E Berdad Ta Transformá Bida

TA TRISTU pero berdad cu awe e bida di asina hopi hende ta difícil, asta desesperante. Ta posibel pa hende asina haña felicidad? Algun ta criminal cu ta haci nan próhimo nan víctima. Nan lo por bira miembronan onrado di sociedad un dia? E contesta pa tur e dos preguntanan aki ta sí. Hende por cambia. Bida por ser transformá. Apostel Pablo a mustra con ora el a skirbi: “Sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.”—Romanonan 12:2.

Tal bes mencion di e “perfecto boluntad di Dios” ta poné bo corda loke Jesus a bisa su disipelnan mas cu 20 aña promé cu Pablo a skirbi e palabranan ariba. Jesus di: “Beso lo conocé e berdad, i e berdad lo haci boso liber.” (Juan 8:32) Cu “e berdad,” Jesus tabata kiermen e informacion inspirá dor di Dios—specialmente e informacion relacioná cu e boluntad di Dios—cu ta conserbá pa nos den Bijbel. (Juan 17:17) Berdad bíblico realmente ta haci hende liber? Biba na armonia cu e boluntad di Dios realmente ta transformá bida? Sigur cu sí. Considerá un par di ehempel.

Un Propósito den Bida

No hopi tempu pasá, Moisés, na Gibráltar, tabata un homber masha infelis. E ta bisa: “Mi tabata un buraché i a drumi riba caya. Mi a sintí mi perdí. Tur anochi mi a pidi Dios pa tene piedad di mi i no lagá mi soportá un dia mas. Na yoramentu mi tabata puntra Dios pakico mi tabata den e mundu aki si tog mi no a sirbi pa nada, tabata sin trabou, sin famia, i sin ni un hende pa yudá mi. Pakico mi mester sigui biba?” Ante, algu a sosodé.

Moisés ta sigui conta: “Mi tabata sa cu Dios a tende mi oracion ora mi a topa Roberto, un Testigo di Jehova. Roberto a duná mi un Bijbel i un ehemplar dje foyeto pa yuda studia Bijbel: Kico Dios Ta Rekerí di Nos?a Tur dia nos tabata studia Bijbel huntu riba e banki caminda mi tabata drumi anochi. Despues di un luna Roberto a hibá mi reunion n’e Salon di Reino local di Testigonan di Jehova. Pronto, berdad bíblico a cambia mi concepto di bida completamente. Mi no ta drumi pafó riba caya mas; ni mi no ta bebe ni huma. Mi bida a cambia, i mi ta felis. Mi ta spera di bautisá pronto i sirbi Jehova como un di su Testigonan.”

Ki un transformacion! Hopi bes ora hende ta sin speransa, ta pasobra nan falta conocimentu. Nan no sa di Dios ni di su propósitonan maraviyoso. Den e caso di Moisés, ora el a adkerí e conocimentu ei, esei a dun’é e fortalesa i curashi pa cambia su estilo di bida. E salmista su oracion na Dios a ser contestá den Moisés su caso: “Manda bo lus i bo berdad. Cu esakinan mes guiá mi. Cu nan hibá mi na bo ceru santu i na bo magnífico tabernáculo.”—Salmo 43:3.

Na Belize, Daniel tabatin un experencia similar. Daniel no tabata drumi riba caya—e tabatin un trabou prestigioso. Pero pa 20 aña largu el a lucha contra adiccion na droga i alcohol i a hiba un bida inmoral. Aunke el a lanta católico, Daniel no por a mira ningun propósito den bida, i e tabata duda cu Dios ta existí. El a bai diferente iglesia en busca di yudansa, pero a ripará cu hopi di su amigunan baidó di misa, i asta algun di su amigunan miembro di clero, a usa droga of tabata bebe di mas. Miéntras tantu, su esposa tabata a punto di divorciá di dje.

Desesperá, Daniel mes a drenta un centro di rehabilitacion. Pero tog, e tabata sa cu asina cu e sali, lo e bai bek n’e droga atrobe, si e no haña yudansa. Pero ki clase di yudansa? Na mei 1996, dos dia despues cu el a sali for dje centro di rehabilitacion, Daniel a acercá un Testigo di Jehova i a sorprend’é cu e ruego: “Studia Bijbel cu mi, por fabor.” E Testigo a haci areglo pa studia Bijbel cu Daniel dos bes pa siman, i pronto Daniel a cuminsá ahustá su bida conforme e boluntad di Dios i a reemplasá su amigunan di ántes cu amigunan cristian cu no a usa droga ni bebe di mas i cu a evitá inmoralidad. Asina Daniel a descubrí cu loke Bijbel ta bisa ta cierto: “Esun cu ta cana cu hende sabí lo bira sabí, pero esun cu tin trato cu hende estúpido lo bai malu cuné.” (Proverbionan 13:20) Pronto, el a bisa: “Esaki ta promé bes den mi bida cu mi sa kico kier men tin un concenshi limpi.” Daniel su bida tambe a ser transformá.

Na Puerto Rico, un otro homber a experenciá un transformacion notabel. E tabata den prizon i a ser considerá como masha peligroso, ya cu el a mata vários hende. Berdad di Bijbel lo por cambi’é? Sí. Un Testigo di Jehova a logra dun’é algun ehemplar dje revistanan Toren di Vigilancia i Spierta!, i unbes el a pidi pa mas. A cuminsá un studio di Bijbel cuné, i segun cu berdad bíblico a cuminsá afectá su curason, e cambionan cu el a haci a bira bisto pa tur hende. Un dje promé evidencianan cu el a cambia tabata cu el a pela su cabei corticu i a feita su barba descuidá.

