Testigonan te n’e Parti Mas Lehano dje Tera

ETAH

THULE

GODHAVN

GODTHÅB

JULIANEHÅB

ANGMAGSSALIK

THULE ta parti di un nomber cu a ser usá desde tempunan antiguo pa describí un meta final, unu geográfico of di un otro sorto. Awe Thule ta nomber di un pueblo den e extremo nort di Groenlandia, e isla mas grandi di mundu. E pueblo a ser yamá asina na 1910, ora e explorador danes Knud Rasmussen a us’é como un sitio di tránsito pa expedicionnan pa polo norte. Asta awe, pa bai Thule ta mas un expedicion cu un biahe di placer.

Apesar di esei, tin un necesidad urgente pa haci expedicionnan pa Thule. Como reaccion riba Jesus su mandamentu: “[Ser] testigo di mi . . . te n’e parti mas lehano dje tera,” Testigonan di Jehova ta ansioso pa hiba e bon nobo dje Reino di Dios n’e lugá aki, un dje poblacionnan humano permanente di mas nort riba tera.—Echonan 1:8; Mateo 24:14.

‘Ki Dia Nos Por Bai Thule?’

Na 1955 dos Testigo danes cu kier a participá den e predicacion “te n’e parti mas lehano dje tera” a yega Groenlandia. Otronan a bini despues, i gradualmente nan trabou di predicacion a cubri e costa sur i west bai ariba te na Bahia di Melville i parcialmente bai ariba n’e costa oost. Pero ta cu carta of telefon so por a alcansá e partinan mas leu manera Thule.

Un dia na 1991, Bo i su esposa, Helen, dos minister di tempu completo, tabata pará riba un baranca cu bista riba Bahia di Melville. Mirando den direccion nort nan a puntra nan mes, ‘Ki dia nos lo por subi bai te Thule pa hiba e bon nobo di Reino n’e hendenan aya?’

Na 1993, Werner, un otro minister di tempu completo, a risca crusa Bahia di Melville den su ‘speedboat’ di 18 pia, Qaamaneq (Leve). El a nabegá 1.200 kilometer caba for di Godthåb bai ariba te n’e área di Upernavik. Sin embargo, crusa Bahia di Melville—400 kilometer di laman ártico hanchu—ta henteramente un otro asuntu. Pa mayor parti dje aña, e bahia ta blokiá cu ijs. Werner a logra crusa e bahia, aunke e boto a perde un motor pa motibu dje ijs. I el a logra predicá un poco promé cu e tabatin cu regresá.

Bayendo Thule

Despues dje biahe ei, Werner a cuminsá traha plannan nobo. El a papia cu Arne i Karin—kendenan tambe tabatin un boto, unu di 23 pia cu cuater cabina i, mas importante, cu ekipo moderno di nabegacion—tocante haci un biahe en conhunto pa Thule. E botonan lo a percurá pa acomodacion, i cu dos boto biahando huntu lo ta ménos riscante pa crusa Bahia di Melville. Pa cubri e poblacion principal cu su 600 habitantenan i e seis pueblonan den e área, nan tabatin mester di mas yudansa. Pues nan a invitá Bo i Helen i tambe Jørgen i Inge—tur ministernan experenciá conocí cu biahamentu den e pais aki—pa bai cu nan. Cincu persona dje grupo aki ta papia groenlandes tambe.

Nan a manda suministro di literatura bíblico adelantá. Tambe e botonan a ser cargá cu literatura, i tambe cu e provisionnan necesario di cuminda cu awa, combustibel, un motor di reserva i un boto chikitu di rubber. Anto, dia 5 di augustus, 1994, despues di lunanan di preparacion, e grupo a bini huntu i tur e dos botonan tabata cla i cargá den e haf di Ilulissat. E biahe pa nort a cuminsá. Werner, Bo i Helen a bai den e boto mas chikitu. “Tur loke bo por a haci durante e biahe tabata sinta of drumi den bo cabina i tene na algu,” Bo ta skirbi. Laga nos mira con e biahe a transcurí.

