Un “Monton di Testimonio” den e Tera dje “Ceru di Dios”

RIBA un mapa dje continente, si bo sigui e liña di costa di West Africa i move direccion oost na cantu dje Golfo di Guinea, n’e punto unda e costa ta bira pa sur, lo bo haña Camerun. Si bo sigui direccion sur a lo largu dje costa, lo bo yega na un área inmenso di playanan di santu pretu. E santu pretu ta e resultado di actividad volcánico di Ceru di Camerun.

E punta dje ceru aki cu forma di papureshi di 4.070 meter haltu ta dominá e área completamente. Ora solo ta baha i ta baña e subidanan di Ceru di Camerun den lus, e ta duna un exhibicion espectacular di colornan bibu—puus, oraño, oro i carmesí. E laman i e moerasnan den cercania ta reflehá tur e matis di colornan aki manera un spiel, haciend’e casi imposibel pa distinguí shelu for di tera. Ta fácil pa comprendé pakico e tribunan dje region cu ta kere cu cosnan sin bida ta poseí pa spiritu dje curpa humano, a yama e ceru Mongo Ma Loba, cu ta ser traducí como “Garoshi dje diosnan,” of mas comunmente como “Ceru di Dios.”

Mas pa sur, tin kilometernan di playa cu santu blancu, cu rijnan di palu di coco. Aparte dje costa idílico, gran parti dje pais ta cubrí cu selvanan ecuatorial denso, extendiendo for dje frontera cu Congo i República Centroafricano i pa nort cu Nigeria i Chad, sur di Sahara. E parti west dje pais ta yen di ceru, recordando e biahero di partinan di Europa. Sin embargo, e clima cayente lo no lagá bo lubidá cu bo ta situá masha cerca dje ecuator. E variedad di su paisahe ta haci hopi guia turístico describí Camerun como un réplica di Africa na miniatura. E impresion aki ta ser reforsá p’e diferente gruponan étnico i e mas cu 220 idioma i dialecto oficial.

Si bo mester bishitá Camerun, lo bo por keda den un dje hotelnan grandi n’e haf di Douala, of e stad capital, Yaoundé. Pero bo no por perde e oportunidad di conocé algu tocante e bida dje hendenan, specialmente dje mas cu 24.000 Testigonan di Jehova, cu ta acumulando un “monton di testimonio” atrabes dje pais aki dje “Ceru di Dios.”a Pakico no haci un biahe dor dje pais pa topa algun di nan? Bo exploracion dje pais di West Africa aki siguramente lo ser recompensá ricamente.

Biaha cu Canoa, cu Taxi di Cunucu of cu Baiskel?

Caminda Sanaga, e riu di mas largu na Camerun, ta alcansá e océano, e ta forma un delta grandi. Pa alcansá tur e habitantenan dje region inmenso aki, Testigonan di Jehova hopi bes tin cu biaha den canoa. Esaki ta loke e nuebe publicadornan di Reino den e grupo chikitu na Mbiako ta haci. Dos di nan ta biba 25 kilometer leu, den e pueblo di Yoyo. Pa nan alcansá Mbiako nan tin cu rema bastante den canoa, tog nan ta semper presente n’e reunionnan cristian. Ora un superintendente biahero a bishitá e grupo aki, el a sugerí pa pasa e video Los testigos de Jehová... La organización tras el nombre. Pero esei ta mas fácil pa bisa cu pa haci. Den un pueblo remoto asina, unda lo e haña un videocaset recorder, un television i electricidad pa pasa e video?

Durante e siman dje bishita, algun publicador a bishitá e pastor di un iglesia local. Pa nan sorpresa e pastor a ricibí nan calurosamente, i nan tabatin un consideracion bíblico animá cuné. Notando cu e pastor tabatin no solamente un videocaset recorder sino tambe un ‘generator,’ e rumannan a tuma un curashi i a puntra si nan por a fia su ekipo. Siendo cu el a disfrutá dje consideracion bíblico mas promé, e pastor a bai di acuerdo pa yuda. Diasabra anochi 102 persona a bini pa mira e video, incluyendo e pastor i mayoria miembro di su iglesia. E dos Testigonan di Yoyo a trece un cantidad di personanan interesá den dos canoa. Nan no a haña cu tabata muchu difícil pa rema contra e coriente dje marea cu tabata subiendo. Despues cu nan a mira e video, nan tabata profundamente conmoví i animá, i nan a sinti nan orguyoso di por pertenecé na un organisacion asina grandi di cua su meta ta pa onra Jehova.

