Famianan Fiel Ta Acelerá e Aumento na Sri Lanka

CONOCI como Ceylon te cu 1972, Sri Lanka ta un isla encantador cu playanan dorná cu palu di coco, rij di cerunan i desiertonan chikitu. Den e parti montañoso, Samanala [Cumbre di Adam], na 2.243 meter di haltura, tin un sitio cu ta sagrado pa cuater religion principal.a Cerca di ei tin Fin di Mundu, un precipicio steil caminda e barancanan ta baha mas cu 1.500 meter. E sitio ta ofrecé un dje bistanan mas espectacular di Sri Lanka.

Sri Lanka su 18 miyon habitantenan tin un antecedente interesante en comun. Desde siglo cincu P.E.C., hende di desendencia indo-europeo for di parti nort di India a pobla e isla. Nan tabata e singalesnan, formando awor tres cuarta parti dje poblacion. Despues, durante un periodo desde e promé siglonan di E.C. te cu siglo 12, a bini un ola di tamilnan for di parti zuid di India; esakinan ta biba awor principalmente na parti nort i oost dje isla. E portuguesnan, hulandesnan i britániconan tambe a laga nan marca for dje era colonial. Ademas, comerciantenan biahando riba laman for di e penínsulanan di Arabia i Malaya a establecé nan mes entre e pueblo local. Tambe tin establecimentunan di europeo, parsis, chines i otronan.

Apart dje mescla racial, idioma i religion na Sri Lanka ta reflehá su antecedente diversificá. E idiomanan principal riba e isla ta singales, tamil i ingles. Hopi habitante di Sri Lanka ta papia por lo ménos dos dje tres idiomanan. Antecedentenan étnico tambe ta hunga un papel importante den e religion dje pueblo. Mayoria singales ta budista, miéntras cu mayoria tamil ta hindú. Esnan cu lasonan arabir of malayo generalmente ta pega na islam i esnan cu antecedente europeo generalmente ta miembro di iglesianan di cristiandad, católico i protestant.

Enfrentando e Desafio

Tur esaki ta presentá un tremendo desafio pa Testigonan di Jehova na Sri Lanka. Esakinan ta traha duru pa cumpli cu e comision di Jesus: “E bon nobo aki dje reino lo ser predicá den tur e tera habitá como testimonio pa tur nacion.” (Mateo 24:14) Ademas di tin cu trata cu vários idioma, publicadornan dje bon nobo por haña nan ta papia cu budista, hindú, miembronan di iglesianan di cristiandad como tambe ateistanan​—⁠tur dentro di un par di ora di predicacion.

Pa ser eficas den nan ministerio, e publicadornan mester tin huntu cu nan e revistanan Toren di Vigilancia i Spierta! i otro literatura bíblico na idioma tamil, singales i ingles. Esnan suficiente fuerte pa carga cos pisá asta tin huntu cu nan Bijbelnan den e idiomanan ei. E publicadornan recientemente tabata sumamente contentu ora e foyetonan Dios Realmente Ta Interesá den Nos? i Our Problems​—⁠Who Will Help Us Solve Them? i e tratado E Mundu Aki Lo Sobrebibí? a ser publicá den e tres idiomanan simultáneamente. Esaki a nificá mas herment pa e ministerio.

E Testigonan a bin ta traha duru desde 1912, ora cu Charles Taze Russell, n’e tempu ei presidente dje International Bible Students Association, a bishitá Ceylon brevemente. Sin embargo, crecementu significativo mester a spera e yegada dje graduadonan di e Scol Bíblico di Galad di Watchtower na 1947. Desde e tempu ei, e publicadornan na Sri Lanka a disfrutá di resultadonan excelente for di nan trabou di predicá. Na 1994 e 1.866 publicadornan di Reino a conducí un promedio di 2.551 studio bíblico na cas tur luna. I e asistencia na Memorial di 6.930 persona tabata casi cuater biaha e cantidad di publicador den tur e congregacionnan. Ki un bendicion maraviyoso!

Na comparacion cu algun otro pais, e progreso na Sri Lanka por parce di ta slow. Un factor ta parce di ta e relacionnan fuerte di famia. Sin embargo, relacionnan di famia por ta bentahoso tambe. Ora e oficial di ehército romano Cornelio a tuma su posicion na fabor dje berdad, su famia a tuma nan posicion huntu cuné. (Echonan 10:​1, 2, 24, 44) E buki di Echonan ta mencioná tambe otro famianan cristian fuerte, incluyendo esnan di Lidia, Crispo i e carcelero di Pablo i Sílas.​—⁠Echonan 16:​14, 15, 32-34; 18:⁠8.