“Tabatin áreanan extenso di laman calmu. Panoramanan masha bunita a forma dilanti nos wowonan—laman lombrante, neblina denso, solo briyante i shelu blou, ijsberg dje formanan i matis di color di mas fasinante, un walrus bruin tumando solo riba un pida ijs cu ta drif, e costa cu cerunan scur i sabananan chikitu—e cambio di panorama tabata interminabel.

“E parti mas interesante, naturalmente, tabata di bishitá e pueblonan na caminda. Semper tabatin hende, generalmente muchanan, abou n’e pier pa mira ken e bishitantenan tabata i pa yama nan bon biní. Nos a laga literatura bíblico i a fia e hendenan un video tocante nos organisacion. Hopi hende por a mir’é promé cu nos tabatin cu bai. Na Sur Upernavik, vários hende a bin cu boto cerca nos botonan asta promé cu nos a drenta paden. Pues pa henter un anochi, nos tabatin huésped na bordo i a contestá hopi pregunta bíblico.”

Awor, despues dje promé 700 kilometernan dje biahe, e dos botonan tabata cla pa crusa Bahia di Melville.

E Desafio Crucial

“Hopi hende a considerá esaki e parti crucial dje biahe. I nos tabatin cu haci e crusamentu non-stop pasobra e pueblo di Savissivik (caminda e teritorio ta cuminsá i caminda otro ora nos lo por a haña acomodacion) tabata blokiá ainda cu ijs.

“Di manera cu nos a cuminsá crusa. Siendo cu tabatin un gran cantidad di ijs, nos a nabegá mas afó riba laman hanchu. Afortunadamente, e awa tabata calmu. P’e promé vários oranan no tabatin ningun particularidad—pasando hopi kilometer riba océano. Pa atardi nos a haña bista di Cape York i a bira lentamente pa nort, mas cerca di tera firme. Awor tabatin ijs atrobe—bieu, diki, i desintegrando pida pida di ijs te asina leu cu nos wowo por a mira. Nos a sigui nabegá banda dje ijs pa un distancia largu, algun biaha maniobrando dor di pasashinan smal. Tambe tabatin e neblina, cu tabatin parecido di un sopi diki color shinishi, peculiarmente bunita den e lus dje solo cu tabata bahando. I e olanan! Neblina, ola i ijs, tur n’e mésun tempu—generalmente cualkier un di esakinan so ta suficiente pa un desafio.”

Nos Bon Biní

“Nos a drenta e awanan mas calmu segun cu nos tabata acercando Pituffik. Creacion a duna nos un bon biní tur afó: solo haltu den un shelu blou blou; dilanti nos, e boca hanchu i lombrante, cu yen di ceru di ijs ta drif tur caminda; i leu ayá e silueta característico dje baranca na Dundas—e Thule bieu!” Rond di 100 kilometer mas pa nort, e biaheronan a yega na nan destinacion final.

Nan tabata ansioso awor pa cuminsá predicá di cas pa cas. Dos di nan a ricibí un reaccion bot na nan promé porta. “Nan a rechasá nos mescos cu ta na Dinamarca nos tabata,” nan a bisa. “Pero e mayoria a duna nos un bon biní caluroso. E hendenan tabata personanan cu ta pensa i tabata bon informá. Algun a mencioná cu nan a tende tocante nos i tabata contentu cu nos a yega por fin. Nos a topa algun hende maraviyoso, manera yagdónan di cachó di awa cu tabata riba expedicionnan pa Polo Norte, i nativonan, satisfecho i ‘zuinig,’ i cu tabatin un punto di bista un tiki sképtico di civilisacion moderno.”

E siguiente par di dianan nos tur a haña experencianan excelente. Tur caminda nan a ricibí e literatura bíblico cu aprecio. Den diferente cas e Testigonan a cuminsá studionan di Bijbel mesora. Inge ta conta di un cas unda el a haña interes: “E tabata un cas limpi i cómodo di un solo kamber. Pa tres dia tras di otro, nos a bishitá e homber di bon genio cu tabata biba ei i nos a haña masha cariño p’e. E tabata un berdadero yagdó di cachó di awa, cu su kayak pafó di su cas. El a yega di tira hopi oso polar, walrus i, naturalmente cachó di awa. Durante nos último bishita, nos a haci un oracion cuné, i su wowonan a yena cu awa. Awor nos mester laga tur cos den man di Jehova i spera p’e tempu i oportunidad di regresá.”

