INFORME DI PROCLAMADOR DI REINO

Berdad bíblico ta uni un famía

AWE, den hopi parti di mundo, unidad di famía casi no ta existi mas. Pero, e Bijbel ta revela e secreto di unidad di famía. Considera e palabra di Jesús: “Ken cu ta tende e palabra aki di mi i ta cumpli cu nan lo ser mescos cu hende sabí, cu ta traha nan cas riba barranca.” (Mateo 7:24) Miles di famía di Testigo di Jehova a alcanza tal unidad aplicando e palabra ei i usando e Bijbel como un fundeshi pa edificacion di un famía uní. Otronan també ta alcanzando tal unidad, manera e sigiente experencia ta mustra.

Ora Daniel tabata den e sirbishi militar den Francia, un capelán militar a duna e sugerencia na Daniel di cumpra un Bijbel, locual el a haci, i a cuminza lezé cu regularidad. Despues e tabata mandá na Tahiti. Algun soldad compañé di Daniel tabata adventista, i otronan tabata mormón. Hopi bez nan conbersacion tabata riba e tópico di religion. Un dia e sergeant principal a introduci Daniel na su esposa, cu tabata un Testigo di Jehova. El a pasa henter un atardi contestando e cantidad di pregunta cu Daniel tabatin i a poné na contacto cu un congregacion local di Testigo di Jehova na Tahiti. Pronto el a cuminza un estudio bíblico regular.

E mayornan di Daniel bibando den Francia tabata católico mashá sincero. Su tata tabata consehero di alumno i tabata responsabel pa instruccion religioso den un scol católico. Daniel kier a comparti cu su mayornan e comprendimento spiritual precioso cu e tabata siña, i el a cuminza inclui algun siñanza bíblico den carta cu el a skirbi na nan.

Na principio e mama di Daniel a keda encantá, pero despues el a recibi un golpi pa mira e nomber Jehova den un carta di su yiu. Un poco dia despues, el a tende un programa di radio cu a presenta Testigo di Jehova como un “secta peligroso.” El a skirbi Daniel, pidiendo pe kibra tur contacto cu Testigo di Jehova un bez. Pero, Daniel tabata haci progreso den su estudio dje Bijbel i pronto a haci arreglo pa bandona e sirbishi militar i bolbe na Francia.

Asina cu el a yega cas atrobé, Daniel a dedica tur anochi​—⁠aveces te laat​—⁠den conbersacion bíblico largu cu su mama. Finalmente el a conbini pa bai na Salón di Reino cu Daniel. Ora el a asisti na su promé reunion, el a keda asina impresioná cu e mes a acepta un estudio bíblico. El a haci progreso rápido i pronto a bautiza.

E tata di Daniel tabata un homber tolerante pero tabata mashá dedicá na su actividad profesional i religioso. Sin embargo, na un ocasion el a hiba su esposa i Daniel na un asamblea di districto den su auto. Esei tabata dia 14 di Juli, i e tabatin idea di wak e parada dje Dia di Bastille den e stad. Mientras cu el a spera el a decidi, pa caweta, pa tira un bista den e salón di asamblea. El a keda impresioná cu e ordu i paz cu el a mira den e pueblo di Jehova Dios, i mientras cu el a pasa door di varios departamento dje asamblea tur hende a sigi yamé “ruman.” El a lubida totalmente tocante e parada di Dia di Bastille i a keda te na fin dje asamblea. El a pidi un estudio bíblico i a haci progreso rápido siñando e berdad. Pero, mientras mas el a siña, mas nervioso el a bira den su trabao, pues na edad di 58, el a bandona su trabao. Awor tur tres miembro dje famía ta dedicá i bautizá i ta sirbi Jehova Dios unidamente.

Berdad bíblico ta loke a uni e famía di Daniel. E també por uni otro famía si nan ta siña i ta apliqué cu tur nan curazón.