Consuelo Durante Cuater Aña di Guera
DURANTE e cuater añanan di guera den e teritorio di ex-Yugoslavia, hopi hende a pasa hopi trabou i a sufri di scarcedadnan severo. Entre nan tabatin cientos di Testigo di Jehova, kendenan fielmente a sigui adorá “e Dios di tur consuelo.”—2 Corintionan 1:3.
Na Sarajevo, e hendenan a pasa mas trabou ainda dor di ta biba den un stad grandi cu tabata sitiá durante henter e guera. Tabatin scarcedad di coriente, awa, cuminda i palu pa candela. Con e Congregacion Sarajevo di Testigonan di Jehova a funcioná bou dje condicionnan extremo aki? Cristiannan di paisnan bisiña a risca nan bida pa hiba pa nan un cantidad grandi di suministro di alivio. (Mira E Toren di Vigilancia di 1 di november, 1994, página 23-7.) Tambe, e rumannan na Sarajevo a compartí loke nan tabatin un cu otro, poniendo e énfasis principal riba compartí cosnan spiritual. Durante e sitiamentu un superintendente cristian dje stad ei a duna e siguiente informe:
“Nos ta considerá nos reunionnan como masha balioso. Ami cu mi esposa, huntu cu 30 otro persona, ta cana 15 kilometer pa bai i bini dje reunionnan. Tin biaha gobiernu tabata anunciá cu lo parti awa durante e oranan cu e reunionnan a ser tené. Kico e rumannan lo a haci? Nan lo a keda cas pa haña awa of asistí n’e reunionnan? Nos rumannan a preferá di asistí n’e reunionnan. E rumannan semper ta yuda un e otro; kico cu nan tin, nan ta compartí. Un ruman muher den nos congregacion ta biba na rand dje stad, cerca di mondi; pues ta un tiki mas fácil p’e haña poco palu pa candela. Tambe e ta traha na un panaderia, i nan ta pagu’é su salario na hariña. Ora ta posibel, e ta traha un kipashi grandi i ta bini reunion cuné. Despues di reunion, ora e rumannan ta saliendo e ta duna tur hende un pida.
“Ta importante pa ningun dje rumannan nunca sinti nan mes bandoná. Ningun hende sa cua di nos lo ta e siguiente cu lo por tin mester di yudansa den un situacion desagradabel. Ora nos tabatin camindanan cu ijs durante winter i un ruman muher tabata malu, ruman hombernan hóben i fuerte tabata hal’é riba un slee trece n’e reunionnan.
“Nos tur ta participá den e trabou di predicá, i Jehova a bendicioná nos esfuersonan. El a mira nos situacion pertá na Bosnia, pero el a bendicioná nos cu aumento—aumento cu nos no a mira promé cu e guera.”
Di igual manera, den otro partinan di ex-Yugoslavia cu ta asotá pa guera, Testigonan di Jehova a disfrutá di aumentonan apesar di dificultadnan severo. For dje oficina di Testigonan di Jehova na Croacia ta bini e informe aki tocante un grupo di Testigonan: “E rumannan bibando na Velika Kladuša mester a trata cu tempu extremadamente difícil. E stad a ser atacá na vários ocasion. E rumannan tabatin cu splica nan posicion neutral na ehércitonan croata, serbio i vários di moslim. Di berdad nan mester a wanta hopi—encarcelacion, golpi, hamber, peliger di morto. Tog, nan tur a keda fiel i tin e privilegio sobresaliente di mira Jehova su bendicion riba nan actividadnan.”
Apesar di tur e dificultadnan aki, Testigonan di Jehova na Velika Kladuša i e stad bisiña di Bihać ta sigui disfrutá di aumento segun cu nan celosamente ta compartí Dios su mensahe di consuelo cu nan próhimo. Un total di 26 publicador di Reino dje dos lugánan aki ta conduciendo 39 studio di Bijbel na cas!