Thule ta ricibí bishitanan frecuente di éskimonan canades. Inge ta informá: “Ami cu Helen a topa vários éskimo for di Cánada. Ta interesante cu nan por comunicá cu e groenlandesnan; hende den e área ártico ta parce di por papia idiomanan cu ta relacioná cu otro. Aunke e éskimonan canades tin nan propio idioma skirbí, nan tabata por a lesa nos literatura na groenlandes. Esaki lo por habri oportunidadnan excitante pa nan.”

Tambe nos a bishitá e pueblonan cu ta keda 50 pa 60 kilometer mas aleu cu boto. “Riba nos caminda p’e pueblo di Qeqertat, nos a sigui e costa hopi djacerca, sperando pa haña hende cu ta yag bayena narval. Net manera nos a verwagt, riba un parti nivelá di baranca, nos a haña un campamentu consistiendo di tres of cuater famia, bistí cu lana di bestia, cu nan tentnan i kayaknan. Cu harpun den man, beurt pa beurt e hombernan tabata sinta riba un baranca pa spera riba e bayenanan narval altamente deseá. Despues di a warda caba en bano pa vários dia, nan no tabata masha contentu di mira nos pasobra nos lo por a spanta e bayenanan! Nan a parce di ta totalmente den nan mes mundu. E hende muhernan a aceptá algun literatura, pero no tabata e momento apropiado pa mas combersacion. Finalmente nos a yega na Qeqertat pa 11’or di anochi i a terminá nos último bishita den e pueblo pa 2’or di mardugá!”

“Finalmente nos a alcansá Siorapaluk, e pueblo mas nort na Groenlandia. E ta situá riba un playa yen di santu na pia di algun baranca berde, cubrí cu yerba den un clima cu otro ora lo ta secu.” E Testigonan literalmente a alcansá e partinan lehano dje tera, por lo ménos den direccion nort dje mundu, den nan trabou di predicacion.

Biahe Completá

E Testigonan a completá nan trabou. Nan a predicá di cas pa cas i di tent pa tent, nan a laga literatura, a obtené abonament, a mustra videonan, a papia cu hopi groenlandes i a conducí studionan di Bijbel. Awor ta tempu pa bai cas. “Ora nos a baha den nos boto chikitu e anochi ei pa rema bai for dje pueblo di Moriusaq, basta un par di hende tabata abou n’e playa pa despidí di nos, wayando e bukinan of foyetonan cu nan a obtené.”

Mas despues, riba un parti desolá dje costa, e Testigonan a keda asombrá di mira un homber zwai man for di un baranca—ei su so den chocamata! “Naturalmente, nos a subi costa pa top’é. El a resultá di ta un homber hóben di Berlin, Alemania, cu tabata biahando direccion nort alolargo dje costa den su kayak i tabata biahando pa un luna. Na Alemania e tabata ricibí bishita regular dje Testigonan di Jehova i tabatin vários di nan bukinan. Nos a pasa un par di ora cuné, i el a keda berdaderamente impresioná pa topa e Testigonan na un lugá asina.”

Den e pueblo di Savissivik, cu nan a pasa forbij debí n’e ijs ora di bai, e ministernan biahero a ricibí un bon biní tur afó. Algun hende ei a ricibí i a lesa e literatura e aña anterior, i nan tabatin hamber pa mas alimento spiritual.

E crusamentu di regreso di Bahia Melville a tuma 14 ora. “Nos a mira un bahamentu di solo, cu aki den norte ta un experencia di hopi ora, cu cambionan constante di colornan fasinante. E salimentu di solo, cu ta sigui inmediatamente, tambe ta tuma basta tempu. Miéntras cu e rayonan color corá i carmesí dje bahamentu di solo ainda tabata cubri e shelu di nortoost, solo a subi djis un poco n’e parti sur. Esei ta un esena imposibel pa describí—of asta pa fotografiá—adecuadamente.” Tur hende na bordo a keda lantá henter anochi.

“Ora nos a yega Kullorsuaq, nos tabata morto cansá. Pero nos tabata felis i satisfecho. Nos a completá e biahe cu éxito! Durante e resto dje biahe, nos a haña hopi hende interesá den e pueblonan alolargo dje costa. Hopi biaha e pregunta a ser ripití, ‘Pakico algun di boso no por keda cerca nos? Nos ta tristu pa mira boso bai asina lihé!’”

