Un Iniciativa pa Yúdanan Bolbe

‘EL A papia cu nan usando comparacion.’ Asina e Bijbel ta introduci e tres comparacion memorable di Jesús tocante misericordia—esun dje carné perdí, e moneda di dracma perdí, i e yiu perdí.—Lucas 15:3-32.

Dos artículo den E Toren di Vigilancia di October di 1991, a analiza e tres comparacion i a yuda hopi lector mira con pa extende misericordia den e dia djawe. Un meta principal tabata pa wardador spiritual tuma iniciativa pa haci contacto cu hende expulsá pero cu por reaccioná na bishita bondadoso. Kico tabata e resultado di tal artículo i e procedimento nobo?

Pronto despues di publicacion dje revista, un homber den estado di Washington, EUA, a skirbi: “Prueba dje bondad amoroso abundante di Jehova Dios a yega pa post awe. Mi ta sinta aki cu awa den mi wowo i gozo den mi curazón riba e percuracion i reahuste cu e Haltísimo ta haci. Solamente un Dios berdaderamente husto por duna yudanza na hende semehante di carné cu ta perdí. . . . Sí, mi ta expulsá pero riba camina pa reestablecimento.” E tabata reestablecí den October.

Pero, kico di bishita cu dos anciano di congregacion a haci? Un esposa cristian a skirbi: “Palabra no por expresa con mi ta sintími. Mi casá tabata scomulgá pa rond di 13 aña. Anciano a bishité, segun e sugerencia den e artículo. Ayeranochi pe promé bez den hopi aña, el a asisti na reunion. Awor e ta purba di dirigi su bida den otro direccion i bolbe.”

Ora superintendente biahero ta bishita congregacion tras congregacion, nan en berdad ta mira resultado. Un superintendente di circuito a skirbi recientemente:

“Ora E Toren di Vigilancia di October di 1991 tabata publicá, hopi ruman a puntra ki reaccion anciano lo encontra haciendo contacto cu hende expulsá. E contesta ta bira mashá bisto.

“Den nos circuito, e último cuater congregacion cu mi a bishitá a mira nuebe hende bolbe na Salón di Reino. Aunque un so a wordu reestablecí, e otro ocho ta haci bon progreso. Anciano i congregacion ta excitá pa mira e fruta di nan labor i e sabiduría di aplica instruccion teocrático.

“Nos ta alegrá pa mira tal arreglo excelente i misericordioso. Manera un hermana reestablecí a bisa, ‘Mi no tabatin e curashi pa bolbe mi so, siendo cu mi a sintími condená dilanti Jehova Dios. Pero ora anciano a bishitámi, esei tabata e animacion cu mi a falta pa mi bolbe.’ Su entusiasmo a anima e congregacion hopi.”

Aunque hopi hende cu ta ser bishitá no ta reacciona, tal iniciativa misericordioso siguramente ta haci hopi bon. Pues, na principio di September anciano di cada congregacion a cuminza repasa nomber di hende den nan territorio cu ta expulsá i haci arreglo pa bishitá tur locual nan ta kere lo aprecia extension di misericordia.