E Nengamentu Di Existencia I Autoridad Di Dios Di Siglo 20

“Hende ta resigná cu e idea dje ausencia di Dios i ta organisando nan bida independientemente, sin importá e resultadonan, i sin tuma Dios na cuenta.” ​—⁠One Hundred Years of Debate Over God​—⁠The Sources of Modern Atheism. (Cien Aña di Debate Tocante Dios​—⁠E Fuentenan di Ateismo Moderno.)

AUNKE un palu haltísimo ta impresionante na promé instante, cu tempu e ta ser considerá como algu normal. Su presencia ta familiar; su haltura no ta asombroso mas.

Ta mescos cu ateismo. Aunke el a provocá hopi debate durante siglo 19, e nengamentu di existencia di Dios no ta ni escandaloso ni preocupante awe. Un era di tolerancia a permití ateismo existí pacíficamente huntu cu creencia den Dios.

No cu mayoria hende ta nenga existencia di Dios abiertamente; al contrario, resultadonan di encuestanan for di 11 pais den Nort i Sur América, Europa i Asia ta revelá cu, como promedio, un poco mas cu 2 porciento ta afirmá di ta ateo. Sin embargo, un spiritu ateista ta prevalecé​—⁠asta entre hopi cu ta kere cu Dios ta existí. Con esaki por ta?

Nengando Dios Su Autoridad

“Tin biaha ateismo ta referí simplemente n’e rechaso práctico of ignorancia di Dios,” segun The Encyclopedia Americana. P’e motibu aki, The New Shorter Oxford English Dictionary ta duna e siguiente segundo definicion di “ateo”: “Un persona cu ta nenga Dios moralmente; un persona sin dios.”​—⁠Letternan cursivo ta di nos.

Sí, ateismo por encerá un nengamentu sea di Dios su existencia of di su autoridad of di ámbos. Bijbel ta referí n’e spiritu ateista aki na Tito 1:16: “Nan ta profesá cu nan ta reconocé Dios, pero ta nengu’é mediante nan accionnan.”​—⁠The New English Bible; compará cu Salmo 14:⁠1.

E orígen di tal rechaso di Dios su autoridad por ser hañá bek te n’e promé pareha humano. Eva a reconocé Dios su existencia; pero, e tabata kier “ta manera Dios, conociendo bon i malu.” Esaki a implicá cu e por ‘tabata su mes doño’ i crea su mes código moral. Mas despues Adam a uni cu Eva den e nengamentu aki di Dios su autoridad.​—⁠Génesis 3:​5, 6.

E actitud aki ta prevalecé awe? Sí. Un ateismo sutil ta ser manifestá den un búskeda pa independencia. “Hende djawendia ta cansá di biba bou dje vigilancia di Dios,” e buki One Hundred Years of Debate Over God​—⁠The Sources of Modern Atheism ta observá. “Nan . . . ta preferá di biba den libertad.” E código moral di Bijbel ta ser rechasá como impráctico, irealístico. E pensamentu di hopi hende ta parce mashá esun dje Fárao di Egipto kende a declará na moda desafiante: “Ken ta Jehova, pa mi mester obedecé su bos . . . ? Mi no conocé Jehova en absoluto.” El a rechasá Jehova su autoridad.​—⁠Exodo 5:⁠2.

Cristiandad Su Nengamentu di Dios

E nengamentu mas escandaloso di Dios su autoridad ta bini for di cleronan di cristiandad, kendenan a substituí e berdadnan puru di Bijbel pa tradicionnan di hende. (Compará cu Mateo 15:⁠9.) Ademas, nan a apoyá e gueranan di mas sangriente di siglo 20, rechasando asina e mandamentu bíblico pa manifestá amor genuino.​—⁠Juan 13:⁠35.

Cleronan a nenga Dios tambe dor di bira nan lomba pa su normanan moral​—⁠manera ta ser probá, por ehempel, dor di un seri continuo di casonan penal contra pastornan acusá di perversion sexual cu mucha. E situacion di cristiandad ta parce esun di Israel i Huda antiguo. “E tera ta yená cu dramamentu di sanger i e stad ta yen di corupcion,” profeta Ezekiel a ser bisá, “pasobra nan a bisa, ‘Jehova a bandoná e tera, i Jehova no ta mirando.’ ” (Ezekiel 9:9; compará cu Isaías 29:15.) Nada straño cu hopi hende a bandoná iglesianan di cristiandad totalmente! Pero nan mester bandoná creencia den Dios?

Motibunan Bálido pa Ateismo?

Sea cu nan a observá e hipocresia di religion of no, hopi ateo simplemente no por armonisá creencia den Dios cu e sufrimentu den mundu. Simone de Beauvoir a bisa un biaha: “Tabata mas fácil pa mi pensa di un mundu sin un creador cu un creador cargá cu tur e contradiccionnan dje mundu.”

E inhusticianan di mundu​—⁠incluyendo esnan instigá dor di religionistanan hipócrita​—⁠ta proba cu no ta existí Dios? Considerá lo siguiente: Si un cuchú ta ser usá pa menasá, heridá, of asta mata un persona inocente, esaki ta proba cu e cuchú no tabatin un diseñador? Esei no ta mustra mas bien cu e obheto a ser usá incorectamente? Di igual manera, gran parti dje pena humano ta duna evidencia cu hende ta malusando nan abilidadnan cu Dios a duna nan i tambe e tera mes.