Pa bai caminda canoa no por alcansá, bo por usa taxi di cunucu. E áreanan di parkeer unda e taxinan aki ta warda riba pasahero ta semper yen di actividad. Entre e bendedornan di awa friu, bendedornan di bacoba i muchanan cu ta carga ekipahe, ta fácil pa keda totalmente confundí. E trabou dje cargadornan di ekipahe ta pa hinca e pasaheronan den taxinan di cunucu, di cua tur ta, segun nan, “cla pa sali.” Sin embargo, no mester comprendé “cla” den e sentido estricto dje palabra. Biaheronan tin cu pasa oranan, tin biaha asta dianan, wardando. Una bes tur e pasaheronan a ser di prop paden i e conductor a stiwa e ekipahe, sacu di fruta i berdura, i tin biaha asta galiña i cabritu bibu, riba e reki dje dak, e taxi di cunucu ta subi e camindanan di tera yen di buracu.

Un minister biahero, cansá dje forma di transporte aki, a opta pa independencia. Awor e ta haci tur su biahenan riba baiskel. E ta bisa: “For di tempu cu mi a dicidí di usa un baiskel pa biaha di un congregacion pa otro, semper mi ta yega na tempu p’e bishita. Ta cierto cu e biahe por tuma vários ora, pero por lo ménos mi no tin nodi pasa un of dos dia ta warda riba e taxinan di cunucu. Durante e temporada di awaceru, algun caya casi ta disparcé completamente pa motibu di inundacion. Bo tin cu kita bo sapatunan pa crusa e áreanan di lodo i awa. Un dia un di mi sapatunan a cai den un coriente di awa i mi no hañ’é bek sino te despues di vários siman, ora e yu muher di un dje Testigonan a gar’é pa casualidad ora e tabata pisca! Mi ta contentu di por bisti e par di sapatunan aki atrobe, despues cu un di nan a pasa algun tempu cu e piscánan. Tin biaha mi ta pasa dor di áreanan unda Testigonan di Jehova nunca no a predicá anteriormente. Semper e habitantenan dje pueblonan ta puntrá mi kico mi a trece. Pues mi ta tene e revistanan i foyetonan cla na man. Tur biaha cu mi stop, mi ta ofrecé e publicacionnan aki basá riba Bijbel i ta duna un testimonio breve. Mi ta kere cu Jehova lo haci e simianan aki dje berdad crece.”

Leu den Interior

Testigonan di Jehova ta haci esfuerso pa compartí e bon nobo di Reino cu otronan asta hopi leu den e curason di Camerun, den e pueblonan scondí den e profundidadnan dje selva. Esaki ta rekerí bastante esfuerso, pero e resultadonan ta conmovedor.

Marie, un minister di tempu completo, a cuminsá studia Bijbel cu un hobencita yamá Arlette. Na fin dje promé studio, Marie a puntra Arlette si e por a hib’é porta, manera ta custumber den e parti aki di Africa. Sin embargo, e hobencita a splica cu apénas e por a cana di dolor na su pianan. Arlette su pianan tabata infectá pa un tipo di pruga di cua e hembra ta coba biba den e carni, causando postema. Cu curashi Marie a kita e pruganan un pa un. Mas despues, el a haña sa tambe cu anochi e hobencita aki tabata ser tormentá pa demoñonan. Cu pacenshi Marie a splik’é con e por a pone su confiansa den Jehova, specialmente dor di inbocá su nomber na bos haltu den oracion.—Proverbionan 18:10.

Arlette a progresá rápidamente. Na promé instante su famia no a mira nada malu den su studio debí n’e progreso remarcabel cu e tabata haciendo tantu físicamente como intelectualmente. Pero ora nan a realisá cu e kier a bira un Testigo di Jehova, nan a prohibié di continuá e studio. Tres siman despues e mama di Arlette, mirando con afligí su yu muher tabata, a tuma contacto cu Marie i a pidié pa sigui cu e studio.