En berdad, relacionnan fuerte di famia por ta bentahoso caminda tin bon organisacion i fiel persistencia. Cu e palabranan di Isaías 60:22 na mente, Ray Matthews, un misionero pa hopi tempu, ta comentá: “Ta parce cu Jehova awor ta acelerando cos na e debido tempu, no solamente mediante individuonan sino tambe mediante famianan.”

Famia Organisá Ta Trece Alabansa

Siguramente tin tal famianan fiel den Sri Lanka awe. Por ehempel, tin e famia Sinnappa, cu ta bon organisá i cu ta biba na Kotahena, un zona di Colombo, e stad principal di Sri Lanka. Aunke e cabes di famia, Marian, a muri no muchu tempu pasá, su esposa, Annamma i 12 di nan 15 yunan, variando den edad di 13 pa 33 aña, ta sigui sirbi Jehova como un famia. Actualmente, ocho dje yunan ta bautisá i tres di nan ta den e ministerio di tempu completo, sirbiendo como pioneronan regular. Tres otro a yega di traha den e sirbishi di pionero auxiliar de bes en cuando. Entre esnan mas hóben dje famia tin cuater publicador no-bautisá. Ademas, cuater nietu, aunke ainda hopi yong, ta studiando e Bijbel i asistiendo na reunionnan cristian den e Congregacion Nort Colombo di Testigonan di Jehova.

Tabata na 1978 cu Annamma a tende e bon nobo di reino pa promé biaha ora el a aceptá un copia di E Toren di Vigilancia. A cuminsá un studio di Bijbel i despues di a completá e buki pa yuda studia Bijbel E berdad cu ta hiba na bida eterna, Annamma a dedicá su bida na Jehova Dios i a ser bautisá, poniendo asina e ehempel inicial pa hopi miembro di su famia.

Mescos cu e homber militar Cornelio, Annamma tin bon organisacion den su famia. “Nos mester a planea pa reunion i asambleanan cristian​—⁠pa no papia mes di scol,” Annamma ta corda. “Paña tabata un problema, pero cu Jehova su bendicion nos por a cose paña nobo pa tur asamblea. Henter e famia a yega bon bistí i barica yen​—⁠i cu un sonrisa grandi tambe.”

E yunan ta corda nan organisacion di famia cu cariño. Pa yuda henter e famia asistí na reunionnan cristian, e yunan mas grandi generalmente tabata ser duná responsabilidadnan special. Por ehempel, Mangala tabata laba paña i Winnifreda tabata strika. Winnifreda, kende tambe tabata yuda esnan mas yong bisti, ta bisa: “Tur hende a keda nechi bistí ora nan tabata saliendo cas.”

Percuracionnan spiritual di igual manera tabata bon organisá. Yu muher Pushpam, awor un pionero regular, ta corda: “Tur dia, nos famia a disfrutá di lesa e Bijbel i repasá e texto di dia huntu.” Annamma ta agregá: “Cada yu tabatin un copia personal dje Bijbel, E Toren di Vigilancia i otro publicacionnan. Mi ta scucha cuidadosamente na tur nan comentarionan na e reunionnan. Caminda ta parce necesario, mi ta sigui papia riba dje na cas cu animacion i coreccion. Anochi nos ta uni huntu pa terminá e dia cu nos oracion di famia.”

E yunan mas grandi ta di balor incalculabel den yuda Annamma percurá un excelente educacion cristian pa tur den e famia. E programa yen, sin embargo, no ta stroba nan deseo pa compartí e bon nobo pafó di cas. Na tur, vários miembro dje famia ta conducí 57 studio bíblico na cas cu hendenan den e becindario. Suegro Rajan ta remarcá: “E famia ta conducí studionan bíblico progresivo. Mi esposa, Pushpam, ya caba tabatin e privilegio di mira un di su studiantenan dedicá su bida na Jehova.”

A causa un conmocion grandi den Kotahena ora un famia asina grandi a bandoná e Iglesia Católico Romano. Aunke e pastor mes nunca a bishitá e famia pa haña sa pakico nan a bandoná e iglesia, el a pidi miembronan laico dje iglesia pa investigá. E resultado tabata vários consideracion, mayoria tocante e doctrina di Trinidad. Annamma semper a dependé riba Jehova i e Bijbel pa defendé su fe. Su texto bíblico faborito den e consideracionnan aki tabata Juan 17:⁠3.

E famia Sinnappa claramente ta demostrá cu bon organisacion i esfuerso consistente por trece resultadonan satisfactorio. Mediante nan esfuersonan celoso, un generacion nobo di publicadornan di Reino ta creciendo, tur na alabansa di Jehova.

