E Speransa di Henter Mi Bida—No Muri Nunca

MANERA HECTOR R. PRIEST A RELATA

“E cancer ta incurabel,” e dokter a bisa. “No tin nada mas cu nos por haci pa bo.” E diagnóstico ei a ser hací mas cu dies aña pasá. Sin embargo ainda mi ta tene e speransa basá riba Bijbel di biba pa semper riba tera sin muri nunca.—Juan 11:26.

MI MAYORNAN tabata metodistanan sincero cu regularmente a asistí na misa den un pueblo chikitu di cunucu, no muchu leu di nos hacienda di famia. Mi a nace den e bunita vaye di agricultura dje districto di Wairarapa, rond di 130 kilometer nortoost di Wellington, Nueva Zelandia. Einan nos a disfrutá di un paisahe di montañanan cu top di sneu, riunan di montaña cu awa cristalino, cerunan cu ta subi baha i yanuranan fértil.

Den e Iglesia Metodista, nos a ser siñá cu tur bon hende ta bai cielu pero cu mal hende ta bai fiernu, un lugá di tormento di candela. Mi no por a comprendé pakico, si Dios tabata kier pa hende biba den cielu, e no a pone nan einan for di principio. Semper mi tabatin miedu di morto i hopi bes mi a puntra mi mes pakico nos tin cu muri. Na 1927, ora mi tabatin 16 aña di edad, nos famia a sufri un tragedia. Esei ta loke a hibá mi na un búskeda di contestanan pa mi preguntanan.

Pakico Reg A Muri?

Ora mi ruman homber Reg tabatin 11 aña di edad, el a bira gravemente malu. E dokter no por a saca afó kico e tabatin i no por a yud’é. Mama a yama e pastor metodista. El a resa pa Reg, pero esaki no a consolá Mama. De facto, el a bisa e pastor cu su oracionnan no tabata eficas.

Ora Reg a muri, Mama tabata papia cu ken cu e topa pa trata na satisfacé su sed pa contestanan berdadero en cuanto pakico su yu homber hóben tabatin cu muri. Papiando un biaha cu un comerciante den stad, el a puntra e homber si e tabata sa algu tocante e condicion dje mortonan. E homber no tabatin ningun idea, pero el a bisa: “Un hende a laga un buki aki cu bo por bai cuné numa.”

Mama a bai cas cu e buki i a cuminsá les’é. E no por a pon’é abou. Gradualmente henter su disposicion a cambia. El a bisa e famia, “Esaki t’é; esaki ta e berdad.” E buki tabata The Divine Plan of the Ages [E Plan Divino dje Siglonan], e promé volúmen di Studies in the Scriptures. Mi tabata dudoso na principio i a purba argumentá contra e buki su presentacion dje propósito dje Creador. Eventualmente mi argumentonan a caba.

Aceptando Berdad Bíblico

Mi a pensa, ‘Imaginá bo biba pa semper, sin tin cu muri nunca!’ Un speransa asina ta loke lo bo spera di un Dios amoroso. Un tera paradísico! Sí, esaki tabata algu pa mi.

Despues di siña e berdadnan maraviyoso aki, Mama i tres ruman muher cristian di Wellington—Rumannan Thompson, Barton i Jones—tabata bai for di cas tin biaha pa dianan, plamando simia di Reino na tur parti den lugánan den cunucu. Aunke Tata no tabatin Mama su spiritu di misionero, el a apoy’é den su actividad.

Mi tabata convencí dje berdad, pero pa un periodo di tempu mi a haci poco tocante mi creencianan. Na 1935, mi a casa cu Rowena Corlett, i cu tempu nos a ser bendicioná cu un yu muher, Enid, i un yu homber, Barry. Mi a traha como cumprador di bestia di cria, cumprando miles di bestia for di e cunukeronan den becindario. Ora e cunukeronan aki tabata papia di política, mi tabata sintí mi bon ora mi bisa nan: “Ningun dje esfuersonan aki di hende lo tin éxito. E Reino di Dios ta e único gobiernu cu lo duna resultado.”

