Mira Loke Jehova a Haci pa Nos!
“NOS tabata pidi tal ocasion den oracion,” segun un homber. Un otro a lanta cuat’or tur dia pa haci oracion. Pa pidi kico? El a bisa: “Pa pidi cu un dia nos lo tin e libertad pa adora Jehova Dios libremente.” Na Januari di 1992, ora Testigo di Jehova den Etiopia a reuni hunto den Addis Abeba pa celebra nan Asamblea di Districto “Stimador di Libertad,” a keda bisto cu tal oracion humilde i sincero a haya contesta.
E asamblea den Etiopia tabata un indicacion di con cosnan den Africa ta cambia. Den añanan reciente, e pueblo di Jehova Dios den 13 país a alegrá di a recibi libertad oficial unda na antes tabatin prohibicion of restriccion. Den Etiopia, 34 aña di prohibicion oficial a termina dia 11 di November di 1991, ora oficial dje gobierno a duna reconocimento na Testigo di Jehova i nan a inscribi di nobo legalmente. Testigo di Jehova a haci preparacion un bez pa tene un asamblea internacional. Pero, a sobrepasá tur loke nan a imagina pa mira 7.573 hende reuní den e stadión di Addis Abeba. Pe mayoría di esnan cu a asisti, esei tabata manera un soño. Bez tras bez nan a bisa un e otro: “Ruman, mira loke Jehova nos Dios a haci pa nos!”—Compara cu Salmo 66:1-5; 126:1.
Ya cu nan tabata prohibí pa 34 aña, esei a resulta den algun problema inesperá. E mayoría no a conoce e bonita canticanan di alabanza. Con nan por a siña cántanan promé cu e asamblea? Cuarenta cantica, incluyendo 17 cu tabatin riba e programa dje asamblea, tabata traducí na idioma amárico. Anto, un coro special tabata organizá pa graba tur cantica riba caset. Cada congregacion den e capital a recibi un copia dje cinta, i henter e congregacion a dedica 30 minut promé cu reunion i despues pa ensaya tur cantica. Cu ki resultado? Tur e stadión a canta cu alegría i entusiasmo durante e asamblea.
Debí na disturbio den e parti oriental dje país, e camina pe capital for di Diredawa i Harar tabata cerá. E único transportacion cu tabatin djei tabata cu avion. Ocho ruman di Harar no por a paga e pasashi dje avion, pero nan tabata determiná di bai ne asamblea, p’sei nan a bai ne base militar i a solicita pasashi den avion militar. Pa nan sorpresa nan a hayé. Nan tabata duná pasashi gratis pe asamblea!
Contesta pa nan oracion a yena wowo di ruman etiopio cu lágrima, pasobra pa trinta aña nan a wanta dificultad i persecucion i asta a mira nan amigonan matá pa nan fe. Un ruman cu a asisti a bisa: “Mi a yora desde e principio dje asamblea.” Un otro a bisa: “Si bo por a leza curazón, bo por a mira ki feliz mi tá.” Sí, ki un cos maraviyoso Jehova Dios a haci pa su fiel testigonan!—Salmo 66:16, 19.
Mas Libertad den Africa Occidental i Central
Benín ta un otro país unda e trabao di Testigo di Jehova a ser legalizá recientemente. Con e testigonan ta síntinan awor? Un orador na un reunion cristian a reconoce: “Libertad di adoracion den e país aki ta berdaderamente un regalo di Jehova.” Sí, Testigo di Jehova den e país ei ta keda profundamente agradicido cu awor nan por disfruta di libertad completo pa reuni hunto den adoracion i papia cu nan próhimo tocante e Reino di Jehova—libertad cu tanto di nos ta kere ta bini di mes.
Con nan ta manifesta nan alegría? E orador mencioná anteriormente a indica un manera ora el a bisa: “Nos participacion den e trabao di predica—specialmente bayendo di cas pa cas cu e bon nobo—ta refleha nos aprecio pa tal libertad.” Den Benín esei siguramente ta e caso. Como evidencia, leza cifra di pionero. Durante Januari di 1990, e luna cu nan a termina e prohibicion di 14 aña, 77 publicador tabata den e sirbishi di tempo completo. Dos aña despues, e total a subi te na 244, mas cu triple!
Esei no kier men cu Testigo di Jehova den Benín no tabata activo promé cu terminacion dje prohibicion. Realmente, nan awante tabatin un efecto profundo riba un oficial militar cu tabata asigná na un campamento unda nan tabata detení. Siendo cu nan determinacion pa sirbi Jehova a resulta den detencion frecuente, e tabata den contacto cu nan casi constantemente. Pero esei solamente a hacié corda conbersacion bíblico agradabel cu e tabatin cu nan na tempo di antes ora nan tabatin libertad legal.
Finalmente, nan fe fuerte a lanta den dje un sintimento di hamber spiritual. El a bishita varios misa i secta pero no a logra satisface su deseo. Tabata solamente despues di terminacion dje prohibicion na Januari di 1990 cu e por a conbersa libremente tocante e Bijbel cu Testigo di Jehova i haya e contesta pa su necesidad spiritual. Awor e ta bautizá i ta sirbi como pionero. Den un sentido, su cambio ta haci e rumanan di Benín corda loke a pasa Saul di Tarso: “E homber cu a persigínos na antes awor ta declara e bon nobo tocante e fe.”—Galatio 1:23.
Den December di 1991, Testigo di Jehova den Niger, un otro país di Westáfrica, tabata inscribí como un corporacion legal, i restriccion riba nan trabao a termina. Tabatin hopi reaccion alegre ei també. E sucursal di Nigeria, cu a atende na Niger, ta informa dje reaccion na un asamblea: “Despues dje discurso di apertura diabierne ne asamblea di Maradi, tabatin e anuncio pe rumanan cu awor nos tin reconocimento legal den Niger. Emocioná, nan a aplaudí pa varios minut. Na conclusion dje sesion, e rumanan tabata mashá expresivo, i a braza otro i a alegrá riba e bon noticia.” Nos por imaginános con nan tabata i nos ta alegrá hunto cu nan.
Con e rumanan lo usa nan libertad nobo? Un pionera den Niger no tin ningun duda en cuanto e contesta pe pregunta. El a skirbi: “Echo ta mustra cu den nos territorio den Niger tin hopi hende cu lo sali for di Babilonia e Grandi promé cu e fin. Dunando prueba di esei, mi por a informa di 80 te 85 rebishita tur luna i ta conduci 13 of 14 estudio bíblico, aunque mi a pasa hopi rebishita di mi na otro publicador.” E fiel hermana a agrega: “Debí na problema cu mi salud, mi no por haci tanto como mi kier den e sirbishi di feld, pero cada un ta haci loke nan por.”
Den Ruanda den Africa Central, e situacion di Testigo di Jehova també a cambia drásticamente. Den April di 1992 a sali un documento declarando cu por fin nan ta un organizacion legal. Nos a recibi e documento e mesun siman di Memorial, i e 1.526 publicador den Ruanda a keda emocioná cu tabatin un asistencia di 6.228 hende pe ocasion. Nos estimado rumanan lo demonstra nan gozo i aprecio aumentando nan declaracion dje bon nobo? Claro cu sí! Durante e mesun luna di April, publicador di congregacion a dedica un promedio di 27,7 ora ne predicacion i 17 rebishita, conduciendo un promedio di 2,4 estudio bíblico. I rond di 40 porciento di nan a participa den algun forma di sirbishi di tempo completo.
Legalizacion den Zuid di Africa
Bientu frescu di libertad a supla den dos tera bonita di zuid di Africa, esta, Mozambique i Angola. Den Mozambique legalizacion tabata duná den Februari di 1991. Ora e situacion a calma ei, e Sociedad Watch Tower Bible and Tract a manda misionero ne país cu gera civil a destroza trágicamente. Misionero a haya bon tera. Tin un demanda grandi pa literatura bíblico—specialmente pe buki Loke hovenan sa puntra—contesta práctica. Un misionero a informa cu el a laga 50 buki den menos cu dos ora i mei.
Hende interesá ta responde un bez. Un misionero a bishita un persona cu a manda su nomber pe Sociedad, i a sosode cu e tabata un homber militar. Un bon conbersacion a sigi cuné i dos pariente di dje. Durante un rebishita, nan a tene un otro conbersacion probechoso cu e homber i cinco hende mas. Anto nan a acepta un invitacion pa asisti ne discurso público i Estudio di Toren di Vigilancia—tur esei den cuater dia so.
Den Angola Testigo di Jehova a disfruta di cada bez mas libertad cu a culmina den e legalizacion di nan trabao den April di 1992. Con nan ta usa tal libertad mayor? Nan ta participa den e sirbishi di feld! Tin rond di 17.000 publicador den Angola, i nan ta conduci casi 60.000 estudio bíblico. Ki potencial pa aumento den futuro!
Hovenan ta Participa den Dunamento di Testimonio
Den país unda cu tin legalizacion reciente dje predicacion, asta hovenan i esnan no bautizá ainda ta demonstra nan aprecio cu nan participacion den e ministerio. Den e República di Cabo Berde unda Testigo di Jehova tabata legalizá den November di 1990, na un asamblea un hovencita di 17 aña di edad a lanta pa haci un expresion público di fe. Despues dje bautismo, un bishitante a mira un grupo rond di dje. El a bai cerca dje pa felicité i a puntra ken tabata e hendenan. El a contesta: “O, eseinan ta estudio bíblico di mi.” E tabata conduci siete estudio, i nan tabata felicité pa su bautismo. El a haci solicitacion caba pa sirbi como pionero auxiliar i ta spera pa ser capaz pa bira pionero regular despues.
Un mucha muher di diez aña di edad na Angola tabata puntrá si e ta publicador. El a contesta cu “Sí.” E ta conduci estudio bíblico? “Claro.” Cuanto? “Siete,” segun e mucha di diez aña.
Nos ta leza den e buki di Echo cu na un tempo den e promé siglo, “e congregacion den tur Hudea i Galilea i Samaria a drenta den un tempo di paz, siendo edificá; i como cu el a camna den temor di Jehova i den consuelo di spiritu santo el a sigi aumenta.” (Echo 9:31) Den nos oracion, nos ta pidi cu e tempo aki també lo ser un tempo di paz pa nos rumanan den Africa. Nos ta alegrá hunto cu nan pa nan edificacion, i nos ta pidi cu e spiritu di Jehova lo ta cu nan mientras cu nan ta probecha di nan libertad pa plama e bon nobo i sigi aumenta.
[Mapa na página 24]
(Pa teksto den su formato kompletu, wak publikashon)
País Unda Testigo di Jehova Tabata Legalizá of Restriccion Riba nan Tabata Kitá
1. Gambia, December di 1989
2. Benín, Januari di 1990
3. República di Cabo Berde, November di 1990
4. Mozambique, Februari di 1991
5. Ghana, November di 1991
6. Etiopia, November di 1991
7. Congo, November di 1991
8. Niger, December di 1991
9. Togo, December di 1991
10. Chad, Januari di 1992
11. Kenya, Mart di 1992
12. Angola, April di 1992
13. Ruanda, April di 1992
[Plachi na pagina 23]
Den Benín un publicador di Reino ta toca e palabra di Mateo 24:14 riba su tambor parlante
[Plachi na pagina 25]
Den hopi país africano, cristian berdadero ta saca probecho di nan libertad nobo
[Plachi na pagina 26]
Testigo nobo ta simboliza nan dedicacion na Jehova Dios mediante nan bautismo bao di awa