Libertad di Religion Sostené na Hapon

PA HOPI aña na Hapon, alumnonan hóben cu ta Testigo di Jehova a enfrentá un dilema: Nan mester sigui nan concenshi bíblicamente entrená, of nan mester aceptá un curículum di scol cu ta violá nan concenshi. Pakico e dilema? Pasobra ehercicionan di artenan marcial ta parti dje les di gimnastik na nan scolnan. E hóbennan Testigo a sinti cu ehercicionan asina no a armonisá cu principionan bíblico, manera esun hañá na Isaías capítulo 2, versículo 4. E texto aki ta bisa: “Nan lo tin cu bati nan spada na ploeg i nan lansa na sker di corta mata. Nacion lo no hisa spada contra nacion, ni nan lo no siña mas di guera.”

Dor cu nan no kier siña abilidadnan di guerero, locual ta enbolbé haci daño na un otro persona, hóbennan cristian Testigo a splica nan maestronan cu nan lo no por participá cu un bon concenshi den artenan marcial. Despues di a purba persuadí e alumnonan aki pa aceptá e scol su curículum, hopi maestro comprensivo cu tempu a bai di acuerdo pa respetá e concenshi dje alumnonan i percurá otro tipo di actividad di scol.

Sin embargo, algun maestro a bira agitá, i algun scol a nenga di duna Testigonan hóben punto pa gimnastik. Na 1993, nan a laga por lo ménos nuebe Testigo keda sinta i nan a ser forsá pa bandoná scol of a ser kitá pa motibu di no participá den artenan marcial.

Claramente, tabata tempu pa defendé e derecho di cristiannan hóben pa ricibí un educacion sin tin cu comprometé nan concenshi. Cincu alumno cu nan no a laga bai over p’e segundo grado na Kobe Municipal Industrial Technical College (yamá Kobe Tech pa mas corticu) a dicidí di tuma accion legal.

Kico Tabata den Wega?

Den e primavera di 1990 ora e cincu alumnonan a drenta Kobe Tech, nan a splica e maestronan cu nan lo no por participá den ehercicionan di kendo (arte hapones di bringa cu spada) debí na nan punto di bista basá riba Bijbel. E facultad di educacion físico tabata masha contra i a nenga nan cualkier medio alternativo pa haña punto pa gimnastik. Cu tempu, e alumnonan a haña mal punto pa e vak di gimnastik i como resultado tabatin cu ripití e prome grado (promé aña di scol avansá). Na april 1991 nan a entamá un caso na e Corte di Districto di Kobe, afirmando cu e accion dje scol a bai contra e garantia constitucional di libertad di religion.a

E scol a pretendé cu si e percurá actividadnan alternativo esei lo ta igual cu mustra fabor na un religion en particular i lo violá asina e neutralidad di educacion público. Ademas, nan a pretendé cu nan no tabatin ni e facilidadnan ni e personal pa percurá un programa alternativo pa gimnastik.

Decision dje Corte di Districto Ta Sagudí Esnan Informá

Miéntras e caso tabata dilanti, dos dje cincu alumnonan atrobe no a haña suficiente punto pa gimnastik, miéntras cu e tres otronan apénas a logra i a bai over n’e siguiente grado. E reglanan di scol a bisa cu alumnonan cu tabatin mal punto i cu a ripití e mésun grado pa dos aña consecutivo lo por ser kitá for di scol. Den bista di esaki, un dje dos alumnonan a dicidí di kita for di scol promé cu nan a kit’é, pero e otro, Kunihito Kobayashi, a nenga di kita. Pues nan a kit’é for di scol. Ta interesante cu Kunihito su averahe pa tur vak incluyendo gimnastik, pa cua el a haña un onvoldoende cu un scor di 48 punto, tabata 90,2 punto for di 100. E tabata e mihó di su klas di 42 alumno.

Dia 22 di februari, 1993, e Corte di Districto di Kobe a dicta fayo na fabor di Kobe Tech i a bisa: “E accionnan cu e scol a tuma no a violá e constitucion,” aunke el a admití cu “no por nenga cu e demandantenan su libertad di adoracion a ser restringí un poco dor cu e scol ta rekerí pa participá den ehercicionan di kendo.”

Mescos cu apostel Pablo den e promé siglo, e demandantenan a dicidí di apelá na autoridadnan legal mas haltu. (Echonan 25:11, 12) E caso a bai p’e Corte Superior di Osaka.

Actitud Inegoista dje Demandantenan

Un erudito renombrá, Profesor Tetsuo Shimomura di Universidad di Tsukuba, a bai di acuerdo pa testificá como un testigo experto den e Corte Superior di Osaka. Como un specialista den educacion i ley, el a enfatisá e falta di consideracion cu e scol a mustra den trata cu e alumnonan. Kunihito Kobayashi a expresá su sintimentunan den corte, i su actitud sincero a conmové curason di esnan presente den sala di corte. Ademas, dia 22 di februari, 1994, e Asociacion dje Colegio di Abogadonan di Kobe, declarando cu e scol su accionnan a violá e libertad di adoracion di Kunihito i su derecho pa ricibí un educacion, a recomendá p’e scol tum’é bek.

Segun cu e tempu a yega cerca pa dicta e decision na e Corte Superior di Osaka, tur e cristiannan hóben enbolbí tabata ansioso pa ta parti dje lucha te na su fin. Nan a sinti cu nan tabata bringando un bataya legal na fabor di miles di Testigo hóben cu ta enfrentá e mésun cuestion na scolnan den henter Hapon. Pero ya cu nan no a ser kitá for di scol, lo tabata masha probabel cu e corte lo no a trata nan caso. I nan por a mira cu si nan retirá nan demanda, loke lo a ser resaltá ta e scol su actitud irazonabel di kita Kunihito for di scol. Pues, tur e alumnonan cu excepcion di Kunihito a dicidí di para e caso.

