testigonan di Jehova cu ta biba n’e pais antiano ei. Pa promé bes den mas cu 30 aña, miembronan dje Cuerpo Gobernante di Testigonan di Jehova a haci Cuba un bishita, i nan tabata compañá pa 15 otro delegado. E bishitantenan tabata cuidadanonan di Australia, Austria, Bélgica, Gran Bretania, Italia, Nueva Zelandia i Puerto Rico.

ESAKI tabata un evento histórico pa e 82.258 publicadónan di Reino dje pais ei i e 87.890 personanan cu a djoin nan den celebracion dje Cena di Señor den primavera di 1998.

For di 1 te cu 7 di december 1998, Lloyd Barry, John Barr i Gerrit Lösch a bishitá e Cas di Betel na Havana i nan a asistí na algun Congreso di Distrito “Dios Su Caminda di Bida” tené na Cuba. Nan tabata contentu cu nan por a topa cu superintendentenan biahero i cera conocí mihó cu funcionarionan público di Cuba.

“Pa mi cu mi casá, esaki tabata un dje momentonan teocrático di mas sobresaliente di nos bida,” John Barr a bisa. “Nos kerido rumannan na Cuba tin asina tantu celo p’e berdad! Mi a sali for di einan cu e sintimentu cu nos hermandad mundial ta realmente precioso!” “E siman memorabel aki a yuda mi comprendé e situacion di nos rumannan einan mihó,” Lloyd Barry a agregá.

Durante e último cincu añanan, Testigonan di Jehova a haña mas libertad di adoracion na Cuba, i segun loke autoridadnan cubano a bisa, ta parce cu nan ta deseá p’e tendencia aki continuá.

Na september 1994, a instalá un imprenta n’e Cas di Betel na Havana. Testigonan di Jehova por reuní libremente atrobe i nan por duna testimonio di cas pa cas. Despues, na 1998, autoridadnan a duna permit pa e bishita di un delegacion internacional cu a consistí di 18 Testigo di Jehova, incluso tres miembro dje Cuerpo Gobernante.

Un Reencuentro Felis

Ora e delegacion a yega n’e aeropuerto José Martí na Havana, nan a ser ricibí hospitalariamente dor di un grupo inesperá di funcionarionan público i un grupo for di Cas di Betel. Entre e últimonan aki tabatin un ruman homber cu tabata corda e último bishita na Cuba di un miembro dje Cuerpo Gobernante, Milton Henschel, na 1961. E tempu ei, e ruman tabatin 12 aña di edad; awor e ta un superintendente biahero.

Ora e delegadonan a yega n’e Cas di Betel, nan a ser saludá cu bukètnan di gladiola, rosa, hasmin i margarita geel i corá, cu un ruman a cultivá specialmente p’e ocasion aki. Miéntras e famia di Betel tabata yama e delegacion bon biní, lágrimanan tabata basha. Despues nan a disfrutá di un plato di porco cubano na grill, aros cu bonchi, salada, yuca cu mojo (un saus trahá di konofló i zeta di olijfi), i fruta frescu. Despues dje cuminda tur miembro dje Cuerpo Gobernante a duna un discurso edificante tocante con balioso e sirbishi di Betel ta. Foral e comentarionan di Ruman Lösch tabata conmovedor, pasobra el a papia cu e rumannan na spañó. E famia di Betel ta consistí di 48 boluntario di tempu completo i 18 yudante part-time.

Aunke nan ta imprimí buki i Bijbel na Italia p’e rumannan na Cuba, den e pais mes nan ta producí e revistanan E Toren di Vigilancia i Spierta! na pretu cu blancu. Nan ta usa dos stencil mashin. Pa producí tur e revistanan necesario, nan mester traha oranan extra i haci trabounan manual ripititivo den espacionan hopi chikitu. E boluntarionan ta balorá nan tesoro di sirbishi na Jehova den un manera masha special.—2 Corintionan 4:7.

Puntonan Sobresaliente di Congreso

E delegacion di 18 miembro a parti den tres grupo pa nan asistí na congresonan di distrito tené na 3 sitio: Havana, Camagüey i Holguín. Riba cada un dje tres dianan, a invitá un grupo grandi di ruman, incluso hopi anciano i pionero, pa asistí na cada sitio. Nan a bisa e Testigonan local cu esaki lo bai ta un ocasion special, pero nan no tabata sa cu miembronan dje Cuerpo Gobernante lo tabata presente. Imaginá bo nan sorpresa ora nan a mira e kerido rumannan aki i nan esposa baha for dje busnan di huur diabierne mainta!