Lamentablemente, mi a bira adicto na tabaco; constantemente mi tabatin un sigá den mi boca. Cu tempu mi salú a bai atras i mi a ser hospitalisá cu problemanan di dolor di stoma. Nan a bisá mi cu mi tabatin inflamacion agudo di stoma i tripa, causá pa mi humamentu. Aunke mi a stop di huma, hopi biaha mi tabata soña cu mi tabata humando un sigá of sigaria eterno. Ki un adiccion teribel tabaco por ta!

Despues di a stop di huma, mi a haci otro ahustenan importante. Na 1939, ora mi tabatin 28 aña, mi a ser bautisá den e Riu Mangatai cerca di nos cas den cunucu. Robert Lazenby, kende despues tabatin supervision dje trabou di predicá na Nueva Zelandia, a biaha for di Wellington pa duna e discurso den nos cas i bautisá mi. Desde e tempu ei padilanti, mi a bira un Testigo di Jehova intrépido.

Organisando e Trabou di Predicá

Despues di mi bautismo mi a ser nombrá como superintendente dje Congregacion Eketahuna. Mi esposa, Rowena, ainda no a aceptá e berdad bíblico. Sin embargo, mi a lagu’e sa cu mi tabata bai invitá Alf Bryant pa bini for di Pahiatua pa mustrá mi con pa testificá corectamente di cas pa cas. Mi kier a organisá e trabou di predicacion i cubri nos teritorio sistemáticamente.

Rowena a bisa: “Hector, si bo ta bai testificá di cas pa cas, lo mi no ta aki ora bo bin bek. Mi ta bai lagá bo. Bo responsabilidad ta aki—na cas huntu cu bo famia.”

Mi no tabata sa kico pa haci. Vacilando, mi a bisti mi paña. ‘Mi mester hacié,’ mi a keda pensa den mi mes. ‘Mi bida ta dependé di dje i tambe e bida di mi famia.’ Pues mi a sigurá Rowena cu mi no kier a ofend’é den ningun manera. Mi a bis’é cu mi stim’é mashá, pero debí cu Jehova su nomber i soberania, como tambe nos mes bida, tabata enbolbí, mi simplemente mester a predicá den e manera aki.

Ami cu Alf a bai n’e promé porta, i el a hiba e delantera pa papia. Pero despues mi a haña mi mes ta tuma e combersacion over, contando e doño di cas cu loke a sosodé den dia di Noe ta un paralelo di loke ta sosodiendo den nos dia i cu nos lo tin cu haci algu pa sigurá nos salbacion. (Mateo 24:37-39) Mi a laga algun foyeto chikitu ei.

Bayendo dje cas, Alf a bisa: “Unda bo a saca tur e conocimentu ei? Bo no tin mester di mi. Abo bai bo so i nos lo cubri dos bes mas tantu teritorio.” Pues esei ta loke nos a haci.

Ora nos tabata bolbiendo bek cas, mi no tabata sa kico lo tabata spera nos. Pa mi sorpresa i goso, Rowena tabatin un kopi di té cla pa nos. Un dos siman despues mi esposa a uni cu mi den e ministerio público i a bira un ehempel excelente di celo cristian.

Entre e proménan pa bira Testigo di Jehova den nos vaye di agricultura tabata Maud Manser, su yu homber William, i su yu muher Ruby. Maud su esposo tabata un homber brutu cu un manera severo. Un dia ami cu Rowena a yega na nan hacienda pa bai cu Maud den e ministerio. E hóben William a haci areglo pa nos usa su auto, pero su tata tabatin otro ideanan.

E situacion tabata tenso. Mi a pidi Rowena pa tene nos yu muher baby, Enid. Mi a drenta den William su auto i core sak’é lihé for dje garashi segun cu Sr. Manser a pura pa trata na cera e porta di garashi promé cu nos lo por a sali. Pero e no a logra. Despues di core un distancia corticu for dje entrada, nos a para i mi a sali for dje auto pa topa un Sr. Manser furioso. Mi a bis’é: “Nos ta bayendo den e ministerio di veld i Sra. Manser ta bai huntu cu nos.” Mi a apelá na dje i su rabia a baha un poco. Pensando bek riba e caso ei, probablemente mi mester a trata e situacion na otro manera, pero despues el a bira mas faborabel pa cu Testigonan di Jehova, aunke cu nunca el a bira un Testigo.

Tabatin solamente un par di hende dje pueblo di Jehova den e añanan ei, i nos realmente a disfrutá i a beneficiá dje bishitanan di ministernan di tempu completo kendenan a keda cerca nos na nos hacienda. E bishitantenan aki a incluí Adrian Thompson i su ruman muher Molly, kendenan tur dos a asistí na un dje promé klasnan di Scol Bíblico di Galad di Watchtower pa misioneronan i a sirbi den asignacionnan den stranheria na Hapon i Pakistan.

Experencianan Durante Tempu di Guera

Na september 1939, Guera Mundial II a cuminsá i na october 1940, e gobiernu di Nueva Zelandia a prohibí e actividad di Testigonan di Jehova. Hopi di nos ruman hombernan cristian a ser hibá dilanti e cortenan dje pais. Algun a ser poné den camponan di trabou forsá i a keda isolá di nan esposa i yunan. Segun cu e guera a sigui, aunke nos tabatin un hacienda di produccion di lechi, mi tabata puntra mi mes si mi lo a ser yamá pa servicio militar, ya cu cunukeronan generalmente a ser dispensá di esei. Anto e anuncio a ser hací cu nan lo no a kita mas cunukero for di nan cunucu pa servicio militar.

Ami cu Rowena a sigui den nos ministerio cristian, cada un di nos dedicando mas cu 60 ora pa luna den e trabou di predicá. Durante e tempu aki, mi tabatin e privilegio di yuda hóbennan Testigo cu tabata mantené nan neutralidad cristian. Mi a presentá na nan fabor dilanti cortenan di Wellington, Palmerston North, Pahiatua i Masterton. Generalmente tabatin un miembro di clero den e conseho di reclutacion, i tabata un placer pa exponé nan apoyo no-cristian di henter e asuntu di guera.—1 Juan 3:10-12.

Un anochi miéntras cu ami cu Rowena tabata studiando E Toren di Vigilancia, detectivenan a haci un razia na nos cas. Un búskeda a saca na cla literatura bíblico den nos cas. “Boso por bai prizon pa esaki,” nos a ser informá. Ora e detectivenan a drenta den nan auto pa bai, nan a descubrí cu e breknan a lok i cu e auto no kier a move. William Manser a yuda nan drecha e auto i nunca mas nos no a tende di nan.

Durante e prohibicion, nos tabata sconde literatura bíblico den un edificio na un parti remoto di nos hacienda. Meianochi, mi tabata bai bishitá e oficina di sucursal di Nueva Zelandia i carga mi auto cu e literatura. Despues mi tabata trece e literatura cas i ward’é den nos edificio isolá. Un anochi ora mi a yega na e sucursal pa recogé un cargamentu secreto, henter e lugá di ripiente a yena cu claridad! Polis a grita: “Nos a gara bo!” Sin embargo, pa mi sorpresa nan a lagá mi bai sin haci muchu ferfelo.

Na 1949, ami cu Rowena a bende e hacienda i a dicidí di bai traha pionero te ora cen caba. Nos a muda pa un cas na Masterton i a traha pionero huntu cu e Congregacion Masterton. Dentro di dos aña a establecé e Congregacion Featherston cu 24 publicador activo, i mi a sirbi como e superintendente presidente. Anto, na 1953, mi a disfrutá dje privilegio di biaha pa Merca pa asistí na e congreso internacional di ocho dia di Testigonan di Jehova den Yankee Stadium na New York City. Rowena no por a compañá mi debi cu e mester a soru pa nos yu muher, Enid, kende tabata sufri di parálisis celebral.

Despues cu mi a bolbe bek Nueva Zelandia, mi mester a cuminsá traha trabou seglar. Nos a muda bek pa e Congregacion Masterton, caminda mi a ser nombrá como superintendente presidente. Rond dje tempu aki William Manser a cumpra e Teatro Chikitu na Masterton, i esaki a bira e promé Salon di Reino den e districto di Wairarapa. Durante añanan 50, nos congregacion a crece bon den sentido spiritual i den cantidad. P’esei, ora e superintendente di circuito tabata di bishita, hopi bes e tabata animá esnan maduro pa muda pa otro partinan dje pais pa yuda cu e trabou di predicá einan i un cantidad di persona a haci esei.

Nos famia a keda den Masterton i durante e siguiente décadanan, mi tabatin no solamente hopi privilegio den e congregacion sino tambe a disfrutá di asignacionnan tantu na congresonan nacional como internacional. Rowena celosamente a participá den e sirbishi di veld, constantemente yudando otronan pa haci mescos.

Soportando Pruebanan di Fe

Manera a ser bisá na comienso, na 1985, nan a diagnosticá cancer incurabel cerca mi. Cuantu ami cu mi fiel esposa, Rowena, huntu cu nos yunan, a deseá di ta entre e miyones di hende awor na bida cu lo no muri nunca! Pero e dokternan a mandá mi cas pa muri. Sin embargo, promé nan a puntrá mi con mi ta mira e diagnóstico.

“Mi ta bai mantené un curason calmu i ser optimista,” mi a contestá. En berdad, e proverbio bíblico a bira mi stabilisador: “Un curason calmu ta e bida dje organismo di carni.”—Proverbionan 14:30.

E specialistanan di cancer a elogiá e conseho bíblico ei. “E punto di bista mental ei ta 90 porciento dje cura den pashentnan di cancer,” nan a bisa. Tambe nan a recomendá siete siman di ‘bestraling.’ Felismente, cu tempu mi tabatin éxito den combatí e cancer.

Durante e tempu masha dificil aki, mi a haña un golpi teribel. Mi bunita i fiel esposa a sufri un ‘hersenbloeding’ i a muri. Mi a haña consuelo den e ehempelnan di esnan fiel registrá den e Scritura i den e manera cu Jehova a resolvé e problemanan pa nan segun cu nan a mantené nan integridad. Asina, mi speransa den e mundu nobo a keda briyante.—Romanonan 15:4.

No obstante, mi a bira deprimí i kier a stop di sirbi como anciano. E rumannan local a animá mi te ora cu atrobe mi tabatin e forsa pa sigui padilanti. Como resultado, mi por a sirbi continuamente como anciano i superintendente cristian pa e último 57 añanan.

Enfrentando e Futuro cu Confiansa

Sirbiendo Jehova tur e añanan aki tabata un privilegio incalculabel. Cuantu bendicion mi tabatin! No ta parce hopi tempu pasá cu, como mucha di 16 aña di edad, mi a tende mi mama sclama: “Esaki t’é; esaki ta e berdad!” Mi mama a keda un Testigo fiel i celoso te na su morto na 1979, ora e tabatin mas cu 100 aña di edad. Su yu muher i seis yu hombernan tambe a bira Testigonan leal.

Mi deseo ardiente ta pa biba pa mira Jehova su nomber ser kitá di tur reproche. Lo mi realisá e speransa di henter mi bida di no muri nunca? Naturalmente, nos tin cu wak esei ainda. Sin embargo, mi ta sigur cu hopi, sí, miyones di hende eventualmente lo experenciá e bendicion ei. Pues tanten cu mi ta sigui na bida, lo mi atesorá e prospecto di ser contá entre esnan cu lo no muri nunca.—Juan 11:26.

[Plachi na página 28]

Mi mama

[Plachi na página 28]

Cu mi esposa i yunan