Informe di proclamador di Reino

Bo a Calcula e Gasto?

E SPIRITU di Jehova Dios ta obra fuertemente riba su pueblo den Brasil mientras cu nan ta predica e bon nobo di liberacion pa hende den esclabitud na religion falso. (Isaías 61:​1, 2; Lucas 4:18) Na 1947 tabatin solamente 648 Testigo di Jehova den e país. Na 1967 e cantidad a aumenta te na 41,548. Cu e bendicion di Jehova Dios, na principio di 1991 nan a yega un máximo di mas cu 302.000! Berdaderamente, ‘Dios a hacié crece.’ (1 Corintio 3:⁠7) Durante e aña di sirbishi di 1990 so, 27.068 a bautiza.

Tal aumento a haci necesario e organizacion di un circuito nobo cada luna, i 150 Salón di Reino nobo tabata dedicá den un aña so. Además, e oficina di sucursal a cumpra 230 hectar di terreno pa expande nan facilidad di druk, unda awor nan ta druk Bijbel cu nan mes mashín. Asina, Testigo di Jehova den Brasil ta traha duro pa yuda hende di curazón humilde sali for di “Babilonia e Grandi” promé cu e “tribulacion grandi.”​—⁠Revelacion 7:​9, 10, 14; 18:​2, 4.

□ Un publicador di ocho aña di edad a laga un buki cu esposa dje hefe di poliz, anto, e so a haci e rebishita. Su doel tabata pa laga e señora leza algun relato pe i lagué bisé loke el a capta for di cada relato. Mientras cu e señora a splica e relato ne mucha, e mes a cuminza aprecia e buki i a pidi e mucha hibé pa conoce su mama. El a haci esei, i awor e señora ta disfruta di un estudio bíblico regular di cas.

□ Na 1984, María a fada dje hipocresía cu el a mira den mundo, i a desesperá debí na desaster cu ta pasa den mundo i mencioná den noticia. Pues, el a adoptá e moda di biba di bagamundo. El a bisa: “Nos meta tabata di ser contra tur cos i tur hende. Mi aparencia tabatin e intencion di precisamente escandalizá hende, es decir, paña straño i scur cu mi cabei mitá feitá. Mi a lubida mi casá, yiunan, i cas i a cuminza huma marijuana i usa co­caína pa scapa for dje realidad. Esei solamente a hacími sintími pior. Mi a yora. Ora mi a leza e Bijbel, e tabata sin comprendimento. Pues, mi a pidi Dios yudámi.

“Un dia dos Testigo di Jehova a bishita mi cas i, despues di un conbersacion breve, nan a ofrecémi dos revista. Pasando door di uno di nan, mi a ripara un artículo titulá ‘Independencia foi Dios​—⁠pakico no?’a E artículo a toca mi curazón. Mi a sinti cu Dios a contesta mi oracion, i e mesun dia, Testigo di Jehova a cuminza studia e Bijbel cu mi. Dje ora ei padilanti mi a haci cambio pa mehora. Mi casá i famía na principio a opene mi studiamento di Bijbel, pero ora nan a mira e cambio cu mi a haci, nan a cuminza animámi. Awor mi ta un sirbidor bautizá di Dios.”

Testigo di Jehova den Brasil, mescos cu den tur otro parti di mundo, ta activo predicando “liberacion pa catibo.” Multitud di hende ta acepté, ta haya berdadero liberacion i felicidad den e sirbishi di Jehova Dios.

[Nota]

[Plachi na página 30]

BRASIL

Poblacion - 150.367.800

Maximo di publicador di 1990 - 293.466

Razón di 1 publicador pa - 512

Cantidad bautizá, 1990 - 27.068

Promedio di publicador pionero - 30.115

Cantidad di congregacion - 4.625

Promedio di estudio bíblico - 341.305

Asistencia na Memorial - 790.926