Kico A Pasa cu Integridad?

UN POCO mas cu shen aña pasá, Barney Barnato, un speculadó di prijs di diamanta, a regresá Inglatera for di Sur Africa. Na su yegada el a expresá su desacuerdo pa cu un relato di corant skirbí tocante dje. P’esei el a duna e redactor algun nota skirbí na man pa un di dos artículo, “djis pa corigí algun punto,” huntu cu un chek pa un suma grandi di placa.

E redactor, J. K. Jerome, a tira e notanan den co’i sushi i a entregá e chek bek. Sorprendí, mesora Barnato a dobel su oferta. Esei tambe a ser rechasá. “Cuantu placa bo kier?” el a puntra. Recordando e incidente, Jerome ta bisa: “Mi a splik’é cu placa no ta yuda—no na Londen.” Su integridad editorial siguramente no tabata na benta.

“Integridad” a ser definí como “rectitud moral; onestidad.” Un persona di integridad ta digno di confiansa. Pero awe, falta di rectitud—un falta di integridad—ta afectando hende negativamente den tur profesion of posicion social.

Na Gran Bretania, medionan di comunicacion a popularisá e palabra “sleaze” (fofo) pa describí e pérdida di integridad moral. Manera e corant The Independent a pon’é, falta di integridad moral ta afectá “tur cos for di afèr amoroso i lobimentu di gobiernu cu meta pa saca probecho, te na pagamentu di fabor riba lotenan grandi di exportacion.” Ningun área di bida ta sali liber.

Normanan di Integridad cu Ta Tambaleá

Naturalmente, integridad no ta nificá perfeccion, pero sí e ta reflehá un cualidad básico den un persona. Den nos mundu di bira-ricu-lihé, hende por mira integridad como un strobansa, no un birtud. Por ehempel, uso di aparatonan sofisticá di parti di studiantenan pa ‘spiek’ den examen ta aumentando, i e artefactonan nobo aki ta casi imposibel pa detectá. Un profesor di universidad británico ta afirmá cu mas cu mitar di tur studiante británico a yega di spiek, i cu Gran Bretania siguramente no ta so den esaki.

Nos no por pasa por haltu dje daño cu hende inocente ta sufri ora individuonan cu no ta digno di confiansa ta papia mentira i engañá. Tuma por ehempel e caso dje pueblo indio di Bopal unda, na 1984, gas venenoso a mata mas cu 2.500 homber, muher i mucha i a heridá cientos di miles mas. The Sunday Times a informá: “Programanan di alivio pa yuda e víctimanan ta landa den lodo di corupcion. . . . E tarea di sefta casonan legítimo a ser complicá dor di miles di reclamonan falsu, documento i evidencianan falsificá.” Como resultado, dies aña despues apénas US$ 3.500.000 dje compensacion total pa daño i perhuicio di US$ 470.000.000 a ser distribuí na esnan den necesidad.

Kico di religion? Con ta pará cuné den e asuntu aki di integridad? Lamentablemente, e normanan hopi biaha no ta mas haltu cu esnan den e mundu seglar. Tuma por ehempel obispu católico romano, Eamon Casey, kende a confesá di ta tata di un yu ilegítimo, awor un tiener. E situacion di Casey, manera e corant británico Guardian a señalá, tabata “leu di ta único.” Den e mésun liña di pensamentu, The Times a informá: “E berdad tocante Obispu Casey su desonor no ta cu su malecho tabata excepcional, sino cu e acto di violá e voto di celibato no ta ni algu nobo ni algu straño.” Apoyando e opinion aki, The Glasgow Herald di Escocia, ta afirmá cu solamente 2 porciento di clero católico romano na Merca a evitá tantu relacionnan heterosexual como homosexual. Sea e cifra aki ta exacto of no, e ta duna un indicacion dje reputacion cu pastornan católico tin den e asuntu di moralidad.

Enfrentá cu ehempelnan asina, ta posibel pa un individuo mantené integridad moral? E ta bale la pena? Kico esei lo rekerí, i kico ta e recompensanan pa haci esei?