Un Homber Educá

“BOSO ta mira su yamamento di boso, rumanan, cu no hopi hende sabí na moda carnal tabata yamá, ni hopi poderosonan, ni hopi di nacimento noble.” (1 Corintio 1:26) Manera e palabra ei ta indica, ta existi e peliger di ser hogá den sabiduría di mundo of ser halzá den puesto social halto. Cos asina por stroba hende di acepta e bon nobo.—Proverbio 16:5; Marco 10:25.

No obstante, den e tempo di Pablo, algun hende cu tabata sabí segun e carni a acepta e berdad, i un hende asina tabata Pablo mes. Pablo tabatin un bon educacion i aparentemente tabata di un famía prominente, pero e tabata un celoso evangelizador. Asina Pablo a mustra cu hende cu privilegio den e mundo aki por sirbi Jehova Dios si nan curazón ta recto. Nan asta por usa nan educacion den e sirbishi di Jehova.—Lucas 16:9.

Natural di Tarso

Pablo a nace den Tarso, “un stad no un poco conocí,” manera e mes a pinté despues. (Echo 21:39) Probablemente tabata ei cu el a siña varios idioma—specialmente a domina griego—cu tabata di gran balor pe den su trabao di misionero. Bida den Tarso no solamente a yuda Pablo conoce e bida di hudío sino també e cultura griego, experencia cu el a usa mas tardi como apóstol pe nacionan. E tabata sa con pa expresa e berdad di manera cu nan por a comprende. (1 Corintio 9:21) Por ehempel, considera su discurso pa hende di Atenas, skirbí den Echo capítulo 17. Como experto, el a hinca den su presentacion dje berdad mencion dje religion griego i asta palabra di un poëta di nan.

Un Ciudadano Romano

Pablo tabatin un otro bentaha mundano. E tabata un ciudadano romano, i el a probecha di esei també pe progreso dje bon nobo. Den Filipos, e i compañé di dje tabata golpeá i encarcelá sin haya huzgamento. Tabata ilegal pa haci esei cu ciudadano romano, i ora Pablo a hala tal echo ne atencion di autoridad, nan a permitié keda i atende ne congregacion promé cu el a sigi su camina.—Echo 16:37-40.

Despues, ora el a presenta dilanti gobernador Festo, Pablo a probecha di su ciudadanía romano pa apela su caso na César. Asina, el a haci un defensa dje bon nobo dilanti autoridad di mas halto dje Imperio Romano.—Echo 25:11, 12; Filipense 1:7.

Pablo a siña un ofishi cu despues tabata probechoso. Probablemente su tata a siñé traha tent. Gracias na esei, e por a mantene su mes den e ministerio ora cen tabata scars. (Echo 18:1-3) També, el a recibi un educacion religioso intenso. E tabata criá como “fariseo, yiu di fariseo.” (Echo 23:6) Realmente, el a studia na pia di Gamaliel, un maestro hudío di mas ilustre. (Echo 22:3) Tal educacion, kizás comparabel cu bon educacion di universidad djawe, ta indica cu su famía tabata basta prominente.

Punto di Bista Apropiado

E pasado i educacion di Pablo a ofrecé un futuro briyante den e religion hudío. E por a bai leu. Sin embargo, despues di a acepta Jesús como Mesías, meta di Pablo a cambia. Ora el a skirbi filipense, el a menciona algun bentaha mundano cu e tabatin promé i a bisa: “Loke tabata ganashi pa mi, esei mi a considera como pérdida pa causa di Cristo. Sí, en cuanto esei, ami realmente en berdad ta considera també cu tur cos ta pérdida pa causa dje balor sobresaliente dje conocimento di Cristo Jesús mi Señor.”—Filipense 3:7, 8.

E homber ei cu educacion no a mira atrás cu anhelo riba loke e por a haci cu su educacion mundano; tampoco e no a usa “tanto siñanza” pa impresiona otro hende. (Echo 26:24; 1 Corintio 2:1-4) Mas bien, poniendo plena fe den Jehova Dios, el a menciona oportunidad anterior di dje, bisando: “Lubidando loke ta patrás i forzando padilanti pa loke ta mas ayá, mi ta sigi numa den direccion dje meta pe premio di e yamada djariba di Dios mediante Cristo Jesús.” (Filipense 3:13, 14) Pablo a duna cosnan spiritual un balor halto.

No obstante, Pablo a usa tal educacion den e sirbishi di Jehova. Ora el a bisa tocante hudío, “Mi ta duna testimonio di nan di cu nan tin celo pa Dios,” el a papia a base di su experencia personal. (Romano 10:2) Como un fariseo practicante, Pablo siguramente tabatin un celo pa Dios i pe Scritura. Despues cu el a bira cristian, e conocimento exacto di Pablo a templa su celo, i e por a usa su educacion anterior pa un fin husto. Por ehempel, den e buki di Hebreo, el a usa su conocimento profundo di historia di Israel i dje adoracion den e tempel pa demonstra e superioridad dje sistema cristian.

Den e dia djawe també tin algun hende sabí segun e carni cu ta acepta e bon nobo. Hende cu tur sorto di calificacion di educacion, i també tur sorto di ofishi i diploma, a acepta e berdad i ta usa nan educacion di antes den e sirbishi di Jehova. No obstante, apesar di nan educacion seglar, hende cristian nunca ta perde bista dje echo di cu loke tin e mayor importancia ta nan aptitud spiritual. Esei ta e “cosnan mas importante” pasobra nan por híbanos na bida eterna.—Filipense 1:10.