Creatividad un don generoso di Dios

JEHOVA ta alegrá den su obranan creativo. (Salmo 104:31) E satisfaccion profundo cu e ta saca for dje accion di crea ta ser expresá na Génesis 1:31: “Dios a wak tur loke el a traha i, mira! e tabata hopi bon.”

Jehova no a tene e goso aki pa su mes. El a duna Jesus e privilegio di ser e agente, of instrumento, via ken tur otro cos a ser creá. (Juan 1:3; Colosense 1:16, 17) Como “un obrero maestro,” Jesus tambe tabata “alegre dilanti [Jehova] na tur tempu.”—Proverbio 8:30, 31.

Pero abilidad creativo no ta existí solamente den cielu. “E ta diseñá como un parti integral dje especie humano,” Eugene Raudsepp ta skirbi den su buki How Creative Are You? Esaki no ta un coincidencia, pasobra hende a ser trahá den e imágen di Dios. (Génesis 1:26) Pues Jehova a dota humanidad cu abilidadnan creativo satisfaciente.—Santiago 1:17.

P’esei, no ta un sorpresa cu Bijbel ta papia masha faborablemente di cantamentu, bailamentu, hilamentu, cushinamentu, artesania i otro empeñonan creativo. (Exodo 35:25, 26; 1 Samuel 8:13; 18:6, 7; 2 Crónica 2:13, 14) Bezalel, un artesano, a usa su talento pa “diseñá artefactonan útil” pa yuda den construccion dje tabernáculo. (Exodo 31:3, 4) E wardador Jabal kisas tabata e inventor di tent, un cumbinencia creativo p’e bida nomádico. (Génesis 4:20) David no tabata solamente un músico i compositor, sino tambe a desaroyá instrumentonan musical nobo. (2 Crónica 7:6; Salmo 7:17; Amos 6:5) Kisas Miriam a percurá p’e coreografia dje baile hubiloso cu a celebrá e liberacion milagroso dje israelitanan dor di Laman Corá.—Exodo 15:20.

Creatividad hopi biaha ta masha balioso den promové adoracion berdadero. Den un manera creativo Jesus a usa ilustracionnan i ehempelnan práctico pa comunicá su mensahe. Su siguidornan di igual manera ta ser instá pa “traha duru den papiamentu i siñamentu.” (1 Timoteo 5:17) Sí, nan trabou di predicacion no ta un simpel rutina. E ta un arte cu ta rekerí métodonan di siña creativo. (Colosense 4:6) Esaki ta specialmente vital ora di siña bo yunan.—Deuteronomio 6:6, 7; Efesio 6:4.

Pues, Jehova ta compartí cu otronan e goso cu creamentu ta dun’é. Ki un don generoso!