E Raisnan Di Ateismo

NOS ta biba riba un planeta yen di crísis; un bistaso momentáneo na titularnan di corant ta confirmá e echo ei cada dia. E condicion desesperá di nos mundu a pone hopi hende duda dje existencia di Dios. Algun, afirmando di ta ateista, asta ta nenga su existencia. Esei ta e caso cu bo?

Creencia of falta di creencia den Dios por afectá profundamente bo punto di bista riba futuro. Sin Dios, e sobrebibencia dje rasa humano ta henteramente den man di hende​—⁠un pensamentu desalentador, considerando hende su potencial destructivo. Si en berdad bo ta kere cu Dios ta existí, e ora ei probablemente bo ta aceptá cu bida riba e planeta aki sí tin un propósito​—⁠un propósito cu lo bai realisá eventualmente.

Aunke nengamentu di existencia di Dios tabata sporádico atrabes di historia, ta solamente den siglonan reciente cu e popularidad di ateismo a plama. Bo sa pakico?

Percibiendo e Raisnan

Un palu haltísimo ta duna un bista impresionante. Sin embargo, e wowo apénas ta percibí e blachinan, ramanan i troncon. E raisnan​—⁠e fuente di bida dje palu​—⁠ta scondí hundu den tera.

Ta casi mescos cu ateismo. Manera un palu haltu, e nengamentu di existencia di Dios a crece te na un estatura impresionante poco promé i durante siglo 19. Bida i e universo por a existí sin un Promé Causa sobrenatural? Adoracion di un Creador asina ta un perdementu di tempu? E contestanan di e filósofonan principal di siglo 19 tabata masha cla. “Mescos cu nos no tin mester di un código moral mas, tampoco nos mester di religion,” Friedrich Nietzsche a declará. “Religion ta e soño dje mente humano,” Ludwig Feuerbach a afirmá. I Karl Marx, kende su skirbimentunan lo tabatin un influencia profundo den e décadanan cu a sigui despues di su tempu, a declará francamente: “Mi kier aumentá e libertad dje mente for dje cadenanan di religion.”

Hopi hende a keda impresioná. Sin embargo, loke nan a percibí tabata simplemente e blachinan, ramanan i troncon di ateismo. E raisnan tabatei i a spruit hopi tempu promé cu siglo 19 a cuminsá. Sorprendentemente, e crecementu moderno di ateismo a ser promové dor di religion di cristiandad! Con asina? Debí na nan corupcion, e institucionnan religioso aki a provocá un ola grandi di desilusion i protesta.

E Simianan Ta Ser Sembrá

Durante Edad Medio, Iglesia Católico tabatin un influencia cu a sofocá libertad di expresion di su súbditonan. “E cleronan na mando aparentemente tabata mal ekipá pa percurá p’e necesidadnan spiritual dje pueblo,” The Encyclopedia Americana ta bisa. “E miembronan dje clase di clero cu tabatin e rangonan mas haltu, notablemente e obispunan, a ser reclutá for dje clase di noblenan i a mira nan puesto principalmente como un fuente di prestigio i poder.”

Algun, manera Johannes Calvijn i Martin Luther, a purba reformá e iglesia. Sin embargo, nan métodonan no tabata semper segun ehempel di Cristo; intolerancia i dramamentu di sanger a marca e Reformacion. (Compará cu Mateo 26:52.) Algun atake tabata asina cruel cu tres siglo despues Thomas Jefferson, e di tres presidente di Merca, a skirbi: “Lo tabata mas perdonabel pa no kere den dios mes, cu blasfem’é dor dje atributonan horibel di Calvijn.”a

Claramente, e Reformacion no a restorá adoracion puru. Sin embargo, el a reducí e poder dje Iglesia Católico. Vaticano no tabatin un monopolio mas riba hende su fe religioso. Hopi hende a uni cu e sectanan protestant recientemente formá. Otronan, desilusioná dor di religion, a haci e mente humano nan obheto di adoracion. Un actitud liberal a sigui, permitiendo opinionnan variá tocante Dios.

Duda Ta Spruit

Poco promé i durante siglo 18, pensamentu racional a ser alabá comunmente como e remedi pa cura tur problema di mundu. E filósofo aleman Immanuel Kant a declará cu hende su progreso tabata ser strobá dor di su dependencia riba política i religion pa guia. “Busca moda di sa!” el a insta. “Tene curashi pa usa bo propio inteligencia!”

E actitud aki a caracterisá e “Iluminacion” [un movementu filosófico di siglo 18 marcá pa un rechaso di ideanan social, religioso i político tradicional], conocí tambe como e Era di Razonamentu. Durando atrabes di e siglo 18, e periodo aki tabata marcá pa un búskeda obsesioná pa conocimentu. “Duda a reemplasá fe ciegu,” e buki Milestones of History ta bisa. “Tur creencia i práctica tradicional bieu a ser cuestioná.”

Un “creencia i práctica tradicional bieu” cu a cuminsá ser investigá tabata religion. “Hende a cambia nan punto di bista riba religion,” e buki The Universal History of the World ta bisa. “Nan no tabata satisfecho mas cu e promesa di recompensanan den cielu; nan tabata exigiendo un mihó bida riba tera. Nan a cuminsá perde fe den loke ta sobrenatural.” En berdad, mayoria filósofo di Iluminacion a mira religion cu desprecio. Particularmente, nan a culpa e lidernan hambrá pa poder di Iglesia Católico pa tenementu di hende den ignorancia.

Siendo malcontentu cu religion, hopi dje filósofonan aki a bira deista [siguidor di un movementu cu a boga pa religion naturalista]; nan a kere den Dios pero segun nan e no tabatin interes den hende.b Algun a bira ateonan abierto, manera e filósofo Paul Henri Thiry Holbach, kende a sostené cu religion tabata un “fuente di division, locura extremo, i crímen.” Segun cu e añanan a pasa, hopi hende mas a cuminsá fada cu cristiandad i a compartí e sintimentunan di Holbach.

Ta ki un ironia cu cristiandad a stimulá e crecementu di ateismo! “E Iglesianan tabata e tereno productivo di ateismo,” e profesor di teologia Michael J. Buckley ta skirbi. “E concenshi occidental a ser profundamente ofendí i disgustá dor di religionnan organisá repl: cu tin un credo comun. E Iglesianan i e sectanan a aplastá Europa, a conducí masacrenan, a exigí resistencia of revolucion religioso, a intentá na scomulgá of core cu monarcanan.”

Ateismo Ta Haña Amplio Aceptacion

Pa siglo 19, nengamentu di existencia di Dios a ser expresá sin restriccion i tabata prosperando. Filósofonan i científiconan no tabatin ripara pa proclamá nan opinionnan punto di bista francamente. “Nos enemigu ta Dios,” un ateo franco a declará. “Odio pa Dios ta e principio di sabiduria. Pa humanidad haci berdadero progreso, esei mester ta riba e base di ateismo.”

Sin embargo, un cambio sutil a tuma lugá durante siglo 20. Nengamentu di existencia di Dios a bira ménos agresivo; un otro sorto di ateismo a cuminsá plama, afectando asta esnan cu ta bisa cu nan ta kere den Dios.

[Footnotes]

[Caption on page 3]

Karl Marx

[Caption on page 3]

Ludwig Feuerbach

[Caption on page 3]

Friedrich Nietzsche