Un Iglesia Desuni̇́ por sigi existi?

“TUR hende cu ta declara fe den e berdad salbador di Cristo ta pertenece ne Iglesia visibel. Desunion den cristiandad​—⁠entre e religion católico griego i e religion católico romano, entre Roma i religion protestante​—⁠ta desunion den e solo Iglesia.” (Christians in Communion) Esei ta e manera cu un autor ta considera cristianismo​—⁠como un solo famía di religionan pero plamá na tur parti, cu tur declarando un sorto di fe den Jesucristo.

Sin embargo, esei ta un famía desuní, cu kerimento i ley di conducta contradictorio. Segun un observador, “Cristianismo djawe . . . tin norma menos estricto pa hende birando miembro di un religion cu norma pa hende drentando bus. Pues, anto, con nos mester diagnosticá su estado spiritual? Obispo católico Basilio Butler a conclui: “Un cristianismo desuní ta mashá enfermo mes.” (The Church and Unity) Con su enfermedad a cuminza? Tin speranza pa recobramento?

“E homber malbado”

Apóstol Pablo a duna spiertamento contra desaroyo di desunion. El a skirbi pa hende cristian den Tesalónica cu a kere cu e presencia di Cristo tabata cerca: “No laga ningun hende seduci boso di ningun manera, pasobra [e dia di Jehova] no ta bini amenos cu e apostasía ta bini promé i e homber malbado ta keda revelá, e yiu di destruccion.”​—⁠2 Tesalonicense 2:⁠3.

Tal “homber malbado” a introduci apostasía i rebelion den e congregacion cristian. Ken e tá? E no ta un hende individual sino, mas bien, ta e grupo di clero di cristiandad. E grupo a halza su mes mas halto cu e congregacion apóstata relativamente pronto despues dje morto dje apóstolnan di Jesús, i despues a yega di siña filosofía pagano, tal como e trinidad i inmortalidad di alma humano. (Echo 20:​29, 30; 2 Pedro 2:​1-3) Mescos cu un virus fatal, el a infecta e congregacion cu a pretende di ser cristian cu idea inspirá pa demoño locual inevitablemente a resulta den desunion.​—⁠Galatio 5:7-10.

E contaminacion a cuminza caba den e dia di apóstol Pablo. El a skirbi: “Ta cierto cu e misterio dje maldad ta obrando caba; pero solamente te cu esun cu ta obra como frena ta yega di ser for di camina.” (2 Tesalonicense 2:⁠7) E apóstolnan a sirbi como un frena contra e veneno dje apostasía. Ora nan influencia unificador tabata kitá, apostasía desenfrená a plama manera gangrena.​—⁠1 Timoteo 4:​1-3; 2 Timoteo 2:​16-18.

E actividad dje “homber malbado” a sigi plama. Den un informe reciente tocante “un iglesia den tormento sexual i teológico,” un keho di un arzodiácono dje Iglesia Anglicano tabata citá: “Proposicion invitando e clero pa no practica actividad sexual fuera di matrimonio ta ser rechazá. E iglesia ta ordena homber homosexual activo. Nan ta haci bon malu i malu bon.”​—⁠The Sunday Times Magazine, Londres di 22 di November di 1992.

Trigu i mal yerba

Jesucristo mes a siña cu berdadero cristianismo lo desparce temporalmente for di bista. El a bisa cu e fundamento dje congregacion cristian tabata manera un homber cu a sembra bon simía den su cunucu. Pero, segun Jesús, “su enemigo a bini i a sembra mal yerba den e trigu.” Ora esclabo di dje a puntra si nan mester purba di ranca e mal yerba, e doño dje cunucu a bisa: “No; pa no sosode pa casualidad cu, mientras cu boso ta recoge e mal yerba, boso ta ranca trigu hunto cuné.” Pa cuanto tempo e bruhamento dje trigu cu mal yerba a sigi? E doño dje cunucu a bisa: “Láganan tur crece hunto te na cosecha.”​—⁠Mateo 13:​25, 29, 30.

Te ne “cosecha,” of e tempo di separacion durante e último dianan dje “sistema di cosnan,” cristian falso a crece hunto cu cristian berdadero. (Mateo 28:20) Satanás e Diabel a usa hende apóstata pa crea un congregacion cristian falso, corrupto i desuní. (Mateo 13:​36-39) Nan a produci un congregacion falso i bergonzoso, imitando berdadero cristianismo. (2 Corintio 11:​3, 13-15; Colosense 2:⁠8) Mientras cu e iglesia a separa na pida pida durante e siglonan, tabata cada bez mas dificultoso pa identifica cristian berdadero.

Desunion nobo

Den tempo mas moderno, segun e buki na inglés E prueba di religion​—⁠1932-1982, “desunion nobo a presenta, i specialmente e movimento carismático, cu su énfasis riba fe i experencia personal.” Interesantemente, algun hende ta mira movimento di hende cu a nace di nobo, carismático, como un siñal di recobramento spiritual en bez di desunion nobo. Por ehempel, Nortirlanda a experimenta tal rebibamento entre 1850 i 1860. Esei a lanta mashá expectacion. Un informe a menciona “union fraternal . . . entre e pastor protestante, metodista, i independiente” i a bisa cu “cada dia a trece informe nobo di trance, drumimento, vision, soño i milagro.”​—⁠Religious Revivals.

Hopi hende a mira tal manifestacion dramático como evidencia di obramento dje spiritu di Dios pa rebiba su iglesia. Un observador a bisa, “E iglesia di Dios ta ser rebibá den e districto aki den e sentido di mas halto.” Sin embargo, aunque tal rebibamento special tabata proclamá como “un glorioso época sin igual den e historia religioso di Ulster (Irlanda),” esei i otro rebibamento mescos cuné no a produci unidad religioso den hende cu a declara renacimento spiritual.

Hende asina ta debati cu nan ta ser uní den cosnan mas importante i básico. Pero, esei ta e mesun argumento cu e resto di cristiandad ta usa, cu nan razonamento di cu “loke ta uni hende cristian ta hopi mas importante caba cu loke ta desunínan ainda.” (The Church and Unity) Cristiandad ta declara: “Nos unidad fundamental un cu otro i cu tur otro hende cristian tin su raíz den nos bautismo den Cristo.” (Christians in Communion) Sin embargo, bisando cu desunion no ta importante debí na nan fe común den Jesús ta mescos cu bisa cu cáncer no ta serio tan tempo cu bo curazón ta fuerte.

E realidad ta cu tal movimento religioso moderno a aumenta e confusion i a produci anarquía spiritual mientras cu maestro convenciente ta recluta sigidor di nan mes. Jim Jones i David Koresh ta ehempel reciente di lider spiritual cu a gaña miles di hende. (Mateo 15:14) Un pastor bautista ta un miembro principal dje Ku Klux Klan (organizacion racial terrorista). E ta enlaza su campaña pa supremacía dje raza blancu cu un rebibamento religioso i ta bisa cu hende cu ta participa den dje “lo ser duná e forza di guía divino, duná e curashi di [Jesucristo] cu a muri na Calvario.”

Kico di supuesto milagro, obra poderoso, i siñal hací den e nomber di Jesús? No lubida cu e spiertamento fuerte di Jesucristo ta cu, no ta hende cu simplemente ta bisa “Señor, Señor” cu ta gana su aprobacion, sino, mas bien, ‘hende cu ta haci e boluntad di su Tata.’ Hopi hende djawe ni sikiera ta conoce e nomber di su Tata, Jehova Dios. Jesús a duna spiertamento tocante hende cu lo ‘saca demoño den su nomber, i haci obra poderoso den su nomber’ i toch lo ser yamá “hacidor di maldad.”​—⁠Mateo 7:​21-23.

“Sali foi dje mi pueblo”

Ki speranza tin pa cristiandad enfermo? Mashá nada. Anto, nos mester acepta e conseho di obispo católico Butler, pa “uni cu [e iglesia] un bez i duna apoyo na su ‘purificacion’ interno continuo”? No! Cristiandad desuní i desunidor lo no sigi existi. (Marco 3:​24, 25) E ta parti di un imperio mundial di religion falso yamá Babilonia e Grandi. (Revelacion 18:​2, 3) Tal sistema religioso culpable di dramamento di sanger ta enfrenta destruccion pronto den man di Dios.

E Bijbel no ta sugeri pa cristian berdadero permanece den tal organizacion religioso corrupto i purba di reformé di padén. Mas bien, e Bijbel ta conseha: “Sali foi dje, mi pueblo, si boso no kier participa cuné den su picánan, i si boso no kier recibi parti di su plaganan. Pasobra su picánan a montona hunto te na cielo, i Dios a corda su actonan di inhusticia.”​—⁠Revelacion 18:​4, 5.

“Sali” i bai na unda? No lubida cu Jesús a priminti cu den e tempo di cosecha, cristian berdadero lo ser uní hunto atrobé den unidad mundial. Profeta Miqueas també a profetiza di tal reunimento cu e sigiente palabra: “Lo mi pónenan den unidad, mescos cu un tao den e curá.” (Miqueas 2:12) Esei a sosode?

Sí! cristian berdadero ta ser reuni awor den un hermandad uní mundialmente. Ken nan tá? Nan ta e congregacion cristian di Testigo di Jehova, cu ta declara unidamente e bon nobo dje Reino di Dios den 231 país. Nan ta rechaza siñanza desunidor di cristiandad i ta purba di adora Dios conforme cu e berdad di su Palabra.​—⁠Juan 8:​31, 32; 17:⁠17.

Bo ta ser invitá calorosamente pa papia cu nan. Si bo kier sa mas tocante Testigo di Jehova, haci fabor di haci contacto cu nan localmente of mediante e direccion apropiado na bladji 2 dje revista aki.

[Caption on page 7]

“Dios a corda su actonan di inhusticia”