Un Dilema Teológico

“E IDEA dje inmortalidad dje alma i fe den e resureccion dje mortonan . . . ta dos concepto riba planonan completamente diferente, entre cua mester haci un escogo.” E palabranan aki di Philippe Menoud ta resumí e dilema cu teólogonan protestant i católico ta enfrentá riba e condicion dje mortonan. Bijbel ta papia dje speransa di un resureccion “riba e último dia.” (Juan 6:​39, 40, 44, 54) Pero e speransa di hopi creyente, segun teólogo Gisbert Greshake, “ta basá riba e inmortalidad dje alma, cu ta separá for dje curpa na ora di morto i ta regresá na Dios, miéntras cu speransa den e resureccion a desparcé pa gran parti, si no ta completamente.”

Den e caso ei, un problema difícil ta presentá, Bernard Sesboüé ta splica: “Kico ta e condicion dje mortonan durante e ‘periodo’ entre nan morto corporal i nan resureccion final?” E pregunta ei ta parce di tabata e centro di debate teológico den e último par di aña. Kico a hiba na dje? I mas importante, kico ta e berdadero speransa p’e mortonan?

Orígen i Desaroyo di un Dilema

E promé cristiannan tabatin un comprendimentu claro dje asuntu. Nan tabata sa for dje Scritura cu e mortonan no ta conciente di nada, pasobra e Scritura Hebreo ta bisa: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto . . . No tin trabou ni formacion di proyecto ni conocimentu ni sabiduria den Sheol, e lugá na unda bo ta bayendo.” (Eclesiastes 9:​5, 10) E cristiannan ei a spera pa un resureccion tuma lugá durante e futuro “presencia di Señor.” (1 Tesalonicensenan 4:​13-17) Nan no a spera pa ta conciente un otro caminda miéntras nan a warda riba e momento ei. Joseph Ratzinger, kende actualmente ta e prefecto dje Congregacion Vaticano p’e Doctrina dje Fe, ta bisa: “No tabata existí ningun afirmacion di doctrina den e Iglesia antiguo riba e inmortalidad dje alma.”

Sin embargo, Nuovo dizionario di teologia, ta splica cu ora bo lesa e skirbimentunan di Tatanan di Iglesia, manera Augustine of Ambrose, “nos ta bira conciente di algu nobo relacioná cu tradicion bíblico​—⁠e aparicion di un escatalogia griego, fundamentalmente diferente for di esun di hudeo-cristiannan.” E siñansa nobo aki tabata basá riba “e inmortalidad dje alma, riba huicio individual cu recompensa of castigu inmediatamente despues di morto.” Pues, un pregunta a lanta tocante e “estado intermedio”: Si e alma ta sigui biba despues di morto dje curpa, kico ta sosodé cuné segun cu e ta warda e resureccion n’e “último dia”? Esaki ta un dilema cu teólogonan a lucha pa resolvé.

Den siglo seis E.C., Papa Gregorio I a argumentá cu na ora di morto e almanan ta bai inmediatamente n’e lugá di nan destino. Papa Juan XXII di siglo 14 tabata convencí cu e mortonan lo ricibí nan recompensa final riba Dia di Huicio. Sin embargo, Papa Benedicto XII, a refutá su predecesor. Den e carta papal Benedictus Deus (1336), el a decretá cu “e almanan dje defuntunan ta drenta un condicion di felicidad [cielu], purificacion [purgatorio], of perdicion [fiernu] inmediatamente despues di morto, solamente pa ser uní atrobe cu nan curpa resucitá na fin di mundu.”

Apesar di controversia i debate, esaki tabata e posicion di iglesianan di Cristiandad pa siglonan, aunke e iglesianan protestant i ortodox en general no ta kere den purgatorio. Sin embargo, for di e fin dje siglo pasá, un cantidad aumentante di escolástico a señalá n’e orígen no-bíblico dje doctrina di inmortalidad dje alma, i como consecuencia, “teologia moderno awor hopi biaha ta purba mira hende como un unidad cu ta ser disolvé totalmente den morto.” (The Encyclopedia of Religion) P’esei, comentaristanan di Bijbel ta haña ta difícil pa hustificá e existencia di un “estado intermedio.” Bijbel ta papia tocante dje, of e ta ofrecé un speransa diferente?

Pablo A Kere den un “Estado Intermedio”?

E Catechism of the Catholic Church ta bisa: “Pa resucitá cu Cristo, nos tin cu muri cu Cristo: nos tin cu ‘ser ausente for dje curpa i na cas cu Señor’. [2 Corintionan 5:8] Den e ‘salida’ ei cu ta morto, e alma ta ser separá for dje curpa. [Filipensenan 1:23] Lo e ser uní atrobe cu e curpa riba e dia di resureccion dje mortonan.” Pero den e textonan citá aki, apostel Pablo ta bisa cu e alma ta sigui biba despues di morto dje curpa i despues ta warda e “Huicio Final” pa ser uní atrobe cu e curpa?

Na 2 Cortinionan 5:​1, Pablo ta referí na su morto i ta papia di un “cas terenal” cu ta ser “disolvé.” E tabata pensando dje curpa cu ta ser bandoná dor di su alma inmortal? No. Pablo tabatin e creencia cu hende ta un alma, no cu e tin un alma. (Génesis 2:7; 1 Corintionan 15:45) Pablo tabata un cristian ungí cu spiritu kende su speransa, mescos cu di su rumannan di promé siglo, tabata ‘reservá den cielu.’ (Colosensenan 1:5; Romanonan 8:​14-18) P’esei, su ‘deseo sincero’ tabata pa ser resucitá na cielu como un criatura spiritual inmortal n’e debido tempu di Dios. (2 Corintionan 5:​2-4) Papiando dje speransa aki, el a skirbi: “Nos tur lo ser cambiá . . . durante e último trompet. Pasobra e trompet lo zona, i e mortonan lo ser lantá incoruptibel, i nos lo ser cambiá.”​—⁠1 Corintionan 15:​51, 52.

