Pregunta di Lector
Ken e filisteonan mencioná den Bijbel tabata?
Bijbel hopi biaha ta referí na un pueblo conocí como e filisteonan, kendenan a biba na Canan ora e pueblo antiguo di Dios a tuma posesion dje Tera Primintí. Pa un tempu largu, e filisteonan antiguo aki a oponé e pueblo di Dios, manera ta ser resaltá den e relato dje encuentro di David cu e campeon gigante filisteo yamá Goliat.—1 Samuel 17:1-3, 23-53.
Bijbel ta indicá cu e antiguo filisteonan a imigrá for di Caftor p’e costa zuidwest di Canan. (Jeremías 47:4) Unda Caftor tabata situá? The International Standard Bible Encyclopedia (1979) ta skirbi: “Aunke no tin suficiente evidencia pa duna un contesta definitivo, escolásticonan actual ta señalá n’e isla di Creta (of talbes Creta plus e Islanan Aegeano, cuanan culturalmente a pertenecé na otro) como casi sigur e sitio di mas probabel.”—Volúmen 1, página 610.
Na armonia cu esaki, e Traducción del Nuevo Mundo de las Santas Escrituras ta bisa na Amos 9:7: “ ‘Boso no ta manera e yunan dje cusitanan pa mi, O yunan di Israel?’ ta e expresion di Jehova. ‘Mi no a haci Israel mes subi for dje tera di Egipto, i e filisteonan for di Creta, i Siria for di Kir?’ ”
No ta conocí na ki tempu e antiguo pueblo marítimo aki a imigrá for di Creta p’e seccion di Canan cu a yega di ser yamá Filistia, e costa zuidwest entre Jopa i Gaza. Aparentemente nan tabatei caba den e region aki di sabananan abou cant’i costa den e dianan di Abraham i Isaac.—Génesis 20:1, 2; 21:32-34; 26:1-18.
E filisteonan a sigui ser un influencia poderoso den e área hopi despues cu Israel a drenta e tera cu Dios a primintí nan. (Exodo 13:17; Hosué 13:2; Hues 1:18, 19; 3:3, 4; 15:9, 10; 1 Samuel 4:1-11; 7:7-14; 13:19-23; 1 Rey 16:15) Te den e tempu dje reinado di rey Uzías di Huda, e filisteonan a keda den nan stadnan Gat, Jabne i Asdod. (2 Crónica 26:6) Nan otro stadnan prominente den relatonan bíblico tabata Ekron, Askelon i Gaza.
Alehandro e Magno a conkistá e stad filisteo di Gaza, pero cu tempu, aparentemente e filisteonan a stop di existí como un pueblo separá. Profesor Lawrence E. Stager a skirbi den Biblical Archaeology Review (mei/juni 1991): “E filisteonan tambe a ser mandá den exilio pa Babilonia. . . . Sin embargo, no tin ningun registro di loke a sosodé cu e filisteonan exiliá. Esnan cu kisas a permanecé na Askelon despues dje conkista di Nabucodonosor aparentemente a perde nan identidad étnico. Nan simplemente a disparcé for di historia.”
E nomber moderno Palestina ta derivá for di palabranan latin i griego, cuanan ta hiba mas leu atras n’e palabra hebreo pa “Filistia.” Algun traduccion di Bijbel den e idioma arabir ta usa un palabra pa “filisteonan” cu ta ser confundí fácilmente cu e palabra pa palestinonan moderno. Sin embargo, Today’s Arabic Version ta usa un palabra arabir diferente, distinguiendo asina entre e filisteonan antiguo i e palestinonan moderno.
[Plachi na página 31]
Algun ruina na Askelon
[Rekonosementu]
Pictorial Archive (Near Eastern History) Est.