Ora e tempu a yega pa asistí na un asamblea di circuito, Marie a paga un shofer di taxi pa hiba Arlette riba tur dos dia. Sin embargo, e shofer a nenga di bai te n’e cas di Arlette, ya cu e tabata di opinion cu e caminda di su cas p’e caya tabata intransitabel. Pues Marie a logra trece e hobencita n’e caya di manera cu e por a coge e taxi. Jehova siguramente a bendicioná e esfuersonan aki. Awe Arlette ta asistí na tur e reunionnan di congregacion. Pa yud’é haci esaki, Marie ta bin busk’é incansablemente. Huntu nan ta cana e caminda di 75 minuut bai i bini. Siendo cu e reunion di diadomingo ta cuminsá 8:30 a.m., Marie tin cu sali cas 6:30; tog nan ta logra yega na tempu. Arlette ta spera di simbolisá su dedicacion mediante bautismo bou di awa dentro di poco. Marie ta declará: “Cualkier hende cu no a mir’é ora el a cuminsá studia no por imaginá cuantu el a cambia. Mi ta gradicí Jehova masha tantu p’e manera cu el a bendicion’é.” Marie siguramente ta un ehempel excelente di amor impulsá pa sacrificio propio.

Leu den Nort

Parti nort di Camerun ta yen di contraste i sorpresa. Durante e temporada di awaceru, e ta transformá den un hofi grandísimo, berde-berde. Pero ora e solo skerpi tuma over, e yerba ta marchitá. Merdia, ora solo ta pará haltu-haltu i ta difícil pa haña sombra, e carnénan ta perta nan curpa contra muraya dje casnan trahá di lodo corá. Meimei dje santu i yerba secu, e único marca di mata berde ta e poco blachinan dje palunan di ‘apebrood.’ Maske esakinan no ta mes grandi cu nan primunan den e selva ecuatorial, nan ta mes resistente. Nan abilidad pa soportá e ambiente severo ta ilustrá bon cla e celo i curashi dje poco Testigonan cu a bai biba den e region aki pa por laga e lus dje berdad briya.

Algun dje congregacionnan den e área aki ta 500 pa 800 kilometer leu for di otro, i e sintimentu di isolacion ta masha real. Pero tin hopi hende interesá. Testigonan for di otro áreanan ta muda bin aki pa yuda. Pa ta eficas den e ministerio, nan tin cu siña foufouldé, un dialecto local.

Un Testigo cu ta bini for di Garua a dicidí di dedicá un par di dia predicando den su pueblo natal, rond di 160 kilometer leu. El a haña algun hende interesá, pero e costo haltu di transporte a previnié di regresá regularmente. Algun siman despues, e Testigo a ricibí un carta for di un dje personanan interesá rogand’e pa bini i bishit’é atrobe. Faltando ainda e placa p’e pasashi, e no tabata por a bai. Imaginá con sorprendí e Testigo tabata ora e persona a bishitá su cas na Garua pa inform’é cu dies hende den e pueblo tabata wardando su bishita!

Den un otro pueblo, cerca dje frontera cu Chad, un grupo di 50 persona interesá a organisá nan propio studio di Bijbel. Nan a haci areglo pa tres di nan asistí n’e reunionnan den e congregacion di mas cerca na Chad. Ora nan regresá, esakinan ta conducí e ora ei e studio di Bijbel cu henter e grupo. En berdad, e palabranan di Jesus por wel aplicá aki: “E cosecha ta grandi, pero e trahadornan ta poco. P’esei, roga na e Doño dje cosecha pa manda trahadornan na su cosecha.”—Mateo 9:37, 38.

Dunando Testimonio den e Stadnan

Despues di hopi aña di scarcedad di literatura, mas o ménos dos aña pasá, e revistanan Toren di Vigilancia i Spierta! a bira libremente obtenibel na Camerun. Tin hopi entusiasmo pa i interes den e revistanan aki ya cu hopi hende ta lesando nan pa promé biaha. Un pareha hóben, pionero special, asigná na un dje stadnan, a laga 86 revista riba nan promé mainta di predicacion den nan teritorio nobo. Algun publicador ta laga te cu 250 revista den un solo luna! Kico ta e secreto di nan éxito? Ofrecé e revistanan na tur hende.

Un Testigo cu ta traha den un oficina habrí pa público semper ta laga e revistanan pa bista di otronan. Un señora a mira e revistanan pero no a tuma ningun. E Testigo a dicerní su interes i a ofrec’é un copia, cu el a aceptá. El a keda sorprendí pa mir’é bini bek e siguiente dia. E no solamente kier a contribuí p’e revista cu el a tuma sino tambe a pidi pa mas. Pakico? Siendo cu e tabata un víctima di violacion sexual, el a scoge e revista riba e tópico ei. El a pasa henter anochi ta lesa i bolbe lesa e conseho cu a ser duná. Sintiendo su mes hopi aliviá, e tabata kier a sa mas tocante Testigonan di Jehova.

Asta muchanan chikitu por participá den plama e mensahe bíblico di speransa. Ora un maestro a puntra un hobencita Testigo di seis aña di edad pa canta un himno católico, el a nenga, bisando cu e tabata un Testigo di Jehova. E maestro a puntr’é e ora ei pa canta un di su propio canticanan religioso di manera cu e por a dun’é un punto p’e. El a scoge pa canta e cantica titulá “Dios Su Promesa di Paradijs” i a cant’é for di cabes. E maestro a hacié pregunta, bisando: “Bo ta mencioná un paradijs den bo cantica. Unda e paradijs aki ta?” E hobencita a splica e propósito di Dios di establecé Paradijs riba tera masha pronto. Sorprendí cu su contesta, e maestro a pidi su mayornan p’e buki cu e hobencita tabata studiando. E tabata dispuesto pa dun’é un punto riba loke el a siña for dje buki mas bien cu riba loke e tabata siña durante e lesnan tocante religion. E mayornan a sugerí e maestro cu si e kier a dun’é un punto corectamente, e mes mester a studia promé. Nan a cuminsá un studio di Bijbel cuné.

Planeando un Bishita?

Den hopi parti dje mundu awe, hende ta indiferente n’e bon nobo di Reino. Ni Dios ni e Bijbel no ta interesá nan. Otronan ta paralisá dor di temor i simplemente ta nenga di atendé cualkier hende straño na porta. Tur esaki ta un berdadero desafio pa Testigonan di Jehova den nan ministerio. Pero ki un diferencia na Camerun!

Predicacion di cas pa cas ta un deleite aki. En bes di bati na porta, e custumber ta pa yama, “Kong, kong, kong.” Anto for di paden un bos ta contestá, “Ta ken?” despues di cua nos ta introducí nos mes como Testigonan di Jehova. Generalmente, e mayornan ta pidi nan yunan pa bai coge bankinan i pone nan den sombra di un palu, tal bes un palu di mango. E Testigonan ta pasa un ratu agradabel splicando kico ta e Reino di Dios i loke lo e haci pa aliviá e condicion deplorabel di humanidad.

Despues di djis un consideracion asina, un señora a habri su curason, bisando: “Mi ta afligí pa mira cu e berdad cu mi tabata buscando no ta den e religion den cua mi a nace i den cua mi a crece bira grandi. Mi ta gradicí Dios cu el a mustrá mi e berdad. Mi tabata un diácono den mi misa. E estatua di Bírgen Maria ta pasa un siman den cas di cada diácono di manera cu nan cada un por haci peticionnan na dje. Pa loke ta ami, mi semper a pidi Maria yudá mi conocé e berdad. Dios a mustrá mi awor cu e berdad no ta cu Maria. Mi ta gradicí Jehova.”

Pues si un dia bo sinti e necesidad pa experenciá e goso intenso cu bo por haña den predicá e bon nobo dje Reino di Dios, pakico no bishitá e parti aki di West Africa? Ademas di descubrí “Africa na miniatura,” sea cu canoa, taxi di cunucu, of baiskel, lo bo ta contribuyendo tambe n’e “monton di testimonio” cu ta acumulando den e tera dje “Ceru di Dios.”

[Nota]

[Rekonosementu pa Potrèt na página 22]

Mapa: Mountain High Maps® Copyright © 1995 Digital Wisdom, Inc.