Singapur Ta Trapa Libertad di Adoracion

RIBA e anochi di 24 di februari, 1995, cuater cas den e stad di Singapur a ser invadí dor di polis. Un total di 69 hende a ser arestá.a Entre nan tabatin un señora di 71 aña di edad i dos hobencita di 15 aña di edad. Pakico? Esei tabata debí na actividad criminal of subversivo? No. Ningun di nan tabata metí den nada cu den e sentido di mas remoto por a ser considerá peligroso, inmoral of asocial. Nan no a representá ningun menasa p’e balornan moral, siguridad i bienestar di nan co-ciudadanonan di Singapur. Sin embargo, despues di a sakea e cuater casnan, e polisnan a bai cu e 69 personanan, kendenan a bini huntu pa studia Bijbel i disfrutá di un reunimentu social, n’e warda di polis. Aya nan a ser tené henter anochi, nan a ser interogá, nan fingerprint a ser tumá i nan potret a ser sacá—sí, terorisá manera criminal comun! Durante e tempu aki—18 ora largu na tur den condicionnan miserabel—nan no tabatin mag di haña asistencia legal i asta a ser prohibí pa haci un yamada di telefon pa bisa nan miembronan di famia unda nan tabata. Bo por djis imaginá bo con tal accion rápidamente ehecutá a afectá e ciudadanonan pacífico i obediente na ley aki!

E senario ta pone un hende corda bek e condicionnan durante e dianan scur di Alemania Nazista i e época brutal di comunismo na Union Soviético i Europa Oriental. Esei no ta loke un bishitante casual na Singapur lo spera di haña den e estado moderno ei di un solo stad masha limpi i próspero. Singapur a edificá un reputacion como un maraviya di siglo 20 di progreso económico i social. E ta un democracia conocí públicamente cu tin un constitucion cu ta garantisá su ciudadanonan derechonan humano básico, incluyendo libertad di expresion, religion i di reuní huntu.

Sin embargo, esnan arestá den februari tabata e blanco dje accion únicamente pasobra nan tabata Testigonan di Jehova cu tabata reuní huntu pa studia Bijbel i compartí compañerismo cristian. E acusacion contra nan tabata “asistencia na un reunion di un sociedad ilegal.”

En realidad, Testigonan di Jehova a ser nengá reconocimentu legal na Singapur for di 1972 ora e Congregacion di Singapur a ser sacá for dje registro oficial i e literatura, incluyendo Bijbelnan, publicá dor di Watch Tower Bible and Tract Society a ser poné bou di prohibicion. Ningun oportunidad a ser duná pa cuestioná e suposicionnan riba cua e accion ei a ser tumá. Recientemente, e legalidad dje discriminacion oficial aki a ser cuestioná den corte di Singapur den e caso di cuater Testigo kendenan a ser condená na februari 1994 pa posesion di literatura bíblico prohibí. E apelacion contra nan condenanan a ser tendé na augustus 1994 i a ser rechasá sin muchu tardansa. E Hues Principal Yong Pung How dje Corte Supremo a publicá su opinion e siguiente luna. El a opiná cu no tabatin ningun violacion di libertad religioso i cu e condenanan tabata hustificá riba e base cu Testigonan di Jehova tabata un menasa pa siguridad nacional pa motibu cu nan miembronan lo no participá den sirbishi militar. Dia 17 di februari, 1995, e cuater Testigonan a busca permit pa apelá e decision desfaborabel aki n’e Corte di Apelacion di Singapur. E peticion a ser nengá.

E último decision aki a ricibí hopi atencion den e corantnan controlá dor di gobiernu di Singapur. Sin duda e decision di corte aki i e publicidad cu a resultá for di dje a duna un indicacion delantá dje sucesonan cu a sigui despues. Dentro di un siman e aresto dje 69 Testigonan a tuma lugá. E acusacion contra cuater di esakinan—ciudadanonan di Francia, Inglatera i Luxemburgo—a ser cancelá mas despues. Sin embargo, asta pa e cuaternan aki, e experencia tabata spantoso. Un homber a biba i traha na Singapur pa hopi aña cu su casá. Nan a perde nan trabou i nan cas di huur i tabata forsá pa despidí di hopi amigu íntimo.

E 63 adultonan cu a sobra a ser acusá di ta pertenecé na un sociedad prohibí, i algun a ser acusá tambe pa posesion di literatura prohibí. Nan ta enfrentá un máximo di tres aña den prizon of un but di S$ 3.000 (NAƒ. 3.780) of ámbos. E dos hobencitanan di 15 aña di edad a aparecé separadamente den corte hubenil.