Sin embargo, algun hende ta kere cu ta ilógico pa kere den Dios, siendo cu nos no por mir’é. Pero kico di aire, ondanan di zonidu i holornan? Nos no por mira ningun dje cosnan aki, tog nos sa cu nan ta existí. Nos pulmon, orea i nanishi ta laga nos sa esei. Siguramente, nos ta kere den loke nos no por mira si nos tin evidencia.

Despues di a contemplá e evidencia físico​—⁠incluyendo electron, proton, atom, amino ácido i e celebro complicá​—⁠e científico di naturalesa Irving William Knobloch a ser impulsá pa bisa: “Mi ta kere den Dios pasobra pa mi Su existencia Divino ta e único splicacion lógico pa e cosnan manera nan ta.” (Compará cu Salmo 104:24.) Di igual manera, e fisiólogo Marlin Books Kreider ta declará: “Tantu como un ser humano comun, i tambe como un homber cu ta dedicá su bida na studio i investigacion científico, mi no tin ningun duda en absoluto en cuanto e existencia di Dios.”

E hombernan aki no ta e úniconan. Segun e profesor di física Henry Margenau, “si bo considerá e científiconan sobresaliente, bo ta haña masha poco ateo meimei di nan.” Ni e progresonan di ciencia ni e fracaso di religion mester ta motibu pa nos bandoná creencia den un Creador. Laga nos examiná pakico.

E Contraste di Religion Berdadero

Na 1803, e presidente di Merca Thomas Jefferson a skirbi: “En berdad mi ta contra e corupcionnan di cristiandad; ma no contra e preceptonan auténtico di Jesus mes.” Sí, tin un diferencia entre cristiandad i cristianismo. Hopi dje principionan di cristiandad ta fundá riba tradicion di hende. Na contraste, berdadero cristianismo ta basa su creencianan solamente riba Bijbel. Pues, apostel Pablo a skirbi n’e colosensenan di promé siglo cu nan mester adkerí “conocimentu exacto,” “sabiduria,” i “comprendimentu spiritual.”​—⁠Colosense 1:​9, 10.

Esaki ta loke nos mester spera di cristiannan berdadero, pasobra Jesus a manda su siguidornan: “Haci disipel di hende di tur nacion, bautisando nan . . . , siñando nan pa warda tur loke mi a manda boso.”​—⁠Mateo 28:​19, 20.

Awe, Testigonan di Jehova ta cumpliendo cu e mandamentu aki den 231 pais rond mundu. Nan a traducí e Bijbel den 12 idioma i a imprimí hopi mas cu 74.000.000 copia. Ademas, mediante un programa di studio di Bijbel di cas, actualmente nan ta yudando mas cu 4.500.000 persona ‘warda tur loke Jesus a manda.’

E programa educacional aki tin resultadonan di largu alcanse. E ta trece berdadero iluminacion, pasobra e ta basá, no riba pensamentu di hende, sino riba sabiduria di Dios. (Proverbio 4:18) Ademas, e ta yudando hende di tur nacion i rasa haci algu cu hende su “Iluminacion” nunca por a logra​—⁠bisti un “personalidad nobo” cu ta permití nan desaroyá amor genuino un pa cu otro.​—⁠Colosense 3:​9, 10.

Religion berdadero ta triunfando den nos siglo 20. E no ta nenga Dios​—⁠ni su existencia ni su autoridad. Nos ta invitá bo pa bo mira esaki pa bo mes dor di bishitá Testigonan di Jehova na un di nan Salonnan di Reino.

[Box on page 6]

FORTALECIENDO E RAISNAN DI ATEISMO

Meimei di siglo 18, e filósofo Denis Diderot a ser comisioná pa traducí un enciclopedia di un solo volúmen for di ingles pa frances. Sin embargo, el a surpasá bastante e expectativanan di su doño di trabou. Diderot a dedicá rond di tres década compilando su Encyclopédie, un obra di 28 volúmen cu a capta e spiritu dje era den cua el a biba.

Aunke e Encyclopédie a contené hopi informacion práctico, su énfasis tabata riba sabiduria humano. Segun e coleccion di buki titulá Great Ages of Man, el “a tribi di predicá e credo radical [dje filósofonan] cu hende por mehorá su suerte si e reemplasá fe cu rason como su principio guiador.” Mencion di Dios tabata notablemente ausente. “Dor di nan seleccion di tópiconan,” segun e buki The Modern Heritage, “e editornan a haci cla cu religion no tabata un dje cosnan cu hende mester a conocé.” No tabata un sorpresa cu e iglesia a purba di caba cu e Encyclopédie. E fiscal di estado a denunci’é como subversivo pa política, moralidad i religion.

Apesar di su enemigunan, rond di 4000 persona a haci pedido pa Diderot su Encyclopédie​—⁠un cantidad asombroso, considerando su prijs exorbitante. Tabata simplemente un cuestion di tempu promé cu e coriente controversial ateista aki lo a desaroyá den un nengamentu total di Dios.