Na 2 Corintionan 5:​8, Pablo ta bisa: “Nos tin bon ánimo i ta keda contentu en bes di bira ausente for dje curpa i pa forma nos hogar cu e Señor.” Algun hende ta kere cu e palabranan aki ta referí na un estado intermedio di wardamentu. Hende asina ta referí tambe na Jesus su promesa na su fiel siguidornan cu e ta bai prepará un lugá den cua e por ‘ricibí nan na su cas cerca dje.’ Pero na ki tempu tal prospectonan lo ser realisá? Cristo a bisa cu esei lo ta ora el ‘a bini atrobe’ den su futuro presencia. (Juan 14:​1-3) Di igual manera, na 2 Corintionan 5:​1-10, Pablo a bisa cu e speransa comun pa cristiannan ungí tabata pa heredá un habitacion celestial. Esaki lo ser realisá, no mediante un supuesto inmortalidad dje alma, sino mediante un resureccion durante e presencia di Cristo. (1 Corintionan 15:​23, 42-44) E splicador di texto bíblico Charles Masson ta concluí cu “por comprendé [2 Corintionan 5:​1-10] corectamente e ora ei sin tin cu recurí n’e hipótesis di un ‘estado intermedio.’ ”

Na Filipensenan 1:​21, 23, Pablo ta bisa: “Den mi caso pa biba ta Cristo, i pa muri, ganashi. Mi ta bou di presion dje dos cosnan aki; pero loke sí mi ta deseá ta e liberacion i di ser huntu cu Cristo, pasobra esaki, siguramente, ta muchu mas mihó.” Pablo ta referí aki na un “estado intermedio”? Algun hende ta pensa asina. Sin embargo, Pablo ta bisa cu el a ser poné bou di presion dor di dos posibilidad​—⁠bida of morto. “Pero loke mi ta deseá,” el a agregá, mencionando un di tres posibilidad, “ta e liberacion i di ser huntu cu Cristo.” Un “liberacion” pa ser huntu cu Cristo inmediatamente despues di morto? Wel, manera nos a mira caba, Pablo tabatin e creencia cu fiel cristiannan ungí lo a ser resucitá durante e presencia di Cristo. P’esei, e mester tabatin na mente e sucesonan dje periodo ei.

Esaki por ser mirá for di su palabranan hañá na Filipensenan 3:​20, 21 i na 1 Tesalonicensenan 4:16. Un “liberacion” asina durante e presencia di Cristo Jesus lo a permití Pablo ricibí e recompensa cu Dios a prepará p’e. E echo cu esaki tabata su speransa ta ser mirá den su palabranan n’e homber hóben Timoteo: “For dje tempu aki padilanti tin reservá pa mi e corona di husticia, cu e Señor, e hues hustu, lo duná mi como recompensa den e dia ei, pero no na ami so, sino tambe na tur esnan cu a stima su manifestacion.”​—⁠2 Timoteo 4:⁠8.

E Resureccion ​—⁠Un Berdad Bíblico Espléndido

E promé cristiannan a considerá e resureccion un suceso cu lo a cuminsá durante e presencia di Cristo, i nan a ricibí fortalesa i consuelo for dje berdad bíblico espléndido aki. (Mateo 24:3; Juan 5:​28, 29; 11:​24, 25; 1 Corintionan 15:​19, 20; 1 Tesalonicensenan 4:13) Nan a warda fielmente riba e futuro goso ei, rechasando siñansanan apóstata di un alma inmortal.​—⁠Echonan 20:​28-30; 2 Timoteo 4:​3, 4; 2 Pedro 2:​1-3.

Naturalmente, e resureccion no ta limitá na cristiannan cu un speransa celestial. (1 Pedro 1:​3-5) E patriarcanan i otro sirbidornan antiguo di Dios a ehercé fe den Jehova su abilidad pa trece e mortonan bek na bida riba tera. (Job 14:​14, 15; Daniel 12:2; Lucas 20:​37, 38; Hebreonan 11:​19, 35) Asta e biyones di hende cu den transcurso dje siglonan nunca a conocé Dios tin e oportunidad di bini bek na bida den un paradijs terenal, ya cu “lo bai tin un resureccion di tantu e hustunan como e inhustunan.” (Echonan 24:15; Lucas 23:​42, 43) Esaki no ta un prospecto emocionante?

En bes di laga nos kere cu sufrimentu i morto semper lo existí, Jehova ta señalá n’e tempu ora “e último enemigu, morto,” lo ser eliminá pa semper i humanidad fiel lo biba eternamente riba un tera restorá na Paradijs. (1 Corintionan 15:26; Juan 3:16; 2 Pedro 3:13) Ki maraviyoso lo ta pa mira nos sernan kerí bini bek na bida! Cuantu mas mihó e speransa sigur aki ta cu e inmortalidad hipotético dje alma humano​—⁠un doctrina basá, no riba e Palabra di Dios, sino riba filosofia griego! Si bo basa bo speransa riba Dios su promesa sigur, bo tambe por ta sigur cu pronto “morto lo no existí mas”!​—⁠Revelacion 21:​3-5.

[Plachi na página 31]

E resureccion ta un berdad bíblico espléndido