Na Qaarsut un famia amigabel a invitá cincu dje bishitantenan pa come huntu cu nan. “E famia tabata kier pa nos keda pasa anochi. Pero siendo cu tabatin mihó lugánan pa ancra 40 kilometer mas leu, nos a nenga e invitacion i a sigui nabegá. Despues nos a tende cu un ijsberg grandi a kibra trempan e siguiente mainta, i un ola a boltu 14 boto chikitu caminda nos tabata!”

Finalmente, e grupo tabata bek na Ilulissat, despues di a completá nan expedicion pa Thule. Pa rond dje mésun tempu cu e grupo a yega Thule, dos otro publicador a biaha pa partinan isolá n’e costa oost di Groenlandia. Riba e dos biahenan ei, e publicadornan a laga un total di 1.200 buki, 2.199 foyeto i 4.224 revista, i nan a obtené 152 abonament. E contacto cu hopi di esnan recien interesá ta ser tené awor via telefon i carta.

Apesar dje tempu, energia i placa enbolbí, Testigonan di Jehova ta haña gran goso den cumpli cu e mandato di nan Doño pa ‘ser testigo di mi . . . te n’e parti mas lehano dje tera.’—Echonan 1:8.

[Kuadro na página 28]

N’e Costa Oost di Groenlandia

PA ROND dje mésun tempu cu e grupo di publicadornan a yega Thule, un pareha Testigo, Viggo i Sonja, a biaha pa un otro teritorio no trahá—Ittoqqortoormiit (Scoresbysund) n’e costa oost di Groenlandia. Pa yega ei nan tabatin cu biaha pa Islandia, tuma un avion bai bek na Punto Constable n’e costa di Groenlandia, i caba bai cu helicopter.

“Esaki tabata e promé biaha cu Testigonan di Jehova a bini aki,” e dos pioneronan aki ta relatá, kende nan idioma nativo ta groenlandes. “Apesar di nan isolacion, e hendenan tabata sorprendentemente bon informá. Sin embargo, nan tabata contentu tambe pa siña cosnan nobo. Como contadornan dotá di istoria, nan tabata ansioso pa conta nos tocante nan yagmentu riba cachó di awa i otro experencianan den naturalesa.” Con nan a reaccioná n’e trabou di predicacion?

“Predicando di cas pa cas, nos a topa J——, kende ta duna les di catisashi. ‘Danki pa a incluí mi den boso bishitanan,’ el a bisa. Nos a mustr’é nos literatura i con pa us’é. E siguiente dia el a bini cerca nos i kier a siña tocante e nomber di Jehova. Nos a mustr’é un splicacion den un nota den su propio Bijbel groenlandes. Ora nos a bai, el a yama nos amigunan na Nuuk na telefon pa expresá su gratitud pa nos bishita. Nos mester purba sigui yuda e homber aki.

“Tambe nos a topa O——, un maestro di scol cu sa dje Testigonan di Jehova. El a duna nos dos ora pa papia cu su klas di mucha di 14 pa 16 aña di edad. Di manera cu nos a mustra nan nos video i a contestá nan preguntanan. Loke hovenan sa puntra—Contesta prácticaa i otro bukinan a bai manera pan cayente. Nos a topa tres dje muchanan mas despues. Nan tabatin bastante pregunta, i un di nan tabata specialmente interesá. El a puntra, ‘Con bo ta haci bira un Testigo? Siguramente mester ta bon pa ser manera boso. Mi tata tambe ta gusta loke boso ta haciendo.’ Nos a primintí di skirbié.

“Den un dje pueblonan, nos a topa un otro persona cu ta duna les di catisashi, M——, i nos tabatin un combersacion interesante. El a bisa cu lo e haci sigur p’e hombernan cu a bai yag ricibí nos literatura tan pronto cu nan bolbe. Pues awor e ta nos ‘publicador’ den e lugá remoto ei.”

Aunke e tabata un biahe pisá i di hopi buelta, e dos pioneronan a sinti cu nan esfuersonan a ser recompensá ricamente.

[Nota]