“Reconoce Hende dje Clase Ei”

COSNAN no tabata bayendo bon den e congregacion corintio. Tabatin un caso escandaloso di inmoralidad, i a existí faccionnan entre e rumannan. Algun a enfrentá problemanan personal serio of tabatin preguntanan cu mester a ser contestá. Algun ruman tabata hibando otro corte; otronan asta tabata rechasá e siñansa di resureccion.

Preguntanan serio a lanta tambe. Esnan den casnan dividí pa motibu di religion mester a keda cu nan casá incrédulo, of nan mester a separá? Kico tabata e papel di rumannan muher den e congregacion? Tabata apropiado pa come carni sacrificá na ídolonan? Con e reunionnan—incluyendo e Cena di Señor—mester a ser conducí?—1 Corintionan 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.

Muy probablemente, preocupá p’e bienestar di nan rumannan den un ambiente spiritual perturbá asina, Acaico, Fortunato i Estéfanas a sali riba un biahe pa bishitá apostel Pablo na Efeso. Ademas di trece tal noticianan perturbador, ta posibel cu nan tabata hibando pa Pablo un carta for dje congregacion cu a contené preguntanan riba e asuntunan aki. (1 Corintionan 7:1; 16:17) Evidentemente, e tres rumannan aki no tabata e úniconan preocupá tocante e situacion. En realidad, Pablo a ricibí noticia caba for di “esnan dje cas di Cloe” di cu tabatin desunionnan entre miembronan di congregacion. (1 Corintionan 1:11) Sin duda, e informe dje mensaheronan a yuda Pablo obtené un comprendimentu mas cla dje situacion, pa dicidí ki conseho pa ofrecé, i con pa contestá e preguntanan cu a surgi. Ta parce cu e carta cu nos conocé awor como Promé Corintionan ta e contesta di Pablo, cua a ser guiá dor dje spiritu santu di Dios. Acaico, Fortunato i Estéfanas por tabata esnan cu a entregá e carta n’e corintionan.

Ken tabata Acaico, Fortunato i Estéfanas? Kico nos por siña dor di studia loke e Scritura ta bisa tocante nan?

E Cas di Estéfanas

E cas di Estéfanas tabata e “promé frutanan” di Pablo su ministerio den e provincia romano di Acaya, Sur di Grecia, rond di aña 50 E.C., i Pablo mes a bautisá nan. Aparentemente, Pablo a considerá e cas di Estéfanas como ehemplar, un influencia maduro i stabilisador p’e corintionan. El a elogiá nan calurosamente pa nan actividad na fabor dje congregacion: “Awor mi ta exhortá boso, rumannan: Boso sa cu e cas di Estéfanas ta e promé frutanan di Acaya i cu nan a dedicá nan pa sirbi e santunan. Boso tambe sigui someté boso na personanan dje clase ei i na tur hende cu ta cooperando i trahando.” (1 Corintionan 1:16; 16:15, 16) Exactamente ken a forma e “cas” di Estéfanas no ta ser bisá. E expresion por a simplemente nificá miembronan di famia pero tambe por a incluí esclabonan of empleadonan. Siendo cu Acaico tabata un nomber latin típico pa un esclabo, i Fortunato típico pa un homber liber, algun comentarista ta suponé cu e dosnan aki tal bes tabata miembro dje mésun cas.

Sea cual sea e caso, Pablo a considerá e cas di Estéfanas unu ehemplar. Su miembronan a “dedicá nan pa sirbi e santunan.” E famia di Estéfanas mester a reconocé cu trabou tabata necesario p’e bienestar dje congregacion i boluntariamente a aceptá e sirbishi aki como un responsabilidad personal. Nan deseo pa rindi tal sirbishi na e santunan siguramente tabata merecedor di apoyo moral i reconocimentu.

“Nan A Refrescá Mi Spiritu i Esun di Boso”

Aunke Pablo tabata preocupá tocante e situacion na Corinto, e yegada dje tres mensaheronan a sirbi pa anim’é. Pablo ta bisa: “Mi ta alegrá riba e presencia di Estéfanas i Fortunato i Acaico, pasobra nan a compensá pa e ausencia di boso. Pasobra nan a refrescá mi spiritu i esun di boso.” (1 Corintionan 16:17, 18) En bista dje situacion na Corinto, separacion físico for dje corintionan probablemente tabata un fuente di ansiedad pa Pablo, pero awor e presencia di nan representantenan a compensá p’e ausencia di henter e congregacion. Nan informe probablemente a sirbi pa completá Pablo su plachi dje situacion i eliminá por lo ménos algun di su temornan. Tal bes cosnan no tabata asina malu manera el a imaginá su mes apesar di tur cos.

Segun Pablo, e mision dje tres mensaheronan no solamente a refrescá su spiritu sino tambe a sirbi pa lanta e spiritu dje congregacion corintio. Sin duda tabata un alivio pa nan sa cu nan representantenan a splica Pablo claramente tur aspecto dje situacion i lo a regresá cu su conseho.

Pues Estéfanas i su dos compañeronan a ser encomendá calurosamente pa nan labor na fabor dje corintionan. Pablo su aprecio p’e hombernan aki tabata di tal grado cu ora nan a regresá nan mester a hiba delantera den e congregacion corintio dividí. E apostel a urgi e rumannan: “Sigui someté boso mes na personanan dje clase ei i na tur hende cu ta cooperando i trahando. . . . Reconocé hende dje clase ei.” (1 Corintionan 16:16, 18) Recomendacionnan fuerte asina ta indicá claramente e lealtad completo dje hombernan aki apesar di tensionnan den e congregacion. Mester tene aprecio pa hende dje clase ei.—Filipensenan 2:29.

Fiel Cooperacion Ta Producí Resultadonan Excelente

No tin duda cu cooperacion estrecho cu e organisacion di Jehova i su representantenan ta producí resultadonan excelente. Ora Pablo a skirbi e carta awor conocí como Segundo Corintionan, djis despues dje promé carta, ya cosnan tabata bayendo mihó den e congregacion. E actividad paciente i continuo di rumannan manera Acaico, Fortunato i Estéfanas, i tambe e bishita di Tito, a producí un bon efecto.—2 Corintionan 7:8-15; compará cu Echonan 16:4, 5.

Miembronan dje congregacionnan actual dje pueblo di Jehova por saca beneficio dor di meditá riba e mencion breve dje hombernan fiel aki den e Scritura. Por ehempel, suponé cu un situacion andando den e congregacion local no por ser resolvé mesora pa un motibu of otro i ta causando preocupacion p’e rumannan. Kico mester ser hací? Imitá Estéfanas, Fortunato i Acaico, kendenan no a hala atras for di nan responsabilidad pa spierta Pablo dje situacion, anto laga asuntunan cu confiansa den man di Jehova. Di ningun manera nan a laga celo pa husticia pone nan tuma accion independientemente of pa bira “furioso contra Jehova.”—Proverbionan 19:3.

E congregacionnan ta pertenecé na Jesucristo, i na su debido tempu, mescos cu den Corinto, lo e actua pa resolvé cualkier dificultad cu por presentá un menasa pa nan bienestar spiritual i pas. (Efesionan 1:22; Revelacion 1:12, 13, 20; 2:1-4) Miéntras tantu, si nos sigui e ehempel excelente cu Estéfanas, Fortunato i Acaico a pone i sigui traha pa sirbi nos rumannan, nos tambe lo ta apoyando lealmente e areglo dje congregacion, edificando nos rumannan, i ‘incitando nan na amor i na obranan excelente.’—Hebreonan 10:24, 25.