Resisti Tradicionnan No-biblico!

“E BERDAD lo haci boso liber,” Jesucristo a bisa. (Juan 8:32) Sí, cristianismo ta haci hende liber​—⁠liber di sclabitud na supersticionnan, liber di creencia den doctrinanan i speransanan falsu i liber di sclabitud na prácticanan degradá.

Sin embargo, mescos cu den tempu di antigwedad, cristiannan awe hopi bes ta confrontá presion pa bolbe na tradicionnan di ántes. (Galationan 4:​9, 10) Esaki no kier men cu tur custumber popular ta perhudicial. En berdad, un cristian por scoge pa sigui custumbernan local cu ta saludabel i probechoso. Pero ora custumbernan ta bai contrali na e Palabra di Dios, cristiannan no ta comprometé. Testigonan di Jehova pues ta bon conocí pa nan nengamentu pa participá den celebracionnan di pascu, cumpleaño i otro custumbernan cu ta na conflicto cu e Palabra di Dios.

E posicion di curashi aki hopi bes a resultá den hopi bofon i oposicion di parti di conocí, bisiña i miembronan di famia no-creyente. Particularmente esaki tabata e caso den algun pais africano, caminda un surtido grandi di tradicion comunmente ta ser observá na entiero, casamentu i nacementunan. E presion pa conformá ta formidabel​—⁠hopi bes incluyendo menasanan i actonan di violencia. Con cristiannan einan por para firme? Ta posibel pa evitá confrontacion sin comprometé? Como contesta, laga nos examiná con cristiannan fiel a trata cu algun tradicion no-bíblico.

Custumbernan Supersticioso di Entiero

Na parti zuid di Africa tin cantidad di tradicion relacioná cu entiero. Esnan cu a perde nan hendenan stimá comunmente ta pasa henter e anochi​—⁠of vários anochi​—⁠na e cas di luto, caminda nan ta tene un candela constantemente cendí. Nan no tin mag di cushiná, corta cabei of ni sikiera dal un baño sino te despues dje entiero. Despues, nan tin cu laba nan curpa cu un mescla special di yerba. Tal custumbernan ta aceptabel pa cristiannan? No. Nan tur ta reflehá creencia den e inmortalidad dje alma i un temor teribel pa cu e mortonan.

Eclesiástes 9:5 ta bisa: “Hende bibu ta conciente cu nan lo muri; pero en cuanto hende morto, nan no ta conciente di nada en absoluto.” Conociendo e berdad aki ta libra un persona di tin miedu dje ‘spiritu dje mortonan.’ Pero kico un cristian mester haci ora famianan cu bon intencion ta exigí p’e participá den tal ritonan?

Considerá e experencia di un Testigo africano yamá Jane, kende su tata a muri. Ora el a yega na e cas di entiero, inmediatamente nan a bis’é cu e i e resto dje famia mester baila rond dje cadaver henter anochi pa asina calma e spiritu dje defuntu. “Mi a bisa nan cu como un Testigo di Jehova, lo mi no por tuma parti den tal prácticanan,” Jane ta conta. “Sin embargo, e siguiente dia despues dje entiero, famianan di mas edad a bisa cu nan tabata bai baña e miembronan di famia cu a perde e persona stimá como mas proteccion contra e spiritu dje defuntu. Atrobe mi a nenga di participá. Na mésun tempu, nan a tene Mama isolá den un cas. Ken cu kier a mir’é mester a bebe promé un bebida alcohólico prepará pa tal propósito.

“Mi a nenga di bira enbolbí den cualkier dje cosnan aki. En bes di esei mi a bai cas pa prepará algu di come, locual mi a hiba na e cas caminda Mama tabata kedando. Esaki realmente a desapuntá mi famia. Mi famianan a pensa cu mi no tabata normal.” Mas cu esei, nan a haci bofon di Jane i a maldicion’é, bisando: “Ya cu bo a rechasá nos tradicion pa motibu di bo religion, lo bo ser molestiá dor dje spiritu di bo tata. En realidad, kisas lo bo no por ni sikiera haña yu.” Tog, Jane a nenga di ser intimidá. E resultado? Jane ta bisa: “Tempu dje entiero mi tabatin dos yu. Awor mi tin seis! Esaki a brongosá esnan cu a acusá mi pretendé?? cu nunca mas lo mi haña yu.”

“Purificacion” Sexual

Un otro custumber ta enbolbé purificacion ceremonial despues dje morto di un persona su casá. Si un esposa muri, famia dje esposa lo trece p’e biudo un cuñá of un otro muher cu ta famia pegá di su defuntu esposa. E esposo ta obligá di tene relacion sexual cuné. Solamente despues di esei e por casa cu ken cu e ta deseá. Mescos ta tuma lugá ora un muher su esposo fayecé. Nan ta kere cu e práctica ei ta purificá e casá na bida dje “spiritu” dje casá defuntu.

Cualkier persona nengando di pasa dor di tal “purificacion” ta risca di trece riba dje e rabia dje famia. E por keda isolá i ser sometí na bofon i pronunciacionnan di desgracia condena??. No obstante, cristiannan ta nenga di sigui e custumber aki. Nan sa cu en bes di ta un clase di “purificacion,” sex pafó di matrimonio ta haci un persona sushi den bista di Dios. (1 Corintionan 6:​18-20) Ademas, cristiannan mester casa “solamente den Señor.”​—⁠1 Corintionan 7:⁠39.