A tene e congresonan den facilidadnan den aire liber cu e rumannan a construí cu permit di autoridadnan. N’e sitio di congreso na Havana, tabatin e cita “Salmo 133:1” grabá riba un dje piedranan na entrada. Esaki a recordá e rumannan loke e palabranan dje texto ta bisa: “Mira! Ki bon i ki agradabel ta pa rumannan biba huntu den unidad!” Sí, durante e congreso tabatin un compañerismo cristian bon i agradabel n’e localidad ei.

E bishitantenan a comentá riba e manera excelente cu a trece e discurso i entrevistanan padilanti. Tambe nan a keda impresioná cu e presentacion dje drama, cu tabata basá riba e relato bíblico di Daniel capítulo 3, den Babilonia di antigwedad. Un ruman muher a comentá: “Tur e actornan tabata magnífico, i e sincronisacion di bos tabata asina bon, cu bo no tabata ripará mes cu e zonido ta grabá di antemano. . . . E babilonio malbado a parce malbado di berdad, i e tres hebreonan tabata firme i decididu.”

Representantenan dje Oficina di Asuntunan Religioso i otro funcionarionan di gobierno cu a bin wak e congresonan, a encomendá e rumannan pa e bon organisacion i conducta excelente. Ruman Barry a expresá su gradicimentu sincero p’e trato excelente cu autoridadnan cubano a duna e delegadonan bishitante. Hopi bes e rumannan a lanta para i aplaudí pa vários minuut, expresando asina nan aprecio p’e discursonan i tambe p’e echo cu autoridadnan a permití e congresonan tuma lugá. “Esaki ta mas cu nos a verwagt. E ta manera un congreso internacional chikitu!” un famia cristian a bisa. “E tabata maraviyoso, pasobra el a duna evidencia di Jehova su gran poder pa pone su promesanan bira realidad.”

Tambe e congresonan tabata un oportunidad pa otronan siña conocé Testigonan mihó. Un dje shofernan di bus a asistí n’e congreso riba diasabra i diadomingo. El a bisa cu el a tende hopi cos tocante Testigonan di Jehova, pero cu awor el a haña sa cu nan ta hende pacífico i bon.

“Cosnan cu Nos Lo No Lubidá Nunca”

E calor i amabilidad dje pueblo di Cuba a impresioná e delegadonan. Cubano ta hende trahadó, cariñoso i di principio. “Mas cu un bes, hende totalmente desconocí a ofrecé pa yuda nos,” un delegado a bisa.

E delegadonan tabata profundamente impresioná dor dje fe, felicidad i amor cu nan compañeronan Testigo na Cuba ta desplegá. Tabatin obstáculonan inmenso, pero nan a haci Jehova nan fortalesa. (Salmo 91:2) John Barr a bisa: “Mi promé bishita na Cuba tabatin masha hopi sorpresa agradabel mes pa mi—e bunitesa dje pais, e caracter placentero dje hendenan cu mi a topa, pero esun di mas grandi tabata e entusiasmo total dje Testigonan cubano. Nunca di mi bida mi no a tende hende canta nos canticanan di Reino cu asina tantu sintimentu, ni aplaudí asina largu ora asuntunan spiritual toca nan curason! Eseinan ta cosnan cu nos lo no lubidá nunca. Semper nos lo keda corda nan cu cariño.”

Salmo 97:1 ta bisa: “Laga e hopi islanan alegrá.” Sí, Testigonan di Jehova n’e isla di Cuba ta alegrá debí cu nan a haña mas libertad pa adorá Dios, i pa motibu dje bishita histórico dje delegacion internacional aki.

[Plachi na página 8]

Na Cuba, hopi famia a asistí n’e Congresonan di Distrito special “Dios Su Caminda di Bida”

[Plachi na página 8]

Na 1994, a bolbe habri e Cas di Betel na Cuba

[Plachi na página 8]

Miembronan dje Cuerpo Gobernante ta firma Bijbelnan di regalo pa funcionarionan público