Ningun Menasá pa Identidad i Unidad Nacional

Rond mundu, den e mas cu 200 paisnan unda nan ta biba, Testigonan di Jehova ta conocí como un hende decente, onesto, obediente na ley. Nan ta ser reconocé pa nan nengamentu firme pa tuma parti den cualkier clase di actividad subversivo i antigobiernu—accion no-cristian cu por resultá den nan expulsion of scomulgacion. En berdad, e gobiernu di Singapur no tin nada di teme for di nan. Den ningun manera nan ta un menasa p’e siguridad nacional di Singapur of sentido di identidad i unidad nacional. (Romanonan 13:1-7) Esaki a ser declará claramente den un carta fechá 21 di mart, 1995, for di Milton G. Henschel, presidente di Watch Tower Bible and Tract Society, pa Promé Minister Goh Chok Tong di Singapur. E carta aki a ser reproducí aki p’e beneficio di nos lectornan.

Amantenan di libertad den comercio, gobiernu i sector privá lo ta vigilando cu interes pa mira con e situacion aki na Singapur ta desaroyá. E gobiernu di Singapur lo actua na armonia cu e derechonan i libertadnan humano básico na cua su propio constitucion i e comunidad internacional di nacionnan ta pega? Siguramente, Testigonan di Jehova rond mundu ta profundamente preocupá tocante nan co-adoradornan na Singapur. Nan ta corda nan den nan oracionnan i ta tene na mente e siguransa hañá den Bijbel: “Jehova ta un amante di husticia, i lo e no bandoná su lealnan.”—Salmo 37:28.

[Notanan]

[Kuadro na página 30]

21 di mart, 1995

Goh Chok Tong

Promé Minister

Istana Annexe

Singapur 0923

República di Singapur

Lee Kuan Yew

Promé Minister

Oficina di Promé Minister

460 Alexandra Road

37-00 PSA Bldg

Singapur 0511

República di Singapur

Apreciable señornan,

Un informe recien di Reuters for di Singapur, fechá 25 di februari, 1995, tabata sumamente preocupante. El a informá cu reunionnan di studio di Bijbel di Testigonan di Jehova a ser interumpí dor di polis i 69 hende a ser arestá. E informe aki a enfocá atencion di mundu riba e situacion di Testigonan di Jehova na Singapur, unda nan actividadnan i literatura a ser prohibí pa mas cu 20 aña.

Ta difícil pa comprendé pakico un organisacion religioso cu ta funcioná abiertamente cu proteccion completo di ley den mas cu 200 pais mester ser prohibí na Singapur, un pais cu ta pega n’e principionan di democracia. E ta asta mas preocupante en bista di Singapur su garantia constitucional di libertad di adoracion pa su ciudadanonan.

Testigonan di Jehova nunca tabata un menasa pa siguridad nacional ningun caminda. En berdad, rond mundu nan tin e reputacion di ser pacífico, industrioso, moralmente recto i obediente na ley—cualidadnan cu mi tin sigur cu abo ta promové den bo pais.

Ta cierto cu den nan pegamentu estricto na normanan bíblico pa cristiannan, e posicion di Testigonan di Jehova algun biaha a ser malentendí of malrepresentá. Pero, esei no tabata cierto dje fundador di cristianismo kende tambe a ser malrepresentá como siendo contra “César,” e gobiernu di su tempu? Testigonan di Jehova simplemente ta sigui e ehempel di Jesus i di e cristiannan di promé. Nan ta respetá e gobiernu unda nan ta biba, ta paga nan belasting i ta promové bon moralnan. Nan ta ciudadanonan conciencial i recto. Nunca Testigonan di Jehova a tuma parti den ningun clase di actividad subversivo den ningun pais i mi por sigurá bo cu nan presencia na Singapur no ta presentá ningun menasa p’e interesnan nacional di bo pais.

Debí na informenan recien di medionan di comunicacion, e medidanan represivo tumá contra Testigonan di Jehova na Singapur dor di bo gobiernu ta generalmente conocí awor. E ta specialmente un asuntu di preocupacion pa nan 12 miyon asociadonan rond mundu. Mi ta pidí bo pa usa bo autoridad ehecutivo pa remediá e situacion i permití Testigonan di Jehova den bo pais e libertad di adoracion i concenshi cu e Constitucion ta garantisá.

Mi ta kere cu un combersacion franco cu representantenan di Testigonan di Jehova lo yuda core cu cualkier malcomprendimentu tocante nos organisacion i nos actividad i lo trankilisá bo cu gobiernu di Singapur no tin nada di teme for di Testigonan di Jehova. Gustosamente lo mi areglá un reunion asina.

Sperando bo contesta.

Atentamente,

Milton G. Henschel

Presidente

[Plachi Rekonosementu na página 31]

Nik Wheeler/H. Armstrong Roberts