Un muher cristian di Zambia yamá Violet su esposo a muri. Despues, famianan a trece un homber p’e, insistiendo cu e mester tene relacion sexual cu e homber. Violet a nenga i como castigu nan a prohibi’é di saca awa for dje pos público. Tambe nan a spiert’é p’e no cana riba e caminda principal, sino cos malu ta pasa cuné. Sin embargo, Violet a nenga di ser intimidá sea dor di famia of otro habitantenan dje pueblito.

Despues Violet a ser yamá dilanti un corte local. Ei el a splica sin vacilá su motibunan bíblico pa nenga di participá den sex ilegal. E corte a dicta fayo na Violet su fabor, bisando cu corte no por fors’é pega na custumber i tradicionnan local cu ta bai contrario di su creencianan. Ta interesante cu Violet su nengamentu firme pa comprometé a yuda baha e presion riba otro Testigonan den e pueblito kendenan despues a enfrentá e mésun cuestion.

Un Testigo africano yamá Monika a resistí presion similar despues cu su esposo a muri. Famianan dje homber a insistí pa dun’é un otro casá. Monika ta bisa: “Mi a nenga, determiná pa obedecé e mandamentu na 1 Corintionan 7:39.” Sin embargo e presion no a stop. “Nan a menasá mi,” Monika ta corda. “Nan a bisa: ‘Si bo nenga di casa cu e homber aki, nunca mas lo bo casa atrobe.’ Asta nan a pretendé cu algun di mi compañeronan cristian a ser purificá ceremonialmente den e manera aki.” No obstante, Monika a para firme. “Mi a keda soltero pa dos aña, despues di cua mi a bolbe casa den un manera cristian,” e ta bisa. Monika awor ta sirbi como un pionero regular.

Perdementu di Barica i Yunan Cu Nace Morto

Cristiannan den parti zuid di Africa tambe mester trata cu custumbernan rond di perdementu di barica i yunan cu nace morto. Tal sucesonan trágico ta e resultado di imperfeccion humano​—⁠no di castigu divino. (Romanonan 3:23) Pero si un muher perde un barica, algun tradicion africano ta exigí pa e ser tratá como un ‘persona no-deseá’ pa un periodo di tempu.

Un señora cu recientemente a perde un barica a keda sorprendí pues pa mira un ruman homber Testigo canando ta bini den direccion di su cas. Segun cu e Testigo a yega cerca, el a grit’é: “No bini aki! Segun nos custumber un muher cu a caba di perde un barica supuestamente no tin mag di haña bishita.” Sin embargo, e Testigo a bis’é cu Testigonan di Jehova ta hiba e mensahe di Bijbel na tur clase di hende i cu nan no ta warda e custumbernan local relacioná cu perdementu di barica. Anto el a lesa p’e Isaías 65:​20, 23, splicando cu bou dje Reino di Dios perdementu di barica i yunan cu nace morto lo no sosodé. Como resultado, e muher a aceptá un studio di Bijbel na cas.

Custumbernan supersticioso tambe por compañá e entiero di babynan cu nace morto. Ora un Testigo di nomber Joseph a asistí na un entiero asina, nan a bis’é cu tur presente mester laba nan man den algun yerba i hunta e remedi riba nan pechu. Nan a bisa cu esaki tabata pa prevení e “spiritu” dje criatura di bini bek i causa nan daño. Joseph respetuosamente a nenga, conociendo e siñansa bíblico di cu e mortonan no por haci daño na e bibunan. Tog, ainda algun a trata na presion’é pa hunta e remedi. Joseph a bolbe nenga. Ora otronan presente a mira e posicion sin miedu dje cristian aki, nan tambe di igual manera a nenga di usa e yerbanan.

Evitá Confrontacionnan, Pero Para Firme

Temor di hende bibu i un miedu di ser hací un paria persona indeseá?? por ta forsanan poderoso pa comprometé. Proverbionan 29:25 ta bisa: “Temblamentu pa motibu di hende ta loke ta pone un las.” E experencianan anterior ta demostrá e berdad dje último parti dje versículo ei: “Pero esun cu ta confia den Jehova lo ser protehá.”

No obstante, confrontacion hopi bes por ser evitá. Por ehempel, si un cristian ta ser invitá na entiero di un famia, e no mester warda te ora e haña su mes den situacion potencialmente comprometedor. “Esun spiertu a mira e calamidad i a sconde su mes; esun inexperenciá cu a sigui padilanti a sufri e castigu.”​—⁠Proverbionan 27:⁠12.

Lo ta sabí pa puntra cu tacto cua custumbernan precis lo ser siguí. Si esakinan ta contra principionan bíblico, e cristian lo por usa e oportunidad aki pa djis splica pakico e no por participá, haciendo esei “cu un genio suave i respet profundo.” (1 Pedro 3:15) Ora un cristian respetuosamente ta splica di antemano su posicion basá riba e Bijbel, su famianan generalmente ta mas incliná pa respetá su creencianan i ménos incliná pa usa menasanan i intimidacion.

Sea cual sea e reaccion di famianan, un cristian simplemente no por comprometé dor di sigui tradicionnan cu ta desonrá Dios​—⁠sin importá ki menasa of abusu por ser montoná riba dje. Nos a ser librá for di temor supersticioso. Apostel Pablo a insta: “Cristo a libra nos pa tal libertad. P’esei, para firme, i no laga boso mes ser cerá atrobe den un yugo di sclabitud.”​—⁠Galationan 5:⁠1.

[Plachi na página 29]

Hopi hende ta kere cu un persona cu a caba di muri por actua como un intermediario i entregá mensahenan na famianan cu tin hopi tempu morto