Dia 22 di december, 1994, Hues Principal Reisuke Shimada dje Corte Superior di Osaka a dicta un sentencia cu a revocá e decision dje Corte di Districto di Kobe. E corte a haña cu Kunihito su motibu pa nenga ehercicionan di kendo tabata sincero i cu e desbentaha p’e pa su accion basá riba creencia religioso tabata extremadamente grandi. Segun Hues Principal Shimada, e scol mester a percurá actividadnan alternativo. Esnan interesá den derechonan humano a reaccioná faborabel n’e decision excelente aki. Sin embargo, e scol a apelá e caso n’e Corte Supremo di Hapon, privando Kunihito di educacion pa mas cu un aña atrobe.

N’e Corte Supremo

Un editorial den e corant Kobe Shimbun despues a declará: “E Hunta di Scol di Ciudad di Kobe i e scol mester a tuma Sr. Kobayashi bek na scol n’e punto ei [despues dje decision dje Corte Superior di Osaka]. . . . Nan actitud innecesariamente hostil a priva un homber di un periodo importante di su hubentud.” Apesar di esei, Kobe Tech a tuma un posicion fuerte den e caso aki. Como resultado, esei a bira un tópico di informenan di noticia rond Hapon. Maestronan i autoridadnan di scol den e henter e pais a tuma nota, i un decision dje corte di mas haltu den e pais lo para como un precedente legal mas fuerte pa casonan similar den futuro.

Dia 17 di januari, 1995, rond di un siman despues cu e scol a apelá e caso n’e Corte Supremo, e temblor di Kobe a dal Ciudad Ashiya caminda Kunihito i su famia tabata biba. Rond di mitar di seis e mainta ei, un par di minuut promé cu e temblor a dal e área, Kunihito, a sali cas pa bai su trabou ‘part-time.’ E tabata coriendo baiskel riba e caminda bou dje Hanshin Expressway, i ora e temblor a tuma lugá, net e tabata acercando e parti cu a basha abou. Inmediatamente el a bai cas bek i a topa e promé piso di su cas completamente destruí. Kunihito a mira cu fácilmente e por a perde su bida den e temblor i a gradicí Jehova pa a lagu’é sobrebibí. Si el a muri, ta probabel cu e caso di kendo lo a terminá sin un decision dje Corte Supremo.

E Corte Supremo di Hapon generalmente ta examiná apelacionnan solamente riba papel i ta husga si e decisionnan di cortenan mas abou tabata corecto of no. Aménos cu tin un motibu importante pa revocá e decision dje corte mas abou, ningun audiencia ta tuma lugá. E Corte Supremo no ta notificá e partidonan enbolbí ki dia e decision ta ser duná. Pues Kunihito a ser tumá pa sorpresa e mainta di 8 di mart, 1996, ora nan a bis’é cu e mainta ei nan lo a dicta sentencia. Pa su goso i deleite, el a haña sa cu e Corte Supremo a sostené e decision dje Corte Superior di Osaka.

Cuater hues, cu Hues Shinichi Kawai como presidente, a dicta unánimamente cu e scol su “accionnan en cuestion mester ser considerá como sumamente inapropiado desde e punto di bista di normanan aceptá socialmente, bayendo mas ayá dje scol su discrecion dentro di ley, i pues ta ilegal.” E corte a reconocé e sinceridad di Kunihito su nengamentu di haci ehercicionan di kendo i a bisa: “E motibu p’e persona demandá nenga di participá den ehercicionan di kendo tabata sincero i estrechamente ligá cu e fundeshi di su fe.” E Corte Supremo a haña cu e scol por i mester a percurá medionan alternativo di manera cu e persona demandá su creencia religioso por a ser respetá.

Efectonan di Largu Alcanse

E decision aki sin duda lo pone un precedente excelente na fabor di libertad di adoracion na scol. The Japan Times a bisa: “E decision ta e promé cu e Corte Supremo ta tuma riba e cuestion di educacion i libertad di religion.” Sin embargo, e decision no ta eliminá e responsabilidad di cada alumno hóben pa tuma su propio decision conciencial ora e haña su mes confrontá cu pruebanan di fe.

Profesor Masayuki Uchino di Universidad di Tsukuba a comentá cu un dje factornan cu a impulsá e huesnan pa otorgá un victoria na Kunihito tabata cu e tabata “un alumno sincero kende su logronan académico tabata sobresaliente.” Bijbel ta duna e conseho aki na cristiannan cu ta enfrentá pruebanan di nan fe: “Mantené boso conducta excelente entre e nacionnan, pa cu, den loke nan ta papia contra boso como malechor, nan, como testigo ocular di boso obranan excelente, por glorificá Dios den e dia di su inspeccion.” (1 Pedro 2:12) Hóbennan cristian fiel por mustra cu nan posicion basá riba Bijbel ta digno dje respet di hende dor di hiba henter nan bida di acuerdo cu normanan bíblico.

Despues dje decision dje Corte Supremo, Kunihito Kobayashi a ser admití bek na Kobe Tech. Mayoria dje alumnonan cu a cuminsá scol huntu cu Kunihito ya a gradua caba. Awor Kunihito ta hañando les cu alumnonan cu ta cincu aña mas yong cuné. Den bista di hopi hende di mundu, ta parce cu cincu aña precioso di su hubentud a ser malgastá. Sin embargo, Kunihito su integridad ta precioso den bista di Jehova Dios, i su sacrificio siguramente no ta en bano.

[Nota]

[Plachi na página 20]

Robes: Kunihito su cas despues dje temblor

Abou: Kunihito awe