Ki Malu Ta Un Iglesia Desuni̇́?

MESCOS cu un famía grandi i spantá, bibando den un cas bieu i kibrá, locual tin un muraya dilanti cu a caba di cai di ripiente, ta parce cu tin un pleitu sosodiendo den cada cuarto​—⁠yiu di Jesús batiendo tambor i gritando homosexual anglo-católico den bistí elegante di fluz pretu di seda.”​—⁠The Sunday Times, Londres, 11 di April di 1993.

E famía ta simbolizá e Iglesia Anglicano. E pleitu ta tocante ordenacion di hende muher como pastor. Detaye pintá den e promé paragraf dje desunion profundo ta aplica di igual manera na tur cristiandad. Ya cu tin patriarca dje Iglesia católico griego i e papa condenando e decision di ordena hende muher como pastor, e resultado en general, segun un informe, ta cu “e soño di reunificacion cu e resto di cristiandad ta mas leu cu nunca.”

Ki desuní ta e Iglesia?

Manera nos ta leza den Mateo 7:​21, Jesucristo a bisa cu hopi hende lo declara fe den dje como Señor pero toch keda sin ‘cumpli cu e boluntad di su Tata.’ E revista Maclean’s ta bisa: “Lector di Mateo cu ta busca salbacion por haya pordón pa nan confusion tocante exactamente loke ta e boluntad di Dios, ya cu hende cristian i nan religion tin tanto diferencia profundo riba e cuestion.” Despues di un encuesta den Canadá, e revista a conclui cu “tin desacuerdo tremendo den e kerimento i práctica di hende cristian den Canadá​—⁠realmente tin mas desacuerdo entre miembro di un solo religion cu tin entre diferente religion.”

Segun e encuesta, 91 porciento di hende católico ta di acuerdo tocante e uso di control artificial di nacimento aunque nan religion ta condena esei; 78 porciento ta kere cu e Iglesia mester permiti ordenacion di hende muher como pastor; i 41 porciento ta acepta aborto “den cierto circunstancia.” Segun e revista Maclean’s, desacuerdo entre diferente religion riba “un cantidad di asunto teológico ta enfatiza e desunion cu ta causa desintegracion di religion principal.”

Dos ley

Dos ley i també ley contradictorio ta existi tocante moralidad. Algun hende ta pretende di apoya ley di Bijbel, pero otro hende ta desprecia principio bíblico. Por ehempel, e ceremonia di “casamento” di dos lesbiana den e Iglesia Metropolitana den Toronto, ta di acuerdo cu e boluntad di Dios? Ta parce cu e dos lesbiana a kere cu sí. Nan a bisa: “Nos kier celebra nos amor públicamente i dilanti Dios.”

Un reportero a puntra di ki manera “un arzobispo católico cu a recibi keho tras keho, a manda pastor abusador di mucha homber na otro misa unda nan por tene contacto cu mas mucha homber.” Pastor Andrew Greeley a sugeri cu entre 2.000 te 4.000 pastor por a abusa di 100.000 mucha menor di edad, i hopi bez mashá poco cos tabata hací tocante dje.

Religion desuní ta produci un pueblo desuní. Den ex-Yugoslavia, soldad servio i croata “cristian” ta kere cu Cristo ta cu nan den nan gera “husto.” Hopi soldad tin crucifiho bistí durante bataya, incluyendo uno cu, segun informe, “semper tin su crucifiho den su boca ora e combate ta mas feroz.”

“Pa no existi desunion den boso”

Ta cierto cu e Bijbel ta laga algun asunto pe concenshi decidi, pero esei no mester laga lugar pa tal desunion. Apóstol Pablo a bisa claramente: “Boso tur papia [i actua] di acuerdo, i pa no existi desunion den boso.”​—⁠1 Corintio 1:10; Efesio 4:​15, 16.

Un bista onrado tirá riba “cristianismo” rond di dos mil aña despues cu apóstol Pablo a skirbi e palabra ei ta haci varios pregunta mashá serio presenta. Pakico pueblo “cristian” ta tanto desuní? Un iglesia desuní por sigi existi? Cristiandad nunca por uni? E sigiente artículo lo considera tal pregunta.

[Caption on page 3]

Pastor ta manifesta contra aborto

[Caption on page 3]

Cover and above: Eleftherios/Sipa Press