Bijbel ta bisa cu Dios ta pordoná pecadónan cu di berdad ta repentí i ta cambia nan estilo di bida. Pablo a skirbi: “Boso no sa cu personanan inhustu lo no heredá e reino di Dios? . . . I tog esei ta loke algun di boso tabata. Pero boso a ser labá limpi.” (1 Corintionan 6:9, 11) Sin duda, e palabranan aki a consolá e homber aki, i tambe e palabranan di Echonan 24:15: “Lo bai tin un resureccion di tantu e hustunan como e inhustunan.” El a bisa: Mi kier t’ei ora e resureccion dje mortonan turna lugá pa asina mi por pidi e personanan cu mi a mata pordon.”

Un Famia Nobo

Un dia Luis, un evangelisadó di tempu completo di Testigonan di Jehova na Argentina, a cera conocí cu un yoncuman cu tabatin un antecedente tristu. Dor cu su mayornan a bandon’é ora el a nace, el a lanta den vários institucion. Ora e tabatin rond di 20 aña di edad, el a haña sa unda su mama ta i a dicidí di bai biba den su becindario. El a traha duru, a spar hopi placa i a biaha bai n’e stad caminda su mama tabata. Su mama a lagu’é keda cerca dje te ora cu e yoncuman su placa a caba, i e ora ei a pidié pa bai. E rechaso aki a pone cu e kier a mata su curpa.

Sin embargo, Luis a logra compartí e berdad bíblico cu e yoncuman aki. E berdad ei ta encerá entre otro e siguransa aki: “Den caso cu mi mes tata i mi mes mama bandoná mi, asta Jehova mes lo ricibí mi.” (Salmo 27:10) E yoncuman a descubrí cu e tabatin un Tata celestial cu nunca lo bandon’é. Awor e ta felis di ta parti di un famia nobo, e famia di Jehova.

Un otro homber den e mésun pais a bisa un Testigo di Jehova cu e gusta e revista Toren di Vigiiancia. Di con? Pasobra e revista a salba su matrimonio. Parce cu un dia ora e homber aki tabata saliendo di trabou, el a mira den co’i sushi un revista Toren di Vigilancia cu e título “Divorcio” skirbí cu letter grandi. Siendo cu su matrimonio tabata den problema i e cu su esposa a cuminsá haci trámitenan pa un separacion legal, el a saca e revista i a cuminsá les’é. El a bai cas cuné i a les’é huntu cu su esposa. E pareha a purba aplicá e conseho bíblico cu tabatin den e revista. (Efesionan 5:21-6:4) Pronto, nan relacion a mehorá. Nan a para e trámitenan di separacion i awor ta studiando Bijbel como un pareha casá uní.

Na Uruguay, un otro homber cu yama Luis tabata leu di ta felis. Adiccion na droga, spiritismo, adoracion di imágen, bebementu di mas—esakinan tabata algun dje cosnan cu a haci su bida un desaster. Finalmente, Luis, completamente frustrá, a bira ateista. Un amigu a dun’é e buki La vida... ¿cómo se presentó aquí? ¿Por evolución, o por creación?b Esaki a resultá den contacto breve cu Testigonan di Jehova, pero djis despues Luis a bolbe bek na su alcohol i droga. Ora, den un momento di gran angustia, el a hañ’é sintá den un buracu yen di sushi, el a resa, haciendo oracion na “e tata di Jesucristo,” ya cu e no tabata sigur cua tabata Dios su nomber.

El a pidi Dios mustr’é si tabatin un motibu pakico e tabata na mundu. Luis ta conta: “Su siguiente dia mes un conocí a duná mi un buki cu e no tabatin mester mas. Su título? Revelacion—su gran culminacion ta cerca!”c E buki a yud’é contestá su pregunta. Luis a bolbe haci oracion pidiendo yudansa pa haña e religion cu lo mustr’é con pa sirbi Dios. Ki un sorpresa! Bel di porta a ring, i pafó tabatin dos Testigo di Jehova pará. Mesora Luis a cuminsá studia Bijbel cu nan. El a progresá lihé i awor ta sintié bendicioná di ta un Testigo bautisá. E ta hiba un bida limpi i ta yuda otronan tambe haña un propósito den nan bida. P’e, e palabranan di Salmo 65:2 a resultá di ta cierto: “O Tendedor di oracion, hende di tur carni lo acudí asta na bo.”

Na Filipínas, Allan tabata un tempu un alumno activista. El a pertenecé na un organisacion cua su propósito tabata “pa baha gobiernu pa asina futuro generacionnan por disfrutá di igualdad.” Sin embargo, un dia Testigonan di Jehova a papia cuné i el a siña for di Bijbel Dios su propósito pa humanidad. E propósito ei ta encerá entre otro e promesa inspirá: “Solamente un poco tempu mas, i e malbado lo no t’ei mas . . . Pero e mansunan mes lo poseé e tera, i berdaderamente nan lo haña nan deleite exkisito den e abundancia di pas.” (Salmo 37:10, 11) Allan a bisa: “Pronto mi a descubrí cu loke nos movementu tabata lucha p’e, a ser primintí hopi tempu pasá den Bijbel. Tur e cosnan cu nos a deseá asina fervientemente lo ser otorgá bou dje Reino di Dios.” Awor Allan ta apoyá e Reino di Dios i ta yuda otronan haña fe den e berdad di Bijbel.

Sí, bidanan ta ser transformá ora hende obedecé e berdad dje Palabra di Dios, e Bijbel. En berdad, e tempu ta bini ora cu tur hende cu keda na bida lo a armonisá nan bida cu Dios su boluntad. Ki un transformacion esei lo ta! E ora ei e profecia lo cumpli: “Nan lo no haci ningun daño ni causa ningun ruina den tur mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes.”—Isaías 11:9.

[Nota]