Oposicion Ta Uni Famia den Adoracion Berdadero

E famia Ratnam ta biba un par di kilometer leu for di famia Sinnappa, na Narhenpitya, un otro zona di Colombo. Nan tambe anteriormente tabata católico romano. Na 1982, Testigonan cu tabata participando den e ministerio di cas-pa-cas a haña contacto cu Balendran, esposo dje yu muher mayor, Fatima. A cuminsá un studio di Bijbel cu henter e famia. Pronto nan tres yunan tabata puntra Wela Ignasiamal tocante e nomber di Dios. Ora e muchanan a duna como contesta “Jehova,” nan a lanta Wela su interes i a cuminsá un studio bíblico cuné. Despues, dos yu muher di dje, Jeevakala i Stella, a uni den e studio i pa 1988 nan tur tres a ser bautisá.

Miéntras tantu, Balendran i Fatima a compartí e berdad cu un otro ruman muher di Fatima, Mallika i su esposo, Yoganathan. Pa 1987 e pareha aki a ser bautisá i nan a inculcá den nan dos yunan un creciente amor pa Jehova. Pushpa, un otro ruman muher di Fatima, siguientemente a drenta e berdad. El a haci su dedicacion i a ser bautisá na 1990. Miéntras e tabata na Tokyo, su esposo, Eka, a sirbi cu un congregacion ingles i Pushpa a yuda nan yu homber chikitu, Alfred, pa ser criá den e caminda di Jehova.

Te asina leu, cuater dje dies yunan dje famia Ratnam a tuma nan posicion na fabor di adoracion berdadero. Felismente, tres mas ta haciendo bon progreso den nan studio bíblico personal. Entre e 11 nietunan, un mucha muher, Pradeepa, ya caba ta bautisá. Siete otro mas yong regularmente ta ser instruí mediante nan studio bíblico di famia. Ademas, un total di 24 studio bíblico na cas ta ser conducí cu personanan interesá den e becindario.

Tur esaki no a sosodé fácilmente. Na principio, tabatin oposicion di famia. E tata, Muthupillai, i e rumannan homber mas grandi tabata masha contra pa cualkier un di nan famia asistí na e reunionnan na e Salon di Reino of participá den e trabou di predicacion público. Maske parti dje oposicion aki tabata relacioná cu preocupacion tocante siguridad personal, Muthupillai ta agregá: “Mi tabata completamente dedicá na e ‘santunan’ i mi no a aprobá pa mi famia bandoná e Iglesia Católico.” Sin embargo, awor e ta kere cu nan ta adorando e Dios berdadero pasobra e por mira e beneficionan cu nan fe a trece pa nan.

Por ehempel, un biaha nan doño di cas budista a purba saca nan for di su propiedad usando bruheria riba nan. El a bini un anochi i a pone algun lamunchi cu ta poseé e bruheria rond dje cas. Miedu a poderá dje bisiñanan supersticioso i nan tur tabata en spera di un of otro suceso infelis cu lo a afligí e famia Ratnam. Sin embargo, ora Ignasiamal a descubrí esaki, e i e muchanan simplemente a kita e lamunchinan sin ningun miedu of inkietud​—⁠i nada malu a sosodé cu nan. Nan accion sin miedu a sirbi como un testimonio basta grandi den e área, poniendo hende tene gran respet pa nan. Stella a haña chens di cuminsá dos studio bíblico na cas cerca e famianan ei banda. Animá dor di esaki, suegra Nazeera tambe a aceptá un studio bíblico.

Mirando atras riba e hopi bendicionnan cu a bini riba su famia, Ignasiamal ta remarcá: “Mi ta masha contentu pa mira e crecementu spiritual den e famia. Nos a ser bendicioná dor di Jehova pasobra oposicion a suavisá i nos unidad di famia a aumentá.”

Ki un bendicion e famianan grandi aki a resultá di ta. Nan a uni nan bosnan na esnan dje famianan mas chikitu, e famianan di un solo mayor i na e cristiannan soltero kendenan ta luchando duru pa acelerá e proclamacion dje bon nobo di Reino den “e tera resplandeciente,” locual e nomber Sri Lanka ta nificá na idioma singales. Huntu cu nan compañeronan cristian na tur parti di mundu, e Testigonan di Sri Lanka ta anticipá e restoracion di Paradijs, locual nos por corda riba dje asta awor ora nos mira e playa i cerunan di bunita Sri Lanka.

[Notanan]

[Plachinan na página 24, 25]

Hopi hende na Sri Lanka ta respondiendo n’e predicacion i siñamentu cristian