Irina Su Buki di Cantica Faborito

NO MUCHU tempu pasá, Irina, un mucha muher di nuebe aña bibando na Sofia, Bulgaria, a ser bautisá como un Testigo di Jehova. E ta gusta canta i particularmente ta disfrutá di e canticanan den e buki Canta Alabanza na Jehova. P’esei Irina a pone un meta pa siña un par di cantica for di cabes tur luna.

Un di Irina su vaknan faborito na scol ta muzik. P’esei su maestra di muzik a keda tolondrá ora Irina a nenga un oferta pa canta den e coro di scol. Pakico Irina a nenga? El a realisá cu hopi dje muzik cu lo e mester canta ta glorificá héroenan nacional i dianan di fiesta di orígen pagano. Algun cantica asta ta boga pa rebelion i violencia pa promové idealnan nacional. E maestra no por a comprendé Irina su punto di bista riba e asuntu aki. Irina a dicidí na skirbi su maestra un carta splicando su conviccionnan religioso—pero sin éxito.

lrina su tata tabatin un idea. El a duna e maestra un copia dje buki Canta Alabanza na Jehova, conteniendo e canticanan cu Irina ta gusta canta. Un par di dia despues, e maestra a yama Irina den e klas di muzik. El a pidi Irina pa canta algun di su canticanan faborito for dje buki—den presencia di su compañeronan di klas—segun cu e maestra a compañ’é riba piano. E presentacion a dura mas cu un ora! E maestra tabatin cu admití cu Irina su buki di cantica faborito tabatin algun melodia hopi bunita.