Bo Ta Corda?

Bo a apreciá lesamentu dje edicionnan recien di E Toren di Vigilancia? Wel, wak si bo por contestá e siguiente preguntanan:

◻ E palabranan di Jesus, “Si boso pordoná e picánan di cualkier persona, nan ta keda pordoná,” ta nificá cu cristiannan por pordoná picá? (Juan 20:23) No tin ningun base bíblico pa concluí cu cristiannan en general, of asta ancianonan nombrá den e congregacion, tin autoridad divino pa pordoná picá. E contexto di Jesus su palabranan ta parce di mustra cu e apostelnan a ricibí mediante un obramentu dje spiritu un autoridad special pa pordoná of keda sin pordoná picá. (Mira Echonan 5:1-11; 2 Corintionan 12:12.)—15/4, página 28.

◻ Kico ta sobresaliente tocante J. J. Stewart Perowne su traduccion dje buki di Salmonan, publicá pa promé bes na 1864? Den su traduccion Perowne a purba pega “estrechamente n’e forma dje texto hebreo, tantu den su idioma como den e structura gramatical dje frasenan.” Haciendo esei el a faborecé e restoracion dje nomber divino den e forma di “Jehova.”—15/4, página 31.

◻ Ki instruccion Jesus a duna su siguidornan pa loke ta nan tratamentu cu e gobiernunan dje mundu? Jesus a bisa: “P’esei, paga bek e cosnan di César na César, pero e cosnan di Dios na Dios.” (Mateo 22:21) Tambe el a bisa: “Si un hende bou di autoridad ta obligá bo pa un miya di sirbishi, bai dos miya cuné.” (Mateo 5:41) Aki Jesus tabata ilustrando e principio di sumision boluntario na exigencianan legítimo, sea den relacionnan humano of den rekisitonan gubernamental cu ta na armonia cu e ley di Dios. (Lucas 6:27-31; Juan 17:14, 15)—1/5, página 12.

◻Kico kier men ‘cana den e berdad’? (Salmo 86:11) Esaki ta incluí obedecé e rekisitonan di Dios i sirbié den fieldad i sinceridad. (Salmo 25:4, 5; Juan 4:23, 24)—15/5, página 18.

◻ Kico Jehova a logra dor di manda Jónas na Nínive? Manera cosnan a bai, Jónas su actividad di predicá na Nínive a mustra e contraste entre e ninivitanan repentí i e israelitanan cabesura, kendenan penosamente a falta fe i humildad. (Compará cu Deuteronomio 9:6, 13; Jónas 3:4-10.)—15/5, página 28.

◻ Ken ta e Colebra i ken ta “e muher” na cua Génesis 3:15 ta referí? E Colebra no ta e humilde colebra sino esun cu a us’é, Satanas e Diabel. (Revelacion 12:9) “E muher” no ta Eva sino Jehova su organisacion celestial, mama di su sirbidornan ungí cu spiritu riba tera. (Galationan 4:26)—1/6, página 9.

◻ Con un persona por sali for di Babilonia e Grandi i haña siguridad? (Revelacion 18:4) E mester separá su mes completamente for di organisacionnan religioso falsu i tambe for di nan custumbernan i e ambiente cu nan ta fomentá, i e ora ei e mester haña siguridad den Jehova su organisacion teocrático. (Efesionan 5:7-11)—1/6, página 18.

◻ Pakico e águila ta ser mencioná frecuentemente den e Scritura? Escritornan di Bijbel a referí na característicanan dje águila pa simbolisá cosnan tal como sabiduria, proteccion divino i rapides.—15/6, página 8.

◻ E sirbidornan di Dios awe cu tin e speransa terenal tin mes tantu dje spiritu di Dios cu e cristiannan ungí cu spiritu? Básicamente, e contesta ta sí. E spiritu di Dios ta disponibel den porcionnan igual pa ámbos clase, i conocimentu i comprendimentu ta igualmente alcansabel pa tur dos.—15/6, página 31.

◻ Pakico ta probechoso pa nos awe examiná e sirbishi sagrado cu e sacerdotenan israelita a efectuá den e tempel na Jerusalem? Dor di haci esei nos por yega na apreciá mas plenamente e areglo misericordioso dor di cua humanidad pecaminoso awe por bira reconciliá cu Dios. (Hebreonan 10:1-7)—1/7, página 8.

◻ Con e di dos tempel construí na Jerusalem a yega na tin un gloria mas grandi cu esun cu Sálomon a construí? E di dos tempel a dura 164 aña mas tantu cu e tempel di Sálomon. Mas adoradornan for di hopi mas pais a congregá den su pationan. Mas importante, e di dos tempel aki a disfrutá dje gran distincion di tabatin e Yu di Dios, Jesucristo, siña otronan den su pationan.—1/7, página 12, 13.

◻ Na ki tempu Dios a producí su tempel spiritual? Esaki tabata na 29 E.C. ora Dios a mustra cu el a aprobá e oracion di bautismo di Jesus. (Mateo 3:16, 17) E echo cu Dios a aprobá e presentacion dje curpa di Jesus a nificá cu, den un sentido spiritual, un altar mas grandi cu esun den e tempel di Jerusalem a cuminsá funcioná.—1/7, página 14, 15.

◻ Pakico nos mester ta hende cu ta pordoná? Pordoná un ofensor cu a pidi disculpa ta esencial si nos kier mantené unidad cristian. Hostilidad i cargamentu di rencor lo horta nos di pas mental. Si nos ta hende cu no ta pordoná, nos ta core e rísico cu un dia Jehova lo no pordoná nos picánan mas. (Mateo 6:14, 15)—15/7, página 18, 19.

◻ Con e israelitanan por a bira santu? Santidad tabata solamente posibel dor di nan relacion íntimo cu Jehova, e Dios santu, i dor di nan adoracion puru na dje. Nan tabatin mester di conocimentu exacto di “e Santísimo” afin di ador’é den santidad, den limpiesa físico i spiritual. (Proverbionan 2:1-6; 9:10)—1/8, página 11.