E Arzobispo no Por cu Nan!

AÑA pasá, un consistorio (concilio solem di cardenal) tabata organizá pa considera cierto asunto cu ta preocupa e Iglesia Católico hopi. Segun e curant Il Sabato, un asunto ta “agresividad di secta.” Sin embargo, e curant a bisa: “No mester ta un problema pa cardenal yega na un acuerdo riba e punto ei. Nan tur ta di acuerdo di cu ta necesario pa investiga mas a fondo e fenómeno di grupo religioso nobo i també ta necesario pa preveni, tanto como sea posibel, nan expansion.”

No obstante, ta keda bisto cu “agresividad di secta” no ta un problema den Italia so. Il Sabato a informa: “Ora el a bishita e Vaticano recientemente, arzobispo Kirill di Smolensk [un stad di mas bieu di Rusia] . . . a pidi e papa ayudo ecuménico pe enfrenta e asombroso crecimento di Testigo di Jehova i grupo similar den e Union Soviética.”

Den e promé siglo, lider di religion establecí a keha di igual manera ora sigidor di cristianismo a plama nan fe cu determinacion. Na un ocasion hudío indigno a keha na gobernante dje stad: “E hendenan cu a trastorna e tera habitá ta presente aki també”! (Echo 17:6) Den e tempo ayá, lider religioso a traha duro pa para e plamamento di cristianismo, pero nan a fracasá. Awe també, cualkier esfuerzo pa para e plamamento di doctrina cristian berdadero ta condená na fracaso. Dios mes ta primintí: “Sea cua sea e arma cu ta ser formá contra bo, lo e no tene éxito, i sea cua sea e lenga cu ta lanta contra bo den e huicio, lo bo ser condená. Esei ta e posesion hereditaria di sirbidor di Jehova, i nan husticia ta bini di mi.”—